Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Liv istwa biblik mwen an

 ISTWA 49

Solèy la ret kanpe

Solèy la ret kanpe

GADE Jozye. L ap di : ‘ Solèy, ret kanpe la ! ’ Epi solèy la ret kanpe vre. Li rete la, nan mitan syèl la, pandan tout yon jounen. Se Jewova ki fè sa rive ! Men, ann al wè sa k fè Jozye vle pou solèy la ret ap klere.

Lè senk move wa Kanaran yo kòmanse batay ak Gibeyonit yo, Gibeyonit yo voye yon moun al mande Jozye sekou. Mesaje a di Jozye konsa : ‘ Vin pote nou sekou vit ! Vin sove nou ! Tout wa ki nan zòn mòn peyi a monte vin batay ak sèvitè w yo. ’

Menm kote a, Jozye pran wout la avèk sòlda l yo. Yo fè tout nuit la ap mache. Lè yo rive Gibeyòn, sòlda senk wa yo pè, yo kòmanse ap kouri ale. Jewova fè gwo lagrèl sot tonbe nan syèl la. Gen plis sòlda ki mouri anba lagrèl pase sa sòlda Jozye yo touye.

Jozye gentan wè, talè konsa solèy la pral kouche. Donk, li t apral fènwa, e sa t ap fè anpil sòlda senk move wa yo sove ale. Lè Jozye wè sa, li priye Jewova, apre sa li di : ‘ Solèy, ret kanpe la ! ’ Sa vin fè, etan solèy la kontinye ap klere, Izrayelit yo kapab fin genyen batay la.

Men, gen anpil lòt move wa nan Kanaran ki rayi pèp Bondye a. Sa fè Jozye ak lame l la pran sis ane pou l venk 31 wa sa yo nan lagè. Lè l fini, Jozye fè separe tè Kanaran yo bay tribi ki pa t ko jwenn valè tè pa yo.

Apre anpil ane fin pase, Jozye vin mouri. Li te gen 110 an lè l mouri. Lè Jozye avèk zanmi l yo te vivan, pèp la te obeyi Jewova. Men, lè bon moun sa yo vin mouri, pèp la kòmanse nan fè sa k pa bon, epi yo te tonbe nan pwoblèm. Lè sa a, yo te vrèman bezwen pou Bondye pote yo sekou.