Մատչելիության կարգավորում

Ընտրել լեզուն

Անցնել երկրորդական մենյուին

Անցնել ցանկին

Անցնել բովանդակությանը

Եհովայի վկաներ

Հայերեն

«Աստվածաշնչի պատմությունների իմ ժողովածուն»

Պատմություն 8: Հսկաներ երկրի վրա

Պատմություն 8: Հսկաներ երկրի վրա

Եթե քայլելով դեպի քեզ մոտենար հասակը մինչև ձեր տան առաստաղը հասնող մի մարդ, դու ի՞նչ կմտածեիր։ «Իսկական հսկա է»,— մտքումդ կասեիր դու։ Մի ժամանակ երկրի վրա իսկապես ապրում էին հսկաներ։ Աստվածաշունչը բացատրում է, որ նրանց հայրերը երկնքից եկած հրեշտակներն էին։ Բայց ինչպե՞ս կարող էր դա պատահել։

Դաժան հսկաներ

Հիշիր, որ Սատանան՝ չար հրեշտակը, մշտապես վնասում էր մյուսներին։ Նա փորձում էր անգամ Աստծու հրեշտակներին չար դարձնել։ Ժամանակի ընթացքում այդ հրեշտակների որոշ մասն անցավ Սատանայի կողմը։ Նրանք դադարեցին կատարել այն գործը, որն Աստված հանձնարարել էր իրենց երկնքում։ Նրանք, երկիր իջնելով, մարդկային մարմիններ հագան։ Իսկ գիտե՞ս, թե ինչո՛ւ։

Աստվածաշունչը հայտնում է պատճառը. Աստծու որդիները տեսան երկրի վրա բնակվող գեղեցիկ կանանց ու ցանկացան ապրել նրանց հետ։ Դրա համար էլ նրանք երկիր իջան ու ամուսնացան այդ կանանց հետ։ Աստվածաշնչում ասվում է, որ դա սխալ արարք էր, քանի որ Աստված հրեշտակներին ստեղծել էր երկնքո՛ւմ ապրելու համար։

Երբ այդ հրեշտակներից ու կանանցից երեխաներ ծնվեցին, նրանք բոլորովին նման չէին մյուս երեխաներին։ Հնարավոր է, որ սկզբում այդ տարբերությունը շատ աչքի չի զարնել։ Բայց նրանք աստիճանաբար մեծացան և ավելի ու ավելի հզորացան՝ դառնալով հսկաներ։

Այդ հսկաները չար էին, ու քանի որ չափազանց մեծ էին և ուժեղ, ուստի կարող էին վնաս հասցնել մարդկանց։ Նրանք ուժ էին գործադրում յուրաքանչյուրի վրա, որպեսզի իրենց նման չար դարձնեին։

Ենովքն արդեն մահացել էր, բայց երկրի վրա այդ ժամանակ մի բարի մարդ էր ապրում։ Նրա անունն էր Նոյ։ Նա միշտ վարվում էր այնպես, ինչպես որ Աստված էր կամենում։

Մի օր Աստված հայտնեց Նոյին, որ ժամանակը եկել է բոլոր չար մարդկանց վերացնելու։ Բայց Նոյին, նրա ընտանիքին և շատ կենդանիների Աստված ուզում էր փրկել։ Տեսնենք, թե Աստված ինչպես դա արեց։

Ծննդոց 6։1-8; Յուդա 6։



Հարցեր

  • Ի՞նչ տեղի ունեցավ, երբ Աստծու հրեշտակներից ոմանք լսեցին Սատանային։
  • Ինչո՞ւ որոշ հրեշտակներ թողեցին իրենց երկնային գործը և իջան երկիր։
  • Այն, որ հրեշտակները երկիր իջան և մարդկային մարմիններ հագան, ինչո՞ւ էր սխալ։
  • Ինչո՞վ էին հրեշտակների երեխաները տարբերվում մարդկանց երեխաներից։
  • Ինչպես տեսնում ես նկարում, ի՞նչ էին անում հրեշտակների երեխաները, երբ մեծանալով դառնում էին հսկաներ։
  • Ենովքից հետո ո՞վ էր այն բարի մարդը, որն ապրեց երկրի վրա, և Աստված ինչո՞ւ էր սիրում նրան։

Լրացուցիչ հարցեր

  • Կարդա՛ Ծննդոց 6։1-8 համարները։

    Ծննդոց 6։6 համարն ի՞նչ է հայտնում այն մասին, թե մեր վարքագիծը ինչպես կարող է ազդել Եհովայի զգացմունքների վրա (Սաղ. 78։40, 41; Առակ. 27։11)։

  • Կարդա՛ Յուդա 6 համարը։

    Այն հրեշտակները, «որ իրանց իշխանութիւնը չ’պահեցին» Նոյի օրերում, ինչպե՞ս են որպես հիշեցում ծառայում մեզ համար այսօր (Ա Կորնթ. 3։5-9; Բ Պետ. 2։4, 9, 10)։