Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 94: Eye wa suverere ounatje

Ehungi 94: Eye wa suverere ounatje

TARA Jesus imba tja pukata okazandona. Omundu tjiri mo munu kutja Jesus wa suverere ounatje. Ovarumendu mbu mave tarere ovaapostele ve. Jesus ma tja tjike ku wo? Indjeye tu konḓonone.

Jesus novaapostele va za nokukotoka okuza kouyenda wawo oure. Mondjira ovaapostele va ri nombata mokati kawo oveni. Okutja kombunda youyenda Jesus arire tje ve pura na tja: ‘Mondjira mwa ri nombata yatjike?’ Jesus aa tjiwa kutja ombata ya ri ohunga natjike. Nungwari eye wa pura ovaapostele ve epuriro okutara kutja owo mave mu raere tjike.

Jesus nokanatje

Ovaapostele kave mu zirire, orondu mondjira owo va ri nombata yokutja owaṋi mokati kawo ngu ri omunenenene. Ovaapostele tjiva aave vanga okurira ovananḓengu povakwawo. Jesus we ve raera momwano uṋe kutja katjiṋa otjiwa okuvanga okurira omunenenene?

Jesus wa isana okanatje, ne ke kuramisa mokati kawo avehe. Okuzambo eye wa raera kovahongewa ve na tja: ‘Ami tjiri me raere eṋe kutja tji mu hi nokurunduruka na mu sana kounatje, kamaamu hiti mouhona waMukuru. Omunenenene mouhona eye ngwi ngu me risusuparisa na sana kokanatje nga.’ Ove mo tjiwa kutja omena ratjike Jesus tja hungira nao?

Omena rokutja ounatje ouṱiṱi kau rikende ohunga nokurira ounene poo okurira ousemba tjinene kombanda yavarwe. Okutja ovaapostele aave sokurihonga okukara tjimuna ovanatje momuano mbwi nave ha pose ohunga nokurira ovanene poo ovananḓengu.

Pa ri notuveze twarwe wina, Jesus pa raisa kutja wa suverere ounatje. Omieze oviṱiṱi kombunda ovandu tjiva va eta ovanatje vawo kutja ve yekumuna Jesus. Ovaapostele va kondjisa okuvetjaera. Nungwari Jesus wa tja: ‘U eseye ounatje u ye ku ami nu amu u tjaere, ouhona waMukuru tjinga au ri owaimba mbe ri nao.’ Okuzambo Jesus wa pukata ounatje ne u sere ondaya. Ihi katjiṋa otjiwa nao okutjiwa kutja Jesus wa suvera ounatje?

Mateus 18:1-4; 19:13-15; Markus 9:33-37; 10:13-16.



Omapuriro

  • Indu ovaapostele tji va ri mondjira okuza kouyenda wawo oure, owo va ri nombata yatjike?
  • Omena ratjike Jesus tja isana okanatje ne ke kuramisa mokati kovaapostele?
  • Omomuano uṋe ovaapostele mu mave sokurihonga okukara tjimuna ovanatje?
  • Kombunda yomieze oviṱiṱi tji vya kapita, Jesus wa raisa vi kutja eye wa suverere ovanatje?

Omapuriro omaweziwa

  • Lesa Mateus 18:1-4.

    Omena ratjike Jesus tjaa ungurisa ovisanekero indu tjaa hongo ovandu? (Mat. 13:34, 36; Mar. 4:33, 34)

  • Lesa Mateus 19:13-15.

    Ovitjiukwa viṋe vyoundu mbi ri movanatje eṱe mbi matu sokuhorera indu tji matu vanga okukara norupa mozondaya zOuhona? (Eps. 25:9; 138:6; 1 Kor. 14:20)

  • Lesa Markus 9:33-37.

    Otjikeṋa Jesus tja honga ovahongewa ve ohunga nokupaha ovihako poo ozondondo zokombanda? (Mar. 9:35; Mat. 20:25, 26; Gal. 6:3; Fil. 2:5-8)

  • Lesa Markus 10:13-16.

    Jesus wa ri omundu omupupu vi kovandu okuya ku ye, nu ovarumendu ovanene vombongo yOukriste mave yenene okurihongera tjike kotjihorera tje? (Mar. 6:30-34; Fil. 2:1-4; 1 Tim. 4:12)