Ka tsuʼuw jawaʼ a tákuy

Kit kʼalej ti índice

 AJUMTALÁB 8

A Josías in tákuy alwaʼ in jaʼubchik

A Josías in tákuy alwaʼ in jaʼubchik

¿Walám kʼibat ki tʼajaʼ jawaʼ a Jehová in léʼ?... Talchik i atikláb in tsalpayal abal lej kʼibat. Pero an Biblia tu exóbchal abal yab kʼibat. Tu ólchal an tʼilab tin kwéntaj a Josías, jún i kwitól axi in lej tsápnanchij abal kin tʼojonchij a Jehová. Ani in ejtow kin tʼajaʼ kom in tákuy alwaʼ in jaʼubchik. Ki exóbnaʼ más tin kwéntaj a Josías ani in jaʼubchik.

In tátaj a Josías in bijak Amón ani pélak an tsʼálej ti Judá. A Amón lej pojkaxak ani in kʼakʼnálak i walekláb. Tam ti tsemets a Amón, a Josías tʼajan ti tsʼálej ti Judá. ¿A exlál jáy i tamub in kwaʼalak a Josías tam ti tʼajan ti tsʼálej? ¡In kwaʼalak waxik i tamub! ¿Walám pojkaxak ejtíl in tátaj?... Imbáj.

A Sofonías in uchaʼ an atiklábchik abal yab alwaʼak kin kʼakʼnaʼ i dioses axi yab chubax

Ma tin tsakamtal, a Josías in léʼak kin tʼojonchij a Jehová. Jaxtám in tákuy tin jaʼúb i atiklábchik axi in kʼanidhálak a Dios, ani jajáʼchik in tólmiy a Josías abal kin belkaʼ a Jehová. ¿Jitaʼ pélak in jaʼubchik a Josías?

Jún in jaʼúb pélak an káwlómej Sofonías. Jajáʼ kwaʼalak kin uchaʼ an atiklábchik axi ti Judá: «Max ka aynaʼchik ka kʼakʼnaʼ i dioses  axi yab chubax, neʼetschik ka lej yajchiknaʼ». ¿Jantʼoj in tʼajaʼ a Josías? ¿In tʼajaʼ ti kwéntaj jawaʼ in olnaʼ an káwlómej? Antsanáʼ. Jaxtám, jajáʼ etsʼey in kʼakʼnaʼ a Jehová ani yab an waleklábchik.

Kʼeʼat in jaʼúb a Josías pélak a Jeremías. Jajáʼ pélak in at tsakam, ani tam ti kwitólej u kʼwajílakchik utúx. A Jeremías ani a Josías tólmixin abal kin tʼojonchij a Jehová. Jajáʼchik in koʼoy jún i alwaʼ junkudhtaláb jaxtám, tam ti tsemets a Josías, a Jeremías in dhuchaʼ jún i ajatláb abal kin olnaʼ jawaʼ in atsʼalak.

A Jeremías ani a Josías tólmixin abal kin tʼojonchij a Jehova

¿Jantʼoj tu exóbchal in tʼiplábil a Josías?... Ma tin tsakamtal jajáʼ in léʼak kin belkaʼ a Dios. Ani abal kin ejtow kin tʼajaʼ, kwaʼalak kin tákuy alwaʼ in jaʼubchik axi kin kʼanidhaʼak a Jehová. ¿Yab aníts abal tatáʼ jaye a léʼ ka tʼojonchij a Jehová? Jaxtám lej exbadh abal ka tákuy ta jaʼúb i atiklábchik axi kin kʼanidhaʼ a Jehová.