Երեմիա 26։1-24
26 Հուդայի թագավոր Հովսիայի որդի Հովակիմի+ իշխանության սկզբում Եհովան ասաց.
2 «Ահա թե ինչ է ասում Եհովան. «Կանգնիր Եհովայի տան գավիթում և խոսիր Հուդայի այն բոլոր քաղաքների բնակիչների մասին,* որոնք գալիս են՝ Եհովայի տանը երկրպագություն անելու:* Նրանց հայտնիր այն ամենը, ինչ կպատվիրեմ քեզ: Մի խոսք անգամ չպակասեցնես:
3 Գուցե նրանք լսեն և թողնեն իրենց բռնած չար ուղին: Այդ ժամանակ ես կմտափոխվեմ* ու չեմ բերի այն աղետը, որը մտադրվել էի նրանց վրա բերել իրենց չար գործերի համար:+
4 Նրանց ասա. «Սա է ասում Եհովան. «Եթե ինձ չլսեք և ձեզ տված իմ օրենքը* չպահեք,
5 եթե չլսեք իմ ծառաներին՝ մարգարեներին, որոնց ես նորից ու նորից ուղարկում* եմ ձեզ մոտ, և որոնց խոսքերին դուք ուշադրություն չեք դարձնում,+
6 ապա ես էլ այս տան հետ կվարվեմ այնպես, ինչպես Սելովի հետ վարվեցի,+ և երկրի բոլոր ազգերը կանիծեն այս քաղաքը»»»»:+
7 Քահանաները, մարգարեներն ու ողջ ժողովուրդը լսեցին, թե ինչպես է Երեմիան այս խոսքերն ասում Եհովայի տանը:+
8 Երբ Երեմիան ասաց վերջացրեց այն ամենը, ինչ Եհովան պատվիրել էր նրան ասել ժողովրդին, քահանաները, մարգարեներն ու ողջ ժողովուրդը բռնեցին նրան ու ասացին. «Դու պետք է մեռնես:
9 Ինչո՞ւ Եհովայի անունով մարգարեացար՝ ասելով. «Այս տան հետ վարվելու եմ այնպես, ինչպես Սելովի հետ վարվեցի, և այս քաղաքը ամայի ու անբնակ է դառնալու»»: Եվ ամբողջ ժողովուրդը Եհովայի տանը Երեմիայի շուրջը հավաքվեց:
10 Երբ Հուդայի իշխանները լսեցին այս խոսքերը, թագավորի պալատից եկան Եհովայի տուն և նստեցին Եհովայի տան նոր դարպասի մուտքի մոտ:+
11 Քահանաներն ու մարգարեները ասացին իշխաններին ու ամբողջ ժողովրդին. «Այս մարդը մահապատժի է արժանի,+ որովհետև նա մարգարեացավ, որ այս քաղաքի վրա աղետ է գալու, և դուք ձեր ականջներով լսեցիք դա»:+
12 Այդ ժամանակ Երեմիան ասաց բոլոր իշխաններին ու ժողովրդին. «Եհովան է ուղարկել ինձ՝ այս տան և այս քաղաքի մասին մարգարեանալու և ասելու այն բոլոր խոսքերը, որ լսեցիք:+
13 Ուրեմն թողեք ձեր բռնած չար ուղին և ճիշտն արեք, հնազանդվեք ձեր Աստված Եհովային, և Եհովան կմտափոխվի ու չի բերի այն աղետը, որի մասին նախազգուշացրել է:+
14 Իսկ ինչ վերաբերում է ինձ, ես ձեր ձեռքում եմ: Վարվեք ինձ հետ, ինչպես որ հաճելի է ձեզ, և ինչպես որ ճիշտ եք համարում:
15 Սակայն հաստատ իմացեք, որ եթե ինձ սպանեք, ապա դուք, այս քաղաքը և դրա բնակիչները մեղավոր կլինեք անմեղ արյուն թափելու մեջ, որովհետև ինձ իսկապես Եհովան է ուղարկել ձեզ մոտ, որ ասեմ այս ամենը»:
16 Այդ ժամանակ իշխաններն ու ամբողջ ժողովուրդը քահանաներին ու մարգարեներին ասացին. «Այս մարդը արժանի չէ մահապատժի, որովհետև նա մեր Աստված Եհովայի անունով խոսեց մեզ հետ»:
17 Երկրի երեցներից մի քանիսն էլ վեր կացան ու հավաքված ողջ ժողովրդին ասացին.
18 «Հուդայի թագավոր Եզեկիայի+ օրոք մորեսեթցի Միքիան+ էր մարգարեանում: Նա Հուդայի ողջ ժողովրդին ասաց. «Զորքերի տեր Եհովան ասում է.
«Սիոնը արտի պես կհերկվի,Երուսաղեմը ավերակների կույտ կդառնա,+Իսկ այն լեռը, որտեղ Աստծու տունն է,* անտառով կծածկվի»»:+
19 Մի՞թե Հուդայի թագավոր Եզեկիան ու ողջ Հուդան մահվան մատնեցին նրան. չէ՞ որ թագավորը վախեցավ Եհովայից ու աղերսեց, որ Եհովան բարեհաճ լինի,* և Եհովան մտափոխվեց ու չբերեց այն աղետը, որի մասին նախազգուշացրել էր:+ Իսկ մենք ուր որ է մեզ վրա մեծ աղետ ենք բերելու:
20 Մի մարդ էլ կար, որ մարգարեանում էր Եհովայի անունով՝ Սեմայիայի որդի Ուրիան, որը Կարիաթարիմից+ էր: Նա մարգարեացավ այս քաղաքի և այս երկրի մասին՝ ասելով այնպիսի խոսքեր, ինչպիսիք որ Երեմիան է ասում:
21 Հովակիմ+ թագավորը, նրա բոլոր զորեղ ռազմիկներն ու իշխանները լսեցին նրա խոսքերը, և թագավորը որոշեց սպանել նրան:+ Երբ Ուրիան իմացավ այդ մասին, վախեցավ ու փախավ Եգիպտոս:
22 Այդ ժամանակ Հովակիմ թագավորը Աքբորի որդի Ելնաթանին+ ու նրա հետ նաև մի քանի մարդկանց Եգիպտոս ուղարկեց:
23 Նրանք Ուրիային Եգիպտոսից բերեցին ու տարան Հովակիմ թագավորի մոտ, որը սրի քաշեց նրան+ ու նրա դին գցեց հասարակ ժողովրդի գերեզմանոցը»:
24 Բայց Սաֆանի+ որդի Աքիկամը+ աջակցում էր Երեմիային, ու նրան չտվեցին ժողովրդի ձեռքը, որն ուզում էր սպանել նրան:+
Ծանոթագրություններ
^ Կամ՝ «բնակիչների հետ»:
^ Կամ՝ «խոնարհվելու»:
^ Կամ՝ «կափսոսամ»:
^ Կամ՝ «ուսուցումը», «առաջնորդությունը»:
^ Բռց.՝ «վաղ վեր եմ կենում և ուղարկում»:
^ Կամ՝ «տաճարի բարձունքն է»:
^ Բռց.՝ «ու փափկացրեց Եհովայի երեսը»:
