Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Reveye n!  |  No 3 2017

 DAPRE LABIB

Zanj

Zanj

Yo pale de zanj oswa yo montre imaj yo nan literati, nan travay atis ak nan fim. Kiyès zanj yo ye, e ki travay y ap fè?

Kiyès zanj yo ye?

MEN SA BIB LA DI

 

Anvan Bondye te kreye linivè e li te kreye de premye moun yo sou tè a, li te gentan fè yon seri kreyati entèlijan ki nan yon nivo ki pi wo pase lèzòm. Yo pi pisan pase lèzòm, epi yo rete menm kote ak Bondye, yon kote moun pa ka ni ale ni wè (Jòb 38:4, 7). Labib rele kreyati sa yo, ki siperyè parapò ak lèzòm, “espri” oswa “zanj”. — Sòm 104:4 *.

Konbyen zanj ki genyen? Gen yon pakèt zanj. Kantite zanj ki toutotou twòn Bondye yo se “plizyè dizèn milye ak plizyè milye”, oubyen se “dimil fwa dimil ak mil fwa mil”. (Revelasyon 5:11; nòt.) Si n ta dwe pran kantite sa a nan sans literal, sa t ap vle di gen plizyè santèn milyon zanj.

“Mwen wè yon pakèt zanj toutotou twòn nan [...], e kantite yo te ye a se te plizyè dizèn milye ak plizyè milye.” — Revelasyon 5:11.

Ki sa zanj yo te konn fè nan epòk yo t ap ekri Bib la?

MEN SA BIB LA DI

 

Byen souvan, Bondye te konn itilize zanj yo kòm pòtpawòl oswa kòm mesaje *. Anplis de sa, nan Bib la, yo konn montre y ap fè mirak pou yo fè travay Bondye voye yo fè. Bondye te voye yon zanj beni Abraram epi anpeche l touye Izarak, pitit gason l, kòm sakrifis (Jenèz 22:11-18). Yon zanj te parèt devan Moyiz nan yon flanm dife nan mitan yon pye pikan pou l ba l yon mesaj ki t ap chanje lavi l (Egzòd 3:1, 2). Lè yo te lage pwofèt Dànyèl nan twou lyon yo, ‘Bondye te voye yon zanj li vin fèmen bouch lyon yo’. — Dànyèl 6:22.

“Lè sa a, zanj Jewova a parèt devan [Moyiz] nan yon flanm dife nan mitan yon pye pikan.” — Egzòd 3:2.

 Ki sa zanj yo ap fè kounye a?

MEN SA BIB LA DI

 

Nou pa ka konnen tout sa zanj yo ap fè jodi a. Men, Bib la montre n y ap ede moun ki gen kè sensè yo pou yo vin aprann konnen plis bagay sou Bondye. — Travay 8:26-35; 10:1-22; Revelasyon 14:6, 7.

Jewova te fè Jakòb, ki te yon patriyach, fè yon rèv kote l te wè plizyè zanj k ap monte desann nan yon “eskalye” ki ant syèl la ak tè a (Jenèz 28:10-12). Sandout, rèv sa a te fè Jakòb konprann Jewova Dye konn voye zanj yo akonpli yon seri misyon sou tè a an favè moun ki fidèl yo lè moun sa yo bezwen èd nan men Jewova. Nou menm tou, nou kapab konprann menm bagay la. — Jenèz 24:40; Egzòd 14:19; Sòm 34:7.

“Li wè yon eskalye sou tè a e tèt eskalye a rive nan syèl la. Epitou, li wè yon seri zanj Bondye ki t ap monte desann nan eskalye a.” — Jenèz 28:12.

^ § 6 Labib fè konnen gen kèk nan espri yo ki pa t soumèt anba otorite Bondye, e li rele zanj mechan sa yo “demon”. — Lik 10:17-20.

^ § 11 Nòmalman, mo ebre ak mo grèk yo itilize nan Bib la, lè yo tradui yo ki bay mo “zanj” lan, vle di “mesaje”.