Paulus na Silas va tanga Mukuru neimburiro ngunda ave ri mondeko. (Oviung 16:25) Momayuva wetu, ovakambure ovakwetu va imbura omaimburiro wOuhona ngunda ave ri moSachsenhausen, okamba yovakamburwa moNazi tjEhi rOvandoitji na tji va ri mouhuura moSiberia. Ovihorera mbi vi raisa omuano omaimburiro mu ye yanḓiparisa Ovakriste mbu ve ri momauzeu.

Moruyaveze rwopopezu, omaraka warwe omengi wina maye munu embo ndi ‘Imburireye’ Jehova nondjoroka. Tji twa munu embo ndi, matu yenene okurihonga omaimburiro ngo motjiuru nokuimbura pomerikotameneno weṱunḓu. (Ef 5:19) Okuzambo ombepo ondjapuke mai tu vatere okuyezemburuka indu tji tu ri mouzeu. Omaimburiro wOuhona maye tu vatere kutja tu yandje ombango komaundjiro wetu. Owo maye yenene okutuyanḓiparisa tji tu ri mouzeu. Indu tji tu nenyando momutima, omaimburiro omatunge nga maye tjiti kutja tu ‘imbure’ nondjoroka mena romutima mbu ri mongaro ombwa. (1 Ekuruh 15:16; Eps 33:1-3) Ngatu kondje nomasa okuungurisa nawa omaimburiro wetu wOuhona!

TARERA OKAVIDIO NGA EIMBURIRO NDA YANḒIPARISA OVAUNGURE. TJAZUMBO ZIRA OMAPURIRO NGA:

• Ozongaro zeṋe nḓa hinga Mbuti Frost okutjanga eimburiro?

• Omomuano uṋe eimburiro ndo mu ra yanḓiparisa ovakambure mba ri mokamba yovakamburwa yoSachsenhausen?

• Omozongaro zeṋe zeyuva arihe omaimburiro wOuhona mu maye yenene okukupa omasa?

• Omaimburiro yeṋe wOuhona ngu mo vanga okurihonga motjiuru?