Ինչպես ավելի վաղ՝ 2025 թ. հունվարին, տեղեկացվել էր jw.org կայքում, եղբայր Վիտալի Կրյուշենկոն առաջին Եհովայի վկան է, ով Ուկրաինայում պատերազմի բռնկումից ի վեր բանտարկվել է համոզմունքի հիմնավորմամբ զինծառայությունից հրաժարվելու համար։ Դրանից հետո Ուկրաինայի կառավարությունը ևս վեց եղբայրների է բանտարկել զինծառայությունից հրաժարվելու համար։

2025 թ. փետրվարի 3-ին 50-ամյա Անդրի Խոմենկոն դատապարտվեց երեք տարվա ազատազրկման։ Նա և իր կինը՝ Իրինան, ունեն երկու որդի։ Իր ազատազրկումից կարճ ժամանակ առաջ Անդրին ասաց. «Վստահ եմ, որ նույնիսկ ամենավատ հանգամանքներում Եհովան ինձ հետ կլինի և ներքին խաղաղություն կտա»։

Դրանից ընդամենը մեկ շաբաթ անց՝ 2025 թ. փետրվարի 11-ին, ազատազրկվեց 48-ամյա Սերխի Իվանուշչենկոն։ Նա կալանավայրում երեք տարի կկրի իր պատիժը։ 2023 թ. նոյեմբերին մկրտվելուց մի քանի ամիս անց Սերխին զորակոչի ծանուցագիր էր ստացել։ Համոզված լինելով, որ Աստծու ծառաները այլևս չպետք է «սովորեն պատերազմել»՝ նա ներկայացել էր զորակոչային հանձնաժողովին և հարգալից կերպով հրաժարվել զինվորական ծառայությունից (Եսայիա 2:4)։

Այնուհետև՝ 2025 թ. մարտի 5-ին, իշխանությունները բանտարկեցին 35-ամյա եղբայր Սերխի Նեչայուկին, որն ամուսնացած է և ունի երկու երեխա։ Եղբայրը դատապարտվել է երեք տարվա ազատազրկման։ Իր ազատազրկումից առաջ Սերխին ասաց. «Իմանալով, որ եղբայրներս ու քույրերս անկեղծորեն աղոթում են ինձ համար, զգում եմ, որ մենակ չեմ։ Ինձ հետ է նաև Եհովան»։

Ի հավելումն այս դեպքերի՝ 2025 թ. հունվարից մարտ ընկած ժամանակահատվածում զինվորները Միխայլո Ադամովիչին (40 տարեկան), Յարոսլավ Բոդնարչուկին (28 տարեկան) և Օլեքսանդր Ռադաշկոյին (35 տարեկան) բռնի տեղափոխեցին ռազմաբազա, ինչը, ըստ ուկրաինական օրենսդրության, փաստացի նշանակում է զինվորական ծառայության սկիզբ։ Երբ այս եղբայրները համոզմունքի հիմնավորմամբ հրաժարվեցին զինվորական համազգեստ հագնել կամ զենք վերցնել, նրանք, ըստ զինվորական կանոնադրության, մեղադրվեցին հրաման չկատարելու մեջ և կալանավորվեցին։ Միխայլոն և Օլեքսանդրը գտնվում են նախնական կալանքի կենտրոնում և սպասում են իրենց դատավարությանը։ Իսկ Յարոսլավին ազատ են արձակել գրավի դիմաց։ Եթե եղբայրները մեղավոր ճանաչվեն, նրանցից յուրաքանչյուրը կարող է դատապարտվել հինգից տասը տարվա ազատազրկման։

Իշխանությունների այս գործողությունները հակասում են միջազգային և ուկրաինական օրենքներին։ Օրինակ՝ Մարդու իրավունքների համընդհանուր հռչակագրի 18-րդ հոդվածը և Մարդու իրավունքների եվրոպական կոնվենցիայի 9-րդ հոդվածը պաշտպանում են անհատի՝ այլընտրանքային քաղաքացիական ծառայություն կատարելու իրավունքը։ Ուկրաինայի կառավարությունը համաձայնել է հետևել միջազգային այդ նորմերին։ Զինծառայություն կատարելու փոխարեն այլընտրանքային (ոչ զինվորական) ծառայություն կատարելու իրավունքը երաշխավորված է նաև Ուկրաինայի Սահմանադրությամբ։

Մեր համաշխարհային ընտանիքը աղոթում է, որ Եհովան շարունակի մխիթարել ու պաշտպանել այս եղբայրներին և բոլոր նրանց, ովքեր ջանադրաբար ձգտում են հավատարիմ մնալ իրեն (Սաղմոս 34:7)։