1 Սամուել 21։1-15
21 Դավիթը գնաց Նոբ՝+ Աքիմելեք քահանայի մոտ: Աքիմելեքը, նրան տեսնելով, վախեցավ ու հարցրեց. «Ինչո՞ւ ես մենակ, ինչո՞ւ ոչ ոք չկա քեզ հետ»:+
2 Դավիթն էլ պատասխանեց. «Թագավորը ինձ մի հանձնարարություն է տվել ու ասել. «Թող ոչ ոք չիմանա, թե ինչ առաքելությամբ եմ քեզ ուղարկում և թե ինչ հրահանգներ եմ տվել»: Ես իմ մարդկանց հետ հանդիպելու եմ մեր պայմանավորված տեղում:
3 Հիմա խնդրում եմ, ինձ հինգ հաց տուր, եթե ունես, կամ ուտելու ցանկացած այլ բան»:
4 Բայց քահանան ասաց Դավթին. «Ձեռքիս տակ սովորական հաց չունեմ, միայն սուրբ հաց կա:+ Կտամ, եթե քո մարդիկ հեռու են մնացել կանանցից»:*+
5 Դավիթն էլ պատասխանեց քահանային. «Վստահեցնում եմ քեզ, որ կանանցից հեռու ենք մնացել,+ ինչպես այն ժամանակ, երբ ռազմարշավների էինք գնում: Եթե իմ մարդիկ նույնիսկ սովորական հանձնարարություն կատարելիս են իրենց մարմինները սուրբ պահել, առավել ևս այսօր նրանք սուրբ են»:
6 Ուստի քահանան նրան տվեց սուրբ հացերը,+ քանի որ ուրիշ հաց չկար՝ բացի Եհովայի առաջ դրվող հացերից, որոնք այդ օրը փոխարինել էին թարմ հացերով:
7 Այդ օրը Սավուղի ծառաներից մեկը, որը պետք է մնար* Եհովայի առաջ, այնտեղ էր: Նա մի եդոմացի էր՝+ Դովեկ+ անունով, և Սավուղի հովիվների գլխավորն էր:
8 Դավիթը հարցրեց Աքիմելեքին. «Այստեղ նիզակ կամ սուր ունե՞ս: Թագավորի տված հանձնարարությունն այնքան հրատապ էր, որ սուրս կամ որևէ այլ զենք չհասցրի վերցնել»:
9 Քահանան պատասխանեց. «Փղշտացի Գողիաթի+ սուրը, որին սպանեցիր Էլայի հովտում,+ այստեղ է՝ եփուդի*+ հետևում՝ շորով փաթաթված: Եթե ուզում ես դա վերցնել, վերցրու, որովհետև ուրիշը չկա»: Դավիթն էլ ասաց. «Դրա նմանը չկա: Տուր ինձ դա»:
10 Այդ օրը Դավիթը այնտեղից հեռացավ՝ շարունակելով փախչել+ Սավուղից: Ի վերջո նա եկավ Գեթի թագավորի՝ Անքուսի մոտ:+
11 Անքուսի ծառաներն ասացին նրան. «Սա Դավիթը չէ՞՝ այն երկրի թագավորը: Նրա մասին չէի՞ն պարելով երգում.
«Սավուղը հազարավորների կոտորեց,Իսկ Դավիթը՝ տասնյակ հազարավորների»»:+
12 Այդ խոսքերը մտածելու տեղիք տվեցին Դավթին, և նա շատ վախեցավ+ Անքուսից՝ Գեթի թագավորից:
13 Ուստի ձևացրեց, թե խելքը թռցրել է,+ և իրեն խելագարի պես պահեց նրանց ներկայությամբ.* նա դարպասի դռների վրա նշաններ էր գծում և թուքը ծորեցնում էր իր մորուքի վրա:
14 Անքուսն ասաց իր ծառաներին. «Տեսնում եք, որ սա խելագար է. ինչո՞ւ եք ինձ մոտ բերել:
15 Ի՞նչ է, ես խելագարների պակա՞ս ունեմ, որ սրան բերել եք ինձ մոտ, ու իմ առաջ խելացնոր բաներ է անում: Սա իմ տո՞ւն պետք է մտնի»:
Ծանոթագրություններ
^ Կամ՝ «կանանց հետ հարաբերություն չեն ունեցել»:
^ Հնարավոր է՝ երդման կամ անմաքրության պատճառով:
^ Գոգնոցանման հագուստ՝ բաղկացած առջևի և հետևի մասերից:
^ Բռց.՝ «նրանց ձեռքում»:
