1 Սամուել 2։1-36
2 Աննան աղոթեց՝ ասելով.
«Սիրտս Եհովայով ցնծում է:+
Եհովան զորացրել է ինձ:*
Քաջաբար պատասխան եմ տալիս թշնամիներիս,*Ուրախանում եմ քո տված փրկությամբ:
2 Եհովայի նման սուրբ չկա,Քեզ նման ուրիշը չկա,+Մեր Աստծու նման վեմ չկա:+
3 Մեծամտորեն մի՛ խոսեք,Թող ձեր բերանից հանդուգն խոսքեր դուրս չգան,Որովհետև Եհովան ամեն ինչ իմացող Աստված է,+Եվ բոլորի գործերը նա արդարությամբ է կշռում:
4 Զորավորների աղեղները կոտրվեցին,Բայց թույլերին զորություն տրվեց:+
5 Նրանք, ովքեր կուշտ էին, մի կտոր հաց վաստակելու համար ստիպված են վարձու աշխատող դառնալ,Իսկ ովքեր սոված էին, այլևս սովի մատնված չեն:+
Ամուլը յոթ որդի է ծնել,+Իսկ շատ որդիներ ունեցողը մենակ է մնացել:*
6 Եհովան կարող է կյանքից զրկել ու պահպանել կյանքը,*Գերեզման* իջեցնել ու այնտեղից դուրս բերել:+
7 Եհովան կարող է աղքատացնել ու հարստացնել,+Նվաստացնել ու բարձրացնել:+
8 Նա խեղճին բարձրացնում է փոշու միջից,Աղքատին հանում է մոխրակույտից,*+Որ իշխանների հետ նստեցնի՝ պատվավոր տեղ տալով:
Եհովան է դրել երկրի հիմքերը,+Նա երկիրը դրանց վրա է հաստատել:
9 Իրեն նվիրվածների ճանապարհները նա պահպանում է,+Իսկ չարագործները կլռեցվեն խավարի մեջ,+Քանի որ մարդն իր ուժով չէ, որ հաղթում է:+
10 Եհովան կկործանի իր դեմ դուրս եկողներին,*+Նա երկնքից կորոտա նրանց վրա:+
Եհովան կդատի ողջ երկիրը,+Նա ուժ կտա իր թագավորին+Եվ կզորացնի իր օծյալին»:*+
11 Եղկանան գնաց իր տուն՝ Ռամա, իսկ տղան մնաց Հեղի քահանայի մոտ ու սկսեց ծառայել Եհովային:+
12 Հեղիի որդիները չար մարդիկ էին.+ նրանք հարգանք չունեին Եհովայի հանդեպ:
13 Նրանք ժողովրդի բերած զոհերից վերցնում էին ոչ թե քահանային հասանելիք բաժինը,+ այլ այսպես էին վարվում. ամեն անգամ, երբ ինչ-որ մեկը զոհ էր մատուցում, միսը եփվելու ժամանակ քահանայի սպասավորը, եռաժանի մեծ պատառաքաղը ձեռքին, գալիս էր,
14 այն մտցնում էր թասի, կաթսայի, պղնձակի կամ կճուճի մեջ, և ինչ էլ որ պատառաքաղը հանում էր, քահանան իրեն էր վերցնում: Նրանք այդպես էին վարվում այն բոլոր իսրայելացիների հետ, որոնք գալիս էին Սելով:
15 Նույնիսկ նախքան ճարպն այրելը+ քահանայի սպասավորը գալիս էր ու զոհ մատուցողին ասում. «Քահանայի համար խորովելու մի՛ս տուր: Քեզնից նա եփած միս չի վերցնի, այլ միայն հում միս»:
16 Երբ այդ մարդն ասում էր նրան՝ «Նախ թող ճարպն այրեն,+ հետո նոր կվերցնես սրտիդ ուզածը», նա պատասխանում էր. «Ո՛չ, հիմա՛ տուր, թե չէ ուժով կվերցնեմ»:
17 Այս սպասավորների մեղքը շատ մեծ էր Եհովայի աչքին,+ քանի որ նրանք* անհարգալից վերաբերմունք ունեին Եհովային մատուցվող ընծաների նկատմամբ:
18 Սամուելը թեև մանուկ էր,+ բայց կտավե եփուդը* հագին՝*+ ծառայություն էր անում Եհովայի առաջ:
19 Նրա մայրը ամեն տարի անթև փոքր վերնահագուստ էր կարում նրա համար և, երբ ինքն ու ամուսինը գալիս էին տարեկան զոհը մատուցելու, բերում էր իր հետ:+
20 Հեղին, Եղկանային ու նրա կնոջը օրհնելով, ասաց. «Թող Եհովան այս կնոջից քեզ զավակ պարգևի ձեր որդու փոխարեն, որ տվել եք Եհովային»:+ Եվ նրանք տուն վերադարձան:
21 Եհովան ուշադրություն դարձրեց Աննային,+ և նա ուրիշ երեխաներ էլ ունեցավ՝ երեք տղա ու երկու աղջիկ: Իսկ մանուկ Սամուելը մեծանում էր Եհովայի մոտ:*+
22 Հեղին շատ ծեր էր: Նա լսել էր այն մասին, թե իր որդիներն ինչպես էին վարվում ողջ Իսրայելի հետ,+ նաև այն մասին, որ նրանք հարաբերություն էին ունենում հանդիպման վրանի մուտքի մոտ ծառայող կանանց հետ:+
23 Նա ասում էր նրանց. «Ինչո՞ւ եք այդպիսի բաներ անում: Բոլոր մարդկանցից ձեր մասին վատ բաներ եմ լսում:
24 Այդպիսի բաներ մի՛ արեք, որդինե՛րս: Եհովայի ժողովրդի մեջ ձեր մասին վատ լուրեր են պտտվում:
25 Եթե մարդը մեկ ուրիշ մարդու դեմ մեղք գործի, ինչ-որ մեկը կարող է նրա համար խնդրել Եհովային, բայց եթե մարդը Եհովայի դեմ մեղք գործի,+ ապա ո՞վ կարող է աղոթել նրա համար»: Սակայն նրանք չէին ուզում լսել իրենց հորը. Եհովան վճռել էր մահվան մատնել նրանց:+
26 Այդ ընթացքում մանուկ Սամուելը մեծանում էր և ավելի հաճելի էր դառնում թե՛ Եհովայի, թե՛ մարդկանց համար:+
27 Մի օր Աստծուց մի մարդ եկավ Հեղիի մոտ ու նրան ասաց. «Ահա թե ինչ է ասում Եհովան. «Մի՞թե ես քո նախահորն ու նրա ընտանիքին հստակ հայտնի չդարձրի իմ ով լինելը, երբ նրանք Եգիպտոսում փարավոնի* ստրուկներն էին:+
28 Իսրայելի բոլոր տոհմերից ես նրան ընտրեցի,+ որ ինձ համար որպես քահանա ծառայի և իմ զոհասեղանի վրա զոհ մատուցի,+ խունկ ծխեցնի* ու եփուդ կրի իմ առջև: Իսրայելացիների* բոլոր հրկիզվող ընծաները ես քո նախահորն ու նրա սերունդներին տվեցի:+
29 Ինչո՞ւ եք արհամարհում իմ զոհն ու ընծան, որոնք ես պատվիրեցի մատուցել իմ բնակավայրում:+ Ինչո՞ւ ես քո որդիներին ավելի շատ պատվում, քան ինձ, և ինչո՞ւ եք ինքներդ ձեզ գիրացնում իմ ժողովրդի՝ Իսրայելի ընծայած կենդանիների լավագույն կտորներով:+
30 Դրա համար էլ ես՝ Եհովաս՝ Իսրայելի Աստվածը, ասում եմ. «Թեև ես ասել եմ, որ քո տունը և քո նախահոր տունը միշտ իմ առջև են քայլելու,+ բայց հիմա ես՝ Եհովաս, ասում եմ, որ այդպես այլևս չի լինի, որովհետև ես կպատվեմ նրանց, ովքեր պատվում են ինձ,+ իսկ ովքեր արհամարհում են ինձ, արհամարհված կլինեն»:
31 Օրեր են գալիս, երբ քեզ ու քո նախահոր տունը կզրկեմ ուժից,* և քո տան մեջ չի լինի մեկը, ով կապրի մինչև ծերություն:+
32 Ես Իսրայելին բարիք կանեմ, մինչդեռ դու թշնամի կտեսնես իմ բնակավայրում,+ և քո տանը այլևս ծեր չի լինի:
33 Բայց քո սերնդից մեկին* ես չեմ զրկի իմ զոհասեղանի մոտ ծառայություն մատուցելու հնարավորությունից: Նրա պատճառով քո աչքերը կնվաղեն, և հոգիդ հալումաշ կլինի: Իսկ քո տան անդամների մեծ մասը սրից կընկնի:+
34 Եվ քեզ համար իմ խոսքերը հաստատող նշան կլինի այն, ինչ կպատահի քո երկու որդիներին՝ Օֆնիին ու Փենեհեսին. մեկ օրվա մեջ երկուսն էլ կմեռնեն:+
35 Իսկ ես ինձ համար մի հավատարիմ քահանա կընտրեմ:+ Նա կկատարի իմ սրտի ցանկությունը:* Ես նրա համար մի մնայուն տուն* կկառուցեմ, և նա միշտ իմ օծյալի առաջ որպես քահանա կծառայի:
36 Ով էլ քո տնից մնա, կգա ու կխոնարհվի նրա առաջ՝ աշխատանք ու հաց խնդրելով, և կասի. «Խնդրում եմ, ինձ քահանա նշանակիր, որ մի կտոր հաց ունենամ ուտելու»»»:+
Ծանոթագրություններ
^ Բռց.՝ «Բերանս լայն բացում եմ թշնամիներիս դեմ»:
^ Բռց.՝ «ցամաքել է»:
^ Կամ՝ «կյանքի բերել»:
^ Եբր.՝ շեոլ: Բառարանում տես «Գերեզման»:
^ Կամ հնարավոր է՝ «աղբանոցից»:
^ Կամ հնարավոր է՝ «Եհովայի հետ վիճողները սարսափահար կլինեն»:
^ Խոսքը, հավանաբար, Հեղիի երկու որդիների մասին է, հնարավոր է՝ նաև սպասավորների:
^ Գոգնոցանման հագուստ՝ բաղկացած առջևի և հետևի մասերից:
^ Բռց.՝ «եփուդով գոտևորված»:
^ Կամ՝ «Եհովայի առաջ»: Այսինքն՝ Եհովայի սրբարանում:
^ Բռց.՝ «փարավոնի տանը»:
^ Բռց.՝ «Իսրայելի որդիների»:
^ Կամ հնարավոր է՝ «զոհերի ծուխը վեր բարձրացնի»:
^ Բռց.՝ «կկտրեմ բազուկը»:
^ Կարող է վերաբերել նաև մեկից ավելի մարդկանց:
^ Կամ՝ «այն, ինչ կա իմ սրտում ու հոգում»:
^ Խոսքը քահանայական սերնդի մասին է:
