Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 91: Jesus ma hongo ovandu kondundu

Ehungi 91: Jesus ma hongo ovandu kondundu

TARA Jesus wa haama mbo. Eye ma hongo ovandu avehe mba kondundu mu Galilea. Imbo mba haama popezu naye ovahongewa ve. Eye wa toorora 12 vawo okurira ovaapostele ve. Ovaapostele ovahongewa vaJesus vapeke. Ove mo tjiwa omana wawo?

Jesus ma hongo

Pena Simon Petrus nomuangu we Andreas. Wina pena Jakobus na Johanes, mbe ri omuangu nerumbi. Nu wina pena omuapostele warwe wena Jakobus na warwe wina ngu isanewa Simon. Ovaapostele vevari ve nomana Judas. Umwe o Judas Iskariot nu Judas ingo warwe wina u isanewa Tadeus. Okuzambo pena Filipus na Natanael (wina ngu isanewa Bartolomeus), na Mateus na Tomas.

Kombunda yaindu Jesus tja kotoka okuza ku Samaria, eye wa uta okuzuvarisa otjikando otjitenga na tja: ‘Ouhona womayuru u ri popezu.’ Ove mo tjiwa kutja ouhona mbwi otjikeṋa? Owo ohoromende yaMukuru yakatjiri. Jesus ongu ri ombara yawo. Eye ma honaparere okuza keyuru nu ma eta ohange kombanda yehi. Ouhona waMukuru mau tanaurire ehi arihe moparadisa ombwa.

Jesus imba ma hongo ovandu ohunga nouhona. Eye wa kahurura na tja: ‘Eṋe mwa sokukumba nai. Tate yetu ngu u ri momayuru, ena roye ngari yapurwe. Ouhona woye ngau ye. Ombango yoye ngai tjitwe nakombanda yehi otja meyuru.’ Ovandu ovengi ve tja indji ‘Ongumbiro yaMuhona.’ Varwe ve i isana ‘Tate Yetu.’ Ove mo yenene okuhungira ongumbiro ndji aihe?

Jesus wina aa hongo ovandu kutja ve sokutjindasana vi. Eye wa tja: ‘Avihe mbi mamu vanga kutja ovakweṋu ve tjite ku eṋe, eṋe wina nga rire mbi mwa tjiti ku wo.’ Ove ko tjaterwa indu ovandu varwe tji mave ku tjindi nawa? Okutja Jesus aa tja eṱe tu sokutjinda ovakwetu momuano omuwa. Ihi tjiri matji rire otjiṋa otjiwa moparadisa kombanda yehi indu ovandu avehe tji mave katjindasana nawa.

Mateus ekondwa 5 nga kekondwa 7; 10:1-4.



Omapuriro

  • Motjiperendero, Jesus ma hongere poruveze ruṋe, nu imbo mba haama popezu na ye oowaṋi?
  • Omana yovaapostele vaJesus 12 ootjikwaye?
  • Ouhona Jesus mbwaa zuvarisa otjikeṋa?
  • Jesus wa honga ovandu okukumba ohunga natjike?
  • Jesus wa tja ovandu mave sokutjindasana vi?

Omapuriro omaweziwa

  • Lesa Mateus 5:1-12.

    Omomiano viṋe mu matu yenene okuraisa kutja tu rikendera kovihepwa vyetu vyombepo? (Mat. 5:3, NW; Rom. 10:13-15; 1 Tim. 4:13, 15, 16)

  • Lesa Mateus 5:21-26.

    Mateus 5:23, 24 mari ṋunisa vi kutja oupanga wetu ku nomarumbi novaṱena kwetu u ṱuna koupanga wetu na Jehova? (Mat. 6:14, 15; Eps. 133:1; Kol. 3:13; 1 Joh. 4:20)

  • Lesa Mateus 6:1-8.

    Omiano viṋe vyokurimuna ousemba oveni, Ovakriste mbi va sokunakaura? (Luk. 18:11, 12; 1 Kor. 4: 6, 7:2 Kor. 9:7)

  • Lesa Mateus 6:25-34.

    Jesus wa honga tjike ohunga nounahepero wokuriyameka ku Jehova okutupa ovihepwa vyetu vyotutu? (Eks. 16:4; Eps. 37:25; Fil. 4:6)

  • Lesa Mateus 7:1-11.

    Eṱe matu rihongere tjike kotjisanekero tjaJesus otjikahu tji tji ri mu Mateus 7:5? (Omiano 26:12; Rom. 2:1; 14:10; Jak. 4:11, 12)