Ծննդոց 6։1-22
6 Երբ մարդիկ շատացան երկրի վրա և աղջիկներ ունեցան,
2 ճշմարիտ Աստծու որդիները*+ սկսեցին նկատել, որ մարդկանց աղջիկները գեղեցիկ են, և սկսեցին կնության առնել բոլոր նրանց, ում ընտրում էին:
3 Եհովան ասաց. «Ես* անվերջ չեմ հանդուրժի մարդուն,+ քանի որ նա մեղսագործ է:* Նրան կմնա 120 տարի»:*+
4 Այդ օրերում և դրանից հետո երկրի վրա հսկաներ* կային, քանի որ ճշմարիտ Աստծու որդիները հարաբերություն էին ունենում մարդկանց աղջիկների հետ, և նրանք որդիներ էին ծնում նրանց համար: Այդ հսկա որդիները վաղեմի ժամանակների զորավոր և անվանի մարդիկ էին:
5 Եհովան տեսավ, որ մեծ է մարդկանց չարությունը, և որ նրանց մտքերն ու սրտի ցանկությունները միշտ հակված են միայն դեպի չարը:+
6 Ուստի Եհովան ափսոսաց,* որ երկրի վրա ստեղծել է մարդուն, և նրա սիրտը տխրությամբ լցվեց:*+
7 Եհովան ասաց. «Ես երկրի երեսից բնաջինջ եմ անելու իմ ստեղծած մարդկանց, որովհետև ափսոսում եմ, որ ստեղծել եմ նրանց: Բնաջնջելու եմ թե՛ մարդկանց և թե՛ ընտանի կենդանիներին, երկնքի թևավոր արարածներին ու երկրի մյուս բոլոր կենդանիներին»:
8 Բայց Նոյը արժանացել էր Եհովայի հավանությանը:*
9 Սա է Նոյի պատմությունը:
Նոյը արդար մարդ էր:+ Նա անարատ* էր իր ժամանակակիցների* մեջ: Նա ճշմարիտ Աստծու հետ էր քայլում:*+
10 Նոյը երեք որդի ունեցավ՝ Սեմին, Քամին ու Հաբեթին:+
11 Ճշմարիտ Աստծու աչքում երկիրն ապականվել էր ու բռնությամբ լցվել:
12 Այո՛, երկրին նայելով՝ Աստված տեսնում էր, որ այն ապականված է,+ որ երկրի վրա բոլոր մարդիկ ապականված կյանքով են ապրում:*+
13 Այդ ժամանակ Աստված ասաց Նոյին. «Ես որոշել եմ բնաջնջել բոլոր մարդկանց, որովհետև նրանց պատճառով երկիրը բռնությամբ է լցվել. ես նրանց կործանելու եմ երկրի հետ միասին:+
14 Քեզ համար մի տապան*+ կառուցիր խիժաբեր ծառի փայտից: Տապանում բաժանմունքներ շինիր և այն դրսից ու ներսից կուպրով*+ պատիր:
15 Տապանը պետք է այսպիսին լինի. երկարությունը՝ 300 կանգուն, լայնությունը՝ 50 կանգուն, և բարձրությունը՝ 30 կանգուն:*
16 Տապանի լուսավորության համար պատուհան* շինիր՝ վերևից մեկ կանգուն հաշված: Տապանը թող առաջին, երկրորդ ու երրորդ հարկ ունենա, և մուտքը թող կողքից լինի:+
17 Ես երկրի վրա ջրհեղեղ+ եմ բերելու, որ կործանեմ երկնքի տակ բնակվող ամեն արարածի,* որի մեջ կյանքի շունչ* կա: Երկրի վրա ամեն շնչավոր էակ կոչնչանա:+
18 Ես ուխտ* եմ հաստատում քեզ հետ: Դու պետք է տապան մտնես, քեզ հետ՝ նաև որդիներդ, կինդ և որդիներիդ կանայք:+
19 Ամեն տեսակ կենդանի արարածներից+ մեկական զույգ՝ արու և էգ,+ տապան մտցրու, որպեսզի քեզ հետ միասին ողջ մնան.
20 թևավոր արարածներից՝ ըստ իրենց տեսակների, ընտանի կենդանիներից՝ ըստ իրենց տեսակների, և ցամաքային մյուս բոլոր կենդանիներից՝ ըստ իրենց տեսակների: Յուրաքանչյուրից մեկական զույգ այնտեղ կմտնի քեզ հետ, որ ողջ մնա:+
21 Բացի այդ՝ հավաքիր ու քեզ հետ վերցրու ամեն տեսակ ուտելիք,+ որ դուք և կենդանիները սնունդ ունենաք»:
22 Նոյը ամեն ինչ արեց այնպես, ինչպես Աստված պատվիրել էր իրեն: Նա հենց այդպես արեց:+
Ծանոթագրություններ
^ Եբր. արտահայտությունը վերաբերում է հրեշտակներին:
^ Բռց.՝ «Իմ ոգին»:
^ Բռց.՝ «մարմին է»: Այսինքն՝ վարվում է իր անկատար մարմնին բնորոշ ձևով:
^ Բռց.՝ «Նրա օրերը 120 տարի կլինեն»:
^ Եբր.՝ նեֆիլիմ: Հնարավոր է՝ նշանակում է «տապալողներ», այսինքն՝ ուրիշներին գետնին գցողներ: Բառարանում տես «Նեֆիլիմ»:
^ Կամ՝ «և ցավ զգաց իր սրտում»:
^ Կամ՝ «վշտացավ»:
^ Բռց.՝ «բարեհաճություն էր գտել Եհովայի աչքերում»:
^ Կամ՝ «անմեղադրելի»:
^ Բռց.՝ «սերնդակիցների»:
^ Այսինքն՝ նա իր կյանքն ապրում էր Աստծու կամքին ներդաշնակ:
^ Բռց.՝ «ամեն մարմին ապականել է իր ճանապարհը»:
^ Բռց.՝ «արկղ»: Այսինքն՝ մեծ նավ:
^ Կամ՝ «ձյութով»:
^ Տապանի չափսերը՝ մոտ 133,5 × 22,3 × 13,4 մ: Տես հավելված Բ14:
^ Եբր.՝ ցոհար: Հնարավոր է՝ դա մի բացվածք էր, որը ձգվում էր տապանի չորս կողմերով: Ըստ մեկ այլ կարծիքի՝ այն երկթեք տանիք էր, որի կատարը ուներ 1 կանգուն բարձրություն:
^ Կամ՝ «կյանքի ոգի»:
^ Բռց.՝ «ամեն մարմին»:
