Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 100: Jesus motjikunino tjaGetsemane

Ehungi 100: Jesus motjikunino tjaGetsemane

INDU tji va za metuwo rokombanda, Jesus novaapostele ve va ya kotjikunino tjaGetsemane. Owo va rora okuya mba povikando ovingi rukuru. Jesus nambano me ve raere kutja ve kare katumba nu ve kumbe. Okuzambo eye wa ya ohumburuko kaṱiṱi, a kawa onḓurumika na kumbu.

Kombunda Jesus wa kotoka koruveze ku kwa ri ovaapostele ve. Ove tji mo ripura, owo aave ungura tjike? Owo va ri ava rara! Povikando vitatu Jesus we ve raera kutja ngave kare katumba, nungwari otjikando atjihe eye tjaa kotoka ku wo ee yekuvevaza ava rara. Jesus we ve raera otjikando otjisenina tja kotoka na tja: ‘Mamu sokurara vi moruveze otja indwi? Oiri ye ya ku ami okuyandjwa momake wovanavita vandje.’

Oruveze ndo pa uta okuzuvaka orurokoho rotjimbumba otjinene. Tara motjiperendero ho, ovarumendu ve ya nomangaruvyo nozongwinya! Nowo va tjindire omamunine okuvepa ondjerera. Indu owo tji va vaza popezu, umwe wawo wa pita motjimbumba ne ya osemba ku Jesus. Eye we mu hupita, otja tji mo munu mba. Omurumendu ngo oJudas Iskariot! Omena ratjike eye tja hupita Jesus?

Judas ma horora Jesus

Jesus we mu pura na tja: ‘Judas, mo ndji horora noruhupito roye?’ Ii, oruhupito rwa ri otjiraisiro. Oro aaru raisire ovarumendu mbu va ri puna Judas kutja ingwi oJesus, omurumendu owo ngu mave paha. Okutja ovanavita vaJesus va ryama komurungu okumukambura. Nungwari Petrus kena pe ve yandjera okukambura Jesus nokuhinotjirwa. Eye wa nana engaruvyo eye nda eterera na kepura naro okutwi kwomurumendu ngwa ri popezu naye. Engaruvyo ra parwisa otjiuru tjomurumendu nari kepura okutwi kwe kokunene. Nungwari Jesus wa ṱuna kokutwi komurumendu ne ku verura.

Jesus wa raera Petrus na tja: ‘Yarura mo engaruvyo roye motjihweka tjaro. Ove mo munu kutja ami himee yenene okuningira ku Tate me ndji hindire omayovi wovaengeli okundjiyama are?’ Ii, eye ma yenene! Nungwari Jesus kena pa ningira Mukuru okumuhindira kangamwa ovaengeli, orondu eye aa tjiwa kutja oruveze rwe rwokukamburwa i ovanavita rwa tumbukire. Okutja eye we ve yandjera kutja ve mu tware. Nambano indjeye tu tare kutja ovikwaye mbi mavi tjitwa ku Jesus.

Mateus 26:36-56; Lukas 22:39-53; Johanes 18:1-12.



Omapuriro

  • Jesus novaapostele ve va ya pi kombunda yaindu owo tji va za metuwo rokombanda, neye we ve raera kutja ngave tjite tjike?
  • Jesus wa muna tjike indu tja kotoka koruveze ku kwa ri ovaapostele ve, nu ihi tja tjitwa povikando vingapi?
  • Oowaṋi mba hita motjikunino, nu Judas Iskariot wa tjita tjike, otja tji mo munu motjiperendero?
  • Omena ratjike Judas tja hupita Jesus, nu Petrus wa tjita tjike?
  • Jesus wa tja tjike ku Petrus, nungwari omena ratjike Jesus tje hina wa ningira Mukuru okumuhindira kangamwa ovaengeli?

Omapuriro omaweziwa

  • Lesa Mateus 26:36-56.

    Omuano Jesus mbwa ronga ovaapostele ve otjihorera otjiwa vi kovarumendu ovanene vombongo ndino? (Mat. 20:25-28; 26:40, 41; Gal. 5:17; Ef. 4:29, 31, 32)

    Jesus wa ri noumune uṋe ohunga nokuungurisa ovirwise kovakwetu? (Mat. 26:52; Luk. 6:27, 28; Joh. 18:36)

  • Lesa Lukas 22:39-53.

    Indu omuengeli tje rimunikisa ku Jesus motjikunino tjaGetsemane okumuzeuparisa, ihi tja raisa kutja Jesus aa teratera mongamburiro ye? Kahurura (Luk. 22:41-43; Jes. 49:8; Mat. 4:10, 11; Hebr. 5:7)

  • Lesa Johanes 18:1-12.

    Jesus wa tjevera vi ovahongewa ve kovemupirukire, neṱe matu rihongere tjike kotjihorera tji? (Joh. 10:11, 12; 18:1, 6-9; Hebr.13:6; Jak. 2:25)