Twende kovidio oini

Twende komurya

Ovahongonone vaJehova

Toorora eraka Otjiherero

 OKUHUPA OTJOVAKRISTE

Okuungura pamwe okuzuvarisa momaturiro womaraka pekepeke

Okuungura pamwe okuzuvarisa momaturiro womaraka pekepeke

Popengi ovandu ve raisa onḓero kombuze yOuhona indu tji mave i zuu meraka rawo oveni. Mape ya kutja poPentekoste 33 O.Z., Jehova opa zokutjita kutja “Ovajuda ovapore mba zire komahi pekepeke mouye” ve zuve ombuze ombwa ‘meraka rawo oveni,’ nandarire kutja owo mape ya aave hungire eraka ndaa ri tjiukwa i ovandu avehe, tjimuna Otjiheberi poo Otjigrike. (Oviung 2:5, 8) Motuveze ovandu mu ve hungira omaraka pekepeke ndino, ozombongo zomaraka pekepeke mape ya aze kara noruveze rwomazuvarisiro momaturiro yemwe. Omomuano uṋe ovazuvarise mozombongo nḓo, mu mave yenene okuungura kumwe okuzuvarisira ovandu avehe nawa, nokuhina okuzuvarisa oruveze rumwe momaturiro yemwe, kutja ave ha kurungisa poo okupindikisa ovenionganda?

  • Ningira ondunge: (Omiano 15:22): Ovatarere voviungura vyokuzuvarisa mave sokuhungira kumwe okupaha omuano omusemba wokuzuvarisa ombuze ombwa mbu mau eta ouwa kozombongo azehe. Ozombongo nḓe zuvarisa momaraka warwe tji ze hi nomaturiro omanene okuzuvarisa mo, mape ya aze ha vanga kutja ombongo yeṋu i varure ozonganda nḓe novandu mbe hungira eraka rombongo yawo. Nungwari mape ya ave ha yenene okuzuvarisira ovandu avehe momaturiro weraka rombongo yawo, mena rokutja omaturiro omanene tjinene. Tji pe ri nao, mape ya ave vanga kutja mu zuvarise pozonganda azehe momaturiro ngo, posi yokutja mu sokuvetjivisa indu tji pe nomundu ngwa raisa onḓero. (od-E 93 opar. 37) Poo mape ya ave ningire ombongo yeṋu okuvevatera okupaha ovandu mbe hungira eraka rombongo yawo, nu vozondjuwo nḓu maze yenene okurira orupa romaturiro wawo wokuzuvarisa. (km-E 7/12 5, nokaongo) Yandja ombango kokutja povikando tjiva, mape ya mondjuwo imwe amu kara ovandu mbe hungira omaraka pekepeke. Ozondyero nḓa tjitwa zokuzuvarisa momaturiro, maze sokuraisa onḓuviro koveta ndji tjaera omuano wokuungurisa ondjivisiro ohunga novature.

  • Okuungura kumwe (Ef 4:16): Ṱakamisa omirari ngamwa avihe mbya zu komutarere woviungura vyokuzuvarisa nawa. Hapo ove u rihonga Ombeibela ku nomundu ngu zera eraka rarwe ndi he ri indi rombongo yeṋu? Omuhongwa wOmbeibela ngo, mape ya a yenene okukurisa oupanga we kuna Jehova tjimanga, indu tji we mu yandja komuzuvarise wombongo yarwe ngu hungira eraka re, okurihonga kuna ye Ombeibela.

  • Rirongerisa nawa (Omiano 15:28; 16:1): Indu omunionganda momaturiro mu mu zuvarisa tje hungira eraka rarwe, kondja nomasa okumuzuvarisira ombuze ombwa. Mo sokukondja okutjiwa kutja ovandu momaturiro mu mu zuvarisira ve hungira eraka riṋe, nu u nane Ombeibela meraka rawo morungovi rwetu, nozovidio mokayendjezewa koye komurungu woruveze. Ove wina mo yenene okuungurisa oprograma ndji JW Language okurihonga kutja mo ve korisa vi meraka rawo.