Մատչելիության կարգավորում

Ընտրել լեզուն

Անցնել երկրորդական մենյուին

Անցնել բովանդակությանը

Եհովայի վկաներ

Հայերեն

ԹՈՒՐՔՄԵՆՍՏԱՆ

Ազատազրկված՝ հավատի համար

Ազատազրկված՝ հավատի համար

2015 թ. մարտի 14-ին Թուրքմենաբադի ոստիկանությունը ներխուժեց Բահրամ Հեմդեմովի տուն, որտեղ խաղաղ մթնոլորտում կրոնական հանդիպում էր անցկացվում։ Երեսունութ Վկա ձերբակալվեց ապօրինի կրոնական գործողություն ծավալելու մեղադրանքով։ Ոստիկանները բոլորի նկատմամբ կոպիտ վերաբերմունք դրսևորեցին, 30 Վկայի տուգանեցին և 8 հոգու դատապարտեցին 15 օրվա կալանավորման։ Ավելի ուշ Լեբաբի մարզային դատարանը պրն. Հեմդեմովին դատապարտեց 4 տարվա ազատազրկման։ Ներկայումս նա գտնվում է Սեյդի քաղաքի ուղղիչ-աշխատանքային հիմնարկում։ Եհովայի վկաները շարունակում են միջոցներ ձեռնարկել, որպեսզի նա ազատ արձակվի։

Ձերբակալված է կեղծ մեղադրանքով

32-ամյա Մանսուր Մաշարիպովին, որը Եհովայի վկա է, 2014 թ.-ից հետապնդելուց հետո ոստիկանությունը 2016 թ. հունիսի 30-ին վերցրեց նախնական կալանքի։ Նա մեղադրվում է ոստիկանության աշխատակցին վիրավորելու մեջ, չնայած այն բանին, որ ոստիկաններն են նրա նկատմամբ բռնություն գործադրել։ 2016 թ. օգոստոսի 18-ին Թուրքմենստանի դատարաններից մեկը նրան դատապարտեց մեկ տարվա ազատազրկման ընդհանուր ռեժիմի քրեակատարողական հիմնարկում։ Պրն. Մաշարիպովը բողոքարկել է այդ դատավճիռը։

Խղճի, կրոնի և համոզմունքի ազատության նկատմամբ հարգանքը մնում է խնդրո առարկա

2015 և 2016 թթ.-ին ՄԱԿ-ի Մարդու իրավունքների հանձնաժողովը (CCPR) ինը որոշում կայացրեց հօգուտ դաժան պայմաններում ազատազրկված Վկա խղճի կալանավորների։ Ներկայումս Թուրքմենստանը չի ազատազրկում համոզմունքի հիմնավորմամբ զինծառայությունից հրաժարվողներին։

Երկու այլ Վկաներ, որոնց կրոնական գործունեությունը սահմանափակելու նպատակով ազատազրկել էին կեղծ մեղադրանքների հիմքով, նույնպես բողոք են ներկայացրել CCPR։ Այս մարմինը Թուրքմենստանում մարդու իրավունքների իրավիճակի վերաբերյալ 2012 թ.ապրիլի իր զեկույցում կոչ է արել կառավարությանը «հավաստիանալ, որ կրոնական կազմակերպությունների մասին իր օրենսդրությունը և պրակտիկան ճանաչում են մարդու կրոնական համոզմունքները անարգել դավանելու և արտահայտելու իրավունքները, ինչպես սահմանված է [Քաղաքացիական ու քաղաքական իրավունքների մասին միջազգային դաշնագրով]»։ 2008 թ.-ին Վկաները դիմել էին գրանցման համար, սակայն կառավարությունը մերժել էր դիմումը։

Բարելավման հեռանկար

Եհովայի վկաները ուրախ են, որ Թուրքմենստանի կառավարությունը նախկինում ազատ է արձակել իրենց հավատակիցներին՝ անարդարությունը շտկելու համար։ * Նրանք ակնկալում են, որ կառավարությունը դրական կարձագանքի CCPR-ի կայացրած որոշումներին՝ ավելի մեծ հարգանք ցուցաբերելով մարդու իրավունքների, հատկապես խղճի, կրոնի, համոզմունքի ազատության նկատմամբ։ Վկաներին ներկայացնող փաստաբանը ասում է. «Եհովայի վկաները հույս ունեն, որ կառուցողական երկխոսությունը կարող է լուծել Թուրքմենստանի կառավարությանը մտահոգող հարցերը այնպես, որ Վկաները հնարավորություն ունենան պահելու իրենց մաքուր խիղճը և հանդարտ կյանք վարելու Աստծու հանդեպ ամենայն նվիրվածությամբ»։

Ժամանակագրություն

  1. Օգոստոսի 18, 2016

    Մանսուր Մաշարիպովը կեղծ մեղադրանքով դատապարտվեց մեկ տարված ազատազրկման։

  2. Հուլիս, 2016

    CCPR-ը հինգ որոշում կայացրեց հօգուտ Վկա խղճի կալանավորների։

  3. Դեկտեմբերի 14, 2015

    CCPR-ը որոշումներ կայացրեց հօգուտ երեք Վկա խղճի կալանավորների։ Մեկ ուրիշ որոշում կայացվել էր 2015 թ. մայիսի 19-ին։

  4. Մայիսի 19, 2015

    Բահրամ Հեմդեմովը մեղադրվեց կրոնական գործունեություն ծավալելու մեջ և դատապարտվեց չորս տարվա ազատազրկման։ Դրանից երկու ամիս առաջ նրան ձերբակալել ու նախնական կալանքի մեջ էին պահել։

  5. Փետրվար/Մարտ, 2015

    Համոզմունքի հիմնավորմամբ զինծառայությունից հրաժարվելու համար բանտարկված երկու Վկաներ ազատ են արձակվել։

  6. Նոյեմբերի 18, 2014

    Համոզմունքի հիմնավորմամբ զինծառայությունից հրաժարվելու համար բանտարկվել են 2 Վկաներ։

  7. Հոկտեմբերի 22, 2014

    Թուրքմենստանի նախագահը համաներում է շնորհել ազատազրկված 8 Եհովայի վկաների և ազատ է արձակել նրանց։

  8. Սեպտեմբերի 30, 2014

    9 Վկաներ ազատազրկված են, որոնցից 7-ը՝ համոզմունքի հիմնավորմամբ զինծառայությունից հրաժարվելու համար, իսկ 2-ը՝ կեղծ մեղադրանքներով՝ որպես իրենց կրոնական գործունեության համար պատիժ։

  9. Սեպտեմբերի 2, 2014

    Թուրքմենստանի իշխանությունները ազատ են արձակում Բիբի Ռահմանովային և 4 տարվա ազատազրկումը փոխում տնային կալանքով։

  10. Օգոստոսի 18, 2014

    Բիբի Ռահմանովան կեղծ մեղադրանքների հիմքով դատապարտվում է 4 տարվա ազատազրկման։

  11. Հուլիսի 25, 2014

    7 Վկաներ ազատազրկված են, որոնցից 5-ը՝ համոզմունքի հիմնավորմամբ զինծառայությունից հրաժարվելու համար, իսկ 2-ը՝ կեղծ մեղադրանքներով՝ որպես իրենց կրոնական գործունեության համար պատիժ։

  12. Ապրիլի 6, 2014

    26 Վկաներ կալանավորված են, որոնցից 13-ը ձերբակալվել են առանց հանցագործություն կատարելու որևէ ապացույցի։ Մյուս 13-ի նկատմամբ նշանակվել է տուգանք։

  13. Նոյեմբեր, 2013

    9 Եհովայի վկաները դեռ բանտում են, որոնցից 8-ը՝ համոզմունքի հիմնավորմամբ զինծառայությունից հրաժարվելու համար, իսկ 1-ը՝ կեղծ մեղադրանքներով՝ որպես իրենց կրոնական գործունեության համար պատիժ։

  14. Օգոստոսի 29, 2013

    3 Վկաներ բողոք են ուղարկում CCPR ընդդեմ Թուրքմենստանի վերջինիս կողմից համոզմունքի հիմնավորմամբ զինծառայությունից հրաժարվելու իրավունքը չճանաչելու համար։

  15. Մայիսի 1, 2013

    2 Վկաներ բողոք են ուղարկում CCPR ընդդեմ Թուրքմենստանի վերջինիս կողմից համոզմունքի հիմնավորմամբ զինծառայությունից հրաժարվելու իրավունքը չճանաչելու համար։

  16. Հունվարի 24, 2013

    30 ոստիկաններ խուզարկում են Նավրուզ Նասիրլաևի տունը CCPR-ի կողմից Թուրքմենստանի կառավարությանը բողոքների վերաբերյալ ծանուցելուց 3 շաբաթ անց։ Ոստիկանությունը բազմիցս ծեծի է ենթարկել այդ ընտանիքին և այդ ժամանակ նրանց տանը եղող հյուրերին։

  17. Սեպտեմբերի 7, 2012

    10 Վկաներ բողոք են ուղարկում CCPR ընդդեմ Թուրքմենստանի վերջինիս կողմից համոզմունքի հիմնավորմամբ զինծառայությունից հրաժարվելու իրավունքը չճանաչելու համար։ Նավրուզ Նասիրլաևը հանդիսանում է հիմնական դիմումատուն։

  18. Օգոստոսի 21, 2008

    Եհովայի վկաները դիմում են Թուրքմենստանի կառավարությանը պետական գրանցում ստանալու համար։