Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 92: Jesus ma pendura ovaṱi

Ehungi 92: Jesus ma pendura ovaṱi

OMUKAZONA ngu mo munu mba u nozombura 12. Ingwi ngwa ṱiza eke re oJesus, nu imba mba kurama popezu mbo oina na ihe. Ove mo tjiwa kutja omena ratjike owo tji mave munika ohange nao? Indjeye tu konḓonone.

Jesus ma pendura omukazona waJairus

Ihe yomukazona ngo wa ri omurumendu omunanḓengu wena Jairus. Eyuva rimwe omukazona we wa verere na tuwa mombete. Nungwari eye kaa veruka. Eye aa verereko tjinene. Jairus nomukazendu we aave rikende tjinene, mena rokutja aape munika aayo omukazona wawo ma ṱu. Omukazona oomuatje wawo erike ngu va ri nawo. Okutja Jairus wa ya okukapaha Jesus. Eye wa zuva ohunga novihimise Jesus mbyaa tjiti.

Indu Jairus tja hakaena na Jesus, we mu vaza a koverwa kotjimbumba otjinene. Nungwari Jairus we ri ṋiṋikizira mokati kotjimbumba na kawira komurungu wozombaze zaJesus. Neye we riheka ku ye na tja: ‘Omukazona wandje wa vere tjinene. Arikana indjo u ke mu verukise.’ Jesus we mu raera kutja eye me ya.

Owo ngunda amave kayenda, otjimbumba aatji ṋiṋikiza okuvaza popezu. Tjimanga Jesus wa kurama. Eye wa pura na tja: ‘Owaṋi ngwa ṱunu ku ami?’ Jesus we rimuna omasa nga pita mu ye, okutja eye aa tjiwa kutja pe nomundu ngwe mu ṱuna. Nungwari owaṋi? Eye wa ri omukazendu ngwa verere tjinene oure wozombura 12. Eye we ya na ṱunu kozombanda zaJesus na veruka!

Ihi tja nyandisa Jairus omutima, mena rokutja eye aa munu kutja oupupu ku Jesus okuverura omundu. Okuzambo omuhindwa wa eta ombuze ndji mai tja: ‘O uhara amo kendisa Jesus. Omuatje woye wa koka.’ Jesus wa zuva otjiṋa hi na tja ku Jairus: ‘O rikende, omuatje woye ma kara nawa.’

Indu korusenina tji va kavaza kondjuwo yaJairus va kavaza ovandu amave riri noruhoze orunene. Nungwari Jesus arire tja tja kuwo: ‘Amu riri. Omuatje ka kokere. Eye wa rara uriri.’ Nungwari ovandu va yora Jesus, mena rokutja owo aave tjiwa kutja omuatje wa koka.

Okuzambo Jesus wa toora ihe na ina yomukazona novaapostele ve vetatu nave i ketuwo omuatje ka rarere. Eye we mu kambura keke na tja: ‘Penduka!’ Nomuatje wa rira omunamuinyo, otja tji mo munu mba. Neye wa sekama na utu okukayenda! Mena ranao ina na ihe opu va zokukara nenyando tjinene nao.

Ingwi kaamundu omutenga Jesus ngwa pendura movakoke. Omundu omutenga Ombeibela ngu i tamuna omuzandu womuhepundu wotjihuro tjaNain. Kombunda Jesus wina wa pendura Lasarus, omuṱena waMaria na Marta, movakoke. Indu Jesus tji ma honapara otjombara yaMukuru, eye ma kotora ovandu ovengi tjinene mba ṱa komuinyo. Eṱe katu sokunyaṋuka mena rotjiṋa hi?

Lukas 8:40-56; 7:11-17; Johanes 11:17-44.



Omapuriro

  • Ihe yomukazona ngu ri motjiperendero owaṋi, nu omena ratjike eye nomukazendu we tji ve nongendo tjinene nao?
  • Jairus wa tjita tjike indu tja hakaena na Jesus?
  • Pa tjitwa tjike indu Jesus tja ri mondjira okuyenda konganda yaJairus, nu ombuze iṋe Jairus ndja eterwa ngunda a ri mondjira?
  • Omena ratjike ovandu mondjuwo yaJairus tji va yora Jesus?
  • Indu Jesus tja za nokutwara ovaapostele ve vetatu na ihe na ina yomukazona ketuwo ku kwa ri omukazona, eye wa tjita tjike?
  • Oowaṋi varwe Jesus mba pendura movakoke, nu ihi matji raisa tjike?

Omapuriro omaweziwa

  • Lesa Lukas 8:40-56.

    Jesus wa raisa vi otjari noupore komukazendu ngwa verere oruandara, nu ovarumendu ovanene vombongo yOukriste ndino mave yenene okurihongera ko tjike? (Luk. 8:43, 44, 47, 48; Lev. 15:25-27; Mat. 9:12, 13; Kol. 3:12-14)

  • Lesa Lukas 7:11-17.

    Omena ratjike imba mba zepaisa ovasuverwa vawo tji mave yenene okuhuhumiṋwa tjinene i omikambo Jesus mbya toora okuvatera omuhepundu waNain? (Luk. 7:13; 2 Kor. 1:3, 4; Hebr. 4:15)

  • Lesa Johanes 11:17-44.

    Jesus wa raisa vi kutja katjiṋa otjikumise komundu okukara noruhoze mena ronḓiro yomusuverwa? (Joh. 11:33-36, 38; 2 Sam. 18:33; 19:1-4)