Al gade sa k anndan l

Ale nan lis ki di sa k anndan l lan

 SIJÈ KI SOU PAJ KOUVÈTI A | ÈSKE BONDYE ENTERESE NAN OU?

Èske Bondye prete atansyon ak ou?

Èske Bondye prete atansyon ak ou?

‘Se yon pòv malere san sekou mwen ye. Se pou Jewova prete atansyon ak mwen *.’ — DAVID, WA IZRAYÈL LA, 11yèm SYÈK ANV. E. N.

“Nasyon yo tankou yon gout dlo nan yon bokit.”— IZAYI 40:15.

Èske l rezonab pou David te atann Bondye ap prete atansyon ak li? Èske Bondye prete atansyon ak ou? Gen anpil moun ki mal pou kwè gen yon Bondye Toupisan ki enterese nan yo. Poukisa?

Youn nan rezon ki fè sa se paske Bondye se yon Èt ki siperyè lontan pase lèzòm. Jan nou ka wè sa nan pozisyon elve Bondye ye a, tout nasyon yo “tankou yon gout dlo nan yon bokit. Yo pa peze plis pase ti pousyè nan yon balans”. (Izayi 40:15.) Gen yon ekriven nan epòk nou an, ki pa kwè nan Bondye, ki tèlman ale lwen, li menm di se yon “gwo vanite pou w kwè gen yon Bondye ki enterese pèsonèlman nan sa w ap fè, e ki pa pran tan pou l fè sa”.

Yon lòt bò, gen kèk moun ki panse akoz konduit yo genyen yo pa merite pou Bondye ba yo atansyon. Pa egzanp, men sa Jim, yon mesye ki andezaj, fè konnen: “M te toujou priye Bondye pou m gen lapè ak metriz, men towouta, m te rekòmanse fè kòlè ankò. Finalman, m te rann mwen kont mwen te twò mechan e Bondye pa t kapab ede m.”

Èske Bondye tèlman lwen lèzòm opwen li pa rive wè nou? Ki jan l santi l konsènan kreyati enpafè l yo? Si Bondye pa ban nou konesans sou li, okenn moun pap ka byen pale de li e yo pap ka byen reponn kesyon sa yo. Sepandan, nan Bib la, ki se mesaj enspire Bondye bay lèzòm nan, nou jwenn asirans Bondye pa lwen nou, li pa yon Bondye ki pa gen sousi pou moun. “An reyalite”, Bib la di ‘Bondye pa lwen okenn nan nou’. (Travay 17:27.) Nan kat atik ki vin apre yo, nou pral egzamine sa Bondye di nou sou enterè li gen pou lèzòm ak sou fason li montre l enterese nan moun ki menm jan ak ou.

^ § 3 Sòm 40:17; Jewova se non Bondye jan Bib la fè konnen sa.