Al gade sa k anndan l

Ale nan lòt meni an

Temwen Jewova yo

Kreyòl ayisyen

Yon seri videyo ki bay kè kontan

Yon seri videyo ki bay kè kontan

“Se kòmsi Jewova t ap koute sa paran yo t ap di nan kè yo.” Se konsa yon papa ki nan peyi Malezi te pale de seri videyo Fè zanmi ak Jewova a.

Depi nan premye epizòd yo, Temwen Jewova yo te fè yon seri desen anime ki montre sa Kalèb ak fanmi l ap fè. Videyo sa yo, ki disponib sou jw.org la, aprann timoun yo yon seri leson sou bon fason pou yo aji ak sa yo ka fè pou yo vin zanmi Jewova, tankou, rezon ki fè yo pa dwe vòlè ak fason pou yo priye Bondye.

Yo deja tradui premye videyo nan seri videyo sa a nan 131 lang, sa ki pèmèt timoun toupatou sou tè a rive pwofite sa k gen ladan l.

Tout moun kontan jwenn li

Men sa yon manman ki gen senk pitit te ekri: “Nou te resevwa DVD Koute, obeyi e w ap jwenn benediksyon an semèn pase a, e depi lè a, nou gentan gade l anviwon 50 fwa.”

Ann Angletè, Millie, yon tipitit ki gen 12 an, gen yon frè l ki gen 15 an ki rele Thomas e ki fèt mongòl. Men sa Millie ekri: “Thomas gen videyo Kalèb la sou iPad li, konsa, li ka montre ti zanmi lekòl li yo videyo a. Li renmen chante yo e l tèlman chante yo byen, li menm fè yon sè kriye. Se yon bagay estrawòdinè.”

Men sa Ava, yon tifi ki fè konnen li gen 8 an, 9 mwa ak 25 jou, te ekri: “Kalèb ak sè l la konn anseye timoun byen.”

Men sa Mikaylah ekri: “Mwen gen sizan. Mèsi pou DVD Koute, obeyi e w ap jwenn benediksyon an. Li aprann mwen pou m koute paran m paske sa fè Jewova kontan.”

Mesaj ki nan videyo yo gen pwa

Gen yon jèn animatè ki pa Temwen Jewova, ki te gade videyo C’est mal de voler a. Sa te fè gwo efè sou li, sitou lè l te aprann se yon ti ekip animatè ki te fè l. Men sa l di: “Mwen konn moun ki travay nan gwo stidyo ak nan ti stidyo. Pafwa, mwen konn ap mande tèt mwen ki jan m t ap santi m si m t ap travay kote sa yo. Men, nan fen jounen an, apre tout travay yo fè, tout efò yo fè, sa yo rive pwodui a, se yon bagay ki fè moun fè yon ti ri pou dezèdtan, epi fini. Videyo nou fè yo chanje lavi timoun yo, yo aprann yo fè diferans ant sa ki byen ak sa ki mal e yo ede yo pran bon desizyon. Travay n ap fè a gen yon objektif, sa ede moun.”

Tout paran sou tè a pa gen pwoblèm pou yo dakò ak sa. Men sa yon manman ekri: “Quinn, pitit gason m ki gen twazan an, t ap gade videyo Fè zanmi ak Jewova a, nan mitan chante a, li gade m, li met ti men l sou kè l, li di: ‘Manmi, videyo sa a fè kè m kontan.’ ”