Ka tsuʼuw jawaʼ a tákuy

Kit kʼalej ti índice

Ólchixchik kʼal a Jehová

Ka tákuy an kawintaláb tének

 AJUMTALÁB 10

A Jesús etsʼey bélkaxin

A Jesús etsʼey bélkaxin

¿Walám kʼibat ki belkaʼ i tátaj ani i nánaj?... Tam junchikíl kʼibat, ¿yab aníts? Pero ¿jantʼoj in ejtowal ti tólmiy abal kit bélkaxin? Ka tʼajaʼ ti kwéntaj in tʼiplábil a Jesús. ¿A exlálak abal jajáʼ etsʼey in belkaʼ a Jehová ani in tátajchik?... Ki exóbnaʼ más tin kwéntaj a Jesús.

Okʼxidh ka chích a Jesús ti Tsabál u kʼwajílak ti éb kʼal in tátaj, a Jehová. Pero tam ti kʼwajiy ti Tsabál jaye in koʼoy in tátaj ani in nánaj. In bij pélak a José ani a María. ¿A léʼ ka exlaʼ jantʼiniʼ tin bajuw kin tʼajaʼ tin tátajchik?...

A Jesús kʼwajílak ti éb, pero abal ka waʼtsin tejéʼ ti tsabál a Jehová in tʼajaʼ jún i labidh tʼajbiláb. In punuw a Jesús tin chukul a María. Tin naktal an beléw a ítsʼ, a Jesús kʼalej ti puwél tin chukul a María, ani tálbél waʼtsin, antsanáʼ jantʼiniʼ u watʼel kʼal an tʼeleʼchik. A María antsanáʼ tin koʼoy an tʼeleʼ. Tam, a María ani a José in yedhaʼ a Jesús.

Tam ti a Jesús in kwaʼalak 12 i tamub in tʼajaʼ jantʼoj axi in tejwaʼmédhaʼ abal in kʼanidhálak a Jehová, in tátaj axi ti éb. Axéʼ watʼey tam ti a Jesús ani in yanél kʼalejchik ti Jerusalén abal kin kʼakʼnaʼ a Jehová. Tam ti wichélits tin kʼimáʼ, a José ani a María in tʼajaʼ ti kwéntaj abal a Jesús yab kʼwajatak kʼal jajáʼchik. ¡Yabakchik in elál ni juʼtá! ¿Jantʼoj in tʼajaʼchik a José ani a María?...

¿Jaleʼ a Jesús kʼwajatak ti an atáj juʼtá ti kʼákʼnábak a Jehová?

Jajáʼchik wichiy dhubatkʼij ti Jerusalén ani in tujchij kin aliy a Jesús. Xeʼtsinchik óx a kʼícháj ti alim. ¡Kʼwajatakchik lej tʼeʼpidh! Tálbél in elaʼchik. ¿A exlál juʼtá ti kʼwajatak?... Kʼwajatak ti an atáj juʼtá ti kʼákʼnábak a Jehová. Kʼwajatak tanáʼ kom in ejtowalak kin exóbnaʼ tin kwéntaj a Jehová. A Jesús in kʼanidhálak in tátaj ani in léʼak kin kulbedhaʼ. Tam ti a Jesús yejey in aynanchij kin belkaʼ a Jehová. Tam junchikíl kʼibat in atsʼaʼ kom waʼtsin kʼal jitaʼ ti odhnaʼ abaʼ aniʼ jajáʼ etsʼey bélkaxin. ¿Walám a Jesús jaye in belkaʼ a José ani a María?... An Biblia in ulal abal antsanáʼ.

¿Jantʼoj a ejtowal ka exóbnaʼ kʼal in tʼiplábil a Jesús?... Abal etsʼey kwaʼal ka belkaʼ a tátaj ani a nánaj bélits abal tam junchikíl kʼibat ka atsʼaʼ. ¿Tatáʼ neʼets ka tʼajaʼ?...