Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 88: Johanes ma papitisa Jesus

Ehungi 88: Johanes ma papitisa Jesus

TARA onguti ndji mai ya kombanda yotjiuru tjomurumendu ngo. Omurumendu ngo oJesus. Eye imba wa ri nozombura nḓe ṱa ape po 30. Nu omurumendu ngu ri pu na ye oJohanes. Eṱe rukuru twe rihonga otjiṋa ohunga na ye. Ove mo zemburuka indu Maria tja karyangera omuzamumwe we Elisabet, nokanatje mezumo raElisabet tji katuka nenyando? Okanatje ku ka ri mezumo re ka ri Johanes. Nungwari Johanes na Jesus mave ungura tjike nambano?

Ombapitisimo yaJesus

Johanes wa zu nokupundisa Jesus kehi yomeva yonḓonḓu yaJordan. Omundu wa sokupapitisiwa momuano mbwi. Rutenga, eye wa pundisiwa kehi yomeva, okuzambo a pitisiwa rukwao. Mena rokutja imbi Johanes ombyaa tjiti kovandu, eye aai sanewa Johanes Omupapitise. Nungwari omena ratjike Johanes tja papitisa Jesus?

Johanes wa tjita nao mena rokutja Jesus we ya ku Johanes ne mu ningire kutja me mu papitise. Johanes aa papitisa ovandu mbaave vanga okuraisa kutja ve nomihihamwatima noviṋa ovivi mbi va tjita. Nungwari Jesus wa rora okutjita otjiṋa kangamwa otjivi tji ma sokukarera nomuhihamwatima? Kako, Jesus ke ya rora okutjita otjiṋa otjivi, mena rokutja eye Omuna waMukuru omuini ngwa za meyuru. Okutja eye wa ningira Johanes me mu papitise mena repu rarwe. Indjeye tu tare kutja ya ri mena repu riṋe.

Jesus ngunda eehi ye ya ku Johanes, eye wa ri omuungure womiti. Omuungure womiti omundu ngu ungura oviṋa okuza pomiti, tjimuna oviriro novihaamwa. Omurumendu waMaria, Josef, wa ri omuungure womiti, neye wa hongere Jesus okurira omuungure womiti wina. Nungwari Jehova ka hindire Jesus kombanda yehi kutja me yekurira omuungure womiti. Eye wa ri noviungura vyapeke ku ye okuungura, noruveze ku ye okuuta okuviungura rwa ri arwa yenene. Okutja okuraisa kutja eye we era okutjita ombango yaihe, Jesus wa ningira Johanes kutja me mu papitise. Mukuru wa ri nonyuṋe notjiṋa hi po?

Ii, eye wa ri nonyuṋe natjo, mena rokutja, kombunda yaindu Jesus tja pita momeva, eraka okuza keyura ra tja: ‘Ingwi Omuna wandje omusuverwa Ami mu mbi nonyuṋe.’ Opo wina pa munika aayo eyuru ra paturuka nu onguti ndji ye ya kombanda yaJesus. Nungwari oyo kaya ri onguti yakatjiri. Oyo aai munika nao uriri. Oyo tjiri ya ri ombepo ondjapuke yaMukuru.

Nambano Jesus wa ri noviṋa ovingi okuripurira ko, okutja wa ya koruveze eye ka kakara erike oure womayuva 40. Ngunda a ri ngo Satan we ya ku ye. Satan wa kondjisa okurora Jesus povikando vitatu kutja ma tjite oviṋa mbi vya ri ombirukira nomatwako waMukuru. Nungwari Jesus wa panḓa.

Kombunda yanao, Jesus wa yaruka na kahakaena novarumendu tjiva mbu va karira ovemukongorere poo ovahongewa ve ovatenga. Omana watjiva vawo oAndreas, Petrus (wina ngu isanewa Simon), Filipus na Natanael (wina ngu isanewa Bartolomeus). Jesus novahongewa ve mba ovape va ya ku Galilea. Mu Galilea owo va kakurama mu Kana, otjihuro tjaNatanael. Ingo Jesus wa ya komukandi omunene worukupo, na tjiti otjihimise tje otjitenga. Ove mo tjiwa kutja otjikwaye? Eye wa tjutukisa omeva momavinu.

Mateus 3:13-17; 4:1-11; 13:55; Markus 6:3; Johanes 1:29-51; 2:1-12.



Omapuriro

  • Ovarumendu vevari mbe ri motjiperendero oowaṋi?
  • Omundu u papitisiwa vi?
  • Johanes kohapo aa papitisa ovandu veṋe?
  • Epu riṋe rapeke Jesus nda ningirira Johanes kutja me mu papitise?
  • Mukuru wa raisa vi kutja wa ri nonyuṋe Jesus tja papitisiwa?
  • Pa tjitwa tjike indu Jesus tja ya koruzeve ka ri erike oure womayuva 40?
  • Ovakongorere ovatenga poo ovahongewa tjiva vaJesus va ri ootjikwaye, nu otjikumise tjiṋe otjitenga eye tja tjita?

Omapuriro omaweziwa

  • Lesa Mateus 3:13-17.

    Otjihorera tjiṋe Jesus tja raisa ohunga nombapitisimo yovahongewa ve? (Eps. 40:7, 8; Mat. 28:19, 20; Luk. 3:21, 22)

  • Lesa Mateus 4:1-11.

    Omuano omupyuke Jesus mbwaa ungurisa Omatjangwa, mau tu tunduza vi okukonḓonona Ombeibela aruhe? (Mat. 4:5-7; 2 Petr. 3:17,18; 1 Joh. 4:1)

  • Lesa Johanes 1:29-51.

    Johanes Omupapitise ombango yovahongewa ve wa hungamisa ku uṋe, neṱe ndino matu yenene vi okumuhorera? (Joh.1:29, 35, 36; 3:30; Mat. 23:10)

  • Lesa Johanes 2:1-12.

    Otjikumise tjaJesus otjitenga matji raisa vi kutja Jehova ka rurupara oviṋa oviwa kovakarere ve? (Joh. 2:9, 10; Eps. 84:11; Jak. 1:17)