Մատչելիության կարգավորում

Ընտրել լեզուն

Անցնել երկրորդական մենյուին

Անցնել բովանդակությանը

Եհովայի վկաներ

Հայերեն

ՀՈԿՏԵՄԲԵՐԻ 19, 2016
ԷՐԻԹՐԵԱ

Էրիթրեայում Եհովայի վկաների նկատմամբ հալածանքը ներկայացվել է միջազգային հանրությանը աննախադեպ մասշտաբով

Էրիթրեայում Եհովայի վկաների նկատմամբ հալածանքը ներկայացվել է միջազգային հանրությանը աննախադեպ մասշտաբով

Ուրիշ ոչ մի երկրում Եհովայի վկաները այնքան սաստիկ հալածանքի չեն ենթարկվում, որքան Էրիթրեայում։ Այն բանից հետո, երբ 1993 թ.-ին Էրիթրեան անկախություն ձեռք բերեց, իշխանությունները շարունակ բանտարկում են Վկաներին, խոշտանգումների ենթարկում և մեկուսացնում են հասարակությունից։ Վերջիններս հալածվում են այն պատճառով, որ քաղաքական հարցերում չեզոք են մնում և հրաժարվում են իրենց մերձավորի դեմ զենք բարձրացնելուց։

Ներկայումս Էրիթրեայում բանտարկված է հիսունչորս Եհովայի վկա։ Անցած 22 տարիների ընթացքում բոլոր Վկաներին, բացի մեկից, ազատազրկել են՝ առանց մեղադրանք առաջադրելու կամ դատաքննության։ 1994 թ.-ից երեք հոգի բանտում է խղճի հիմնավորմամբ զինծառայությունից հրաժարվելու համար։

Միջազգային հանրության անհանգստությունն աճում է

Հալածանքը սկսվելուց ի վեր իրավապաշտպան կազմակերպություններն ու պետական կառույցները դատապարտել են Էրիթրեայում Եհովայի վկաների հանդեպ իրականացվող խոշտանգումները։ Սակայն վերջերս Էրիթրեայում մարդու իրավունքների խախտումները հետաքննող հանձնաժողովը, որը ՄԱԿ-ի կողմից լիազորված մարմին է, Վկաների իրավիճակը միջազգային հանրությանն է ներկայացրել աննախադեպ մասշտաբով։ 2015 թ. հունիսին ՄԱԿ-ի Մարդու իրավունքների խորհրդին (ՄԻԽ) ներկայացրած իր առաջին հաշվետվության մեջ Էրիթրեայում մարդու իրավունքների խախտումները հետաքննող հանձնաժողովը մի ամբողջ բաժին է նվիրել Եհովայի վկաների հանդեպ դրսևորվող խտրական և դաժան վերաբերմունքին։

2016 թ. հունիսի 21-ին Հանձնաժողովը Մարդու իրավունքների խորհրդին ներկայացրեց իր երկրորդ մանրամասն հաշվետվությունը։ Հանձնաժողովը Էրիթրեայի իշխանություններին հորդորեց «հարգել կրոնի կամ համոզմունքի ազատությունը» և «դադարել կրոնական համոզմունքների պատճառով մարդկանց կամայականորեն ձերբակալելուց և կալանքի տակ պահելուց, մասնավորապես կոնկրետ կրոնական խմբերի հետևորդներին, ինչպիսիք են, օրինակ, Եհովայի վկաները.... և անմիջապես ու առանց որևէ պայմանի ազատ արձակել բոլոր նրանց, ովքեր ապօրինաբար և կամայականորեն ազատազրկված են»։

Մարդու իրավունքների խախտումները հետաքննող հանձնաժողովը եկել է այն եզրակացության, որ Էրիթրեայի կողմից իրականացվող «թե՛ կրոնական, թե՛ էթնիկական հիմքով հալածանքը» հակասում է միջազգային իրավունքի նորմերին և «մարդկության դեմ հանցանք» է։ Միջազգային հանրությունը այս հալածանքը համարում է մարդու իրավունքների խախտման ծանրագույն դրսևորումներից մեկը։ Հանձնաժողովը վերջին տվյալները բանավոր կներկայացնի ՄԱԿ-ի Գլխավոր ասամբլեային 2016 թ. հոկտեմբերի 27-ին։

Արդյոք Էրիթրեան կփոխի՞ Վկաների դեմ իր անարդար վերաբերմունքը

Եհովայի վկաների միջազգային հանրությունը խորապես անհանգստացած է Էրիթրեայում բնակվող հավատակիցների համար։ Նրանք Էրիթրեայի իշխանություններին կոչ են անում դադարել այդ անկեղծ քրիստոնյաներին հալածելուց և թույլ տալ նրանց օգտվել իրենց հիմնարար և անքակտելի իրավունքներից։

 

Իմացիր ավելին

Ինչո՞ւ են Եհովայի վկաները քաղաքականապես չեզոք

Եհովայի վկաները իրենց չեզոքությամբ սպառնալի՞ք են երկրի անվտանգությանը։

Ինչո՞ւ Եհովայի վկաները բանակ չեն գնում

Բոլորը գիտեն, որ Եհովայի վկաները բանակ չեն գնում։ Իմացիր, թե որն է մեր դիրքորոշման հիմքը։