Ծննդոց 16։1-16
-
Հագարը և Իսմայելը (1-16)
16 Աբրամի կինը՝ Սարան, անզավակ էր:+ Նա մի եգիպտացի աղախին ուներ, որի անունը Հագար+ էր:
2 Սարան Աբրամին ասաց. «Խնդրում եմ, լսիր ինձ: Եհովան թույլ չի տվել, որ երեխա ունենամ: Խնդրում եմ, հարաբերություն ունեցիր աղախնիս հետ. գուցե ես նրա միջոցով երեխաներ ունենամ»:+ Աբրամը լսեց Սարային:
3 Սարան իր եգիպտացի աղախին Հագարին կնության տվեց իր ամուսնուն՝ Աբրամին: Այդ ժամանակ արդեն տասը տարի էր, ինչ Աբրամն ապրում էր Քանանում:
4 Աբրամը հարաբերություն ունեցավ Հագարի հետ, և նա հղիացավ: Երբ Հագարը հասկացավ, որ հղի է, սկսեց արհամարհել իր տիրուհուն:
5 Ուստի Սարան ասաց Աբրամին. «Ինձ հասցվող այս վիրավորանքի համար դու ես մեղավոր: Աղախնիս քո գիրկը տվեցի, ու նա, հասկանալով, որ հղի է, սկսեց արհամարհել ինձ: Թող Եհովան դատի՝ ով է մեղավոր՝ ես, թե դու»:
6 Աբրամն էլ ասաց Սարային. «Աղախինդ քո իշխանության տակ է: Վարվիր նրա հետ, ինչպես ճիշտ ես համարում»: Այդ ժամանակ Սարան սկսեց նվաստացնել Հագարին, և նա փախավ:
7 Հետո անապատում՝ ջրի աղբյուրի մոտ, որ Սուր+ տանող ճանապարհին է, Եհովայի հրեշտակը հանդիպեց Հագարին:
8 Նա հարցրեց. «Հագա՛ր, Սարայի՛ աղախին, որտեղի՞ց ես եկել և ո՞ւր ես գնում»: Հագարը պատասխանեց. «Իմ տիրուհի Սարայից եմ փախչում»:
9 Եհովայի հրեշտակն ասաց. «Վերադարձիր քո տիրուհու մոտ և խոնարհաբար հնազանդվիր նրան»:*
10 Հետո Եհովայի հրեշտակն ասաց. «Ես անչափ կշատացնեմ քո սերունդը՝ այնքան, որ հնարավոր չի լինի հաշվել»:+
11 Եհովայի հրեշտակն ավելացրեց. «Ահա դու հղի ես ու մի որդի կունենաս: Նրա անունը Իսմայել* կդնես, քանի որ Եհովան լսեց քո տառապանքի աղաղակը:
12 Նա վայրի էշի* պես անսանձ մարդ կլինի: Նա դուրս կգա բոլորի դեմ,* ու բոլորը՝ նրա դեմ, և իր բոլոր եղբայրներից առանձին կբնակվի՝ նրանց դեմ առ դեմ»:*
13 Այդ ժամանակ Հագարը կանչեց Եհովայի անունը, ով խոսում էր իր հետ, և ասաց. «Դու ամեն ինչ տեսնող* Աստված ես»:+ Ապա ավելացրեց. «Մի՞թե ես այստեղ իսկապես տեսա նրան, ով տեսնում է ինձ»:
14 Ահա թե ինչու այդ ջրհորը կոչվեց Բեեր-Լահայրոյ* (այն գտնվում է Կադեսի ու Բարադի միջև):
15 Հագարը Աբրամի համար որդի ծնեց, և Աբրամը իր որդու անունը Իսմայել+ դրեց:
16 Աբրամը 86 տարեկան էր, երբ Հագարը ունեցավ Իսմայելին:
Ծանոթագրություններ
^ Բռց.՝ «խոնարհվիր նրա ձեռքի տակ»:
^ Նշանակում է «Աստված լսում է»:
^ Կամ՝ «օնագրի»: Սա վայրի էշի տեսակ է, թեև ոմանք կարծում են, որ խոսքը զեբրի մասին է: Հավանաբար վերաբերում է բնույթով ինքնագլուխ լինելուն:
^ Բռց.՝ «Նրա ձեռքը կլինի բոլորի դեմ»:
^ Կամ հնարավոր է՝ «և թշնամական հարաբերություններ կունենա իր բոլոր եղբայրների հետ»:
^ Կամ՝ «Աստված, որը տեսնում է ինձ», «Աստված, որն իրեն տեսանելի է դարձնում»:
^ Նշանակում է «Կենդանի եղողի ջրհորը՝ նրա, ով տեսնում է ինձ»:
