Al gade sa k anndan l

Ale nan lis ki di sa k anndan l lan

Jozye 4​:​1-24

SA K LADAN L

  • Wòch ki dwe sèvi kòm souvni (1-24)

4  Lè tout nasyon an te fin travèse Rivyè Jouden an, Jewova di Jozye:  “Pran 12 gason pami pèp la, youn nan chak tribi+,  e men lòd w ap ba yo: ‘N ap pran 12 wòch nan mitan Rivyè Jouden an, kote prèt yo kanpe a+, nou pral avèk yo pou n depoze yo kote n ap pase nuit lan+.’”  Konsa, Jozye rele 12 mesye li te chwazi pami Izrayelit yo, youn nan chak tribi,  li di yo: “Pase devan Lach Jewova, Bondye nou an, pou n al nan mitan Rivyè Jouden an, e nou chak dwe pran yon wòch met sou zepòl nou, selon kantite tribi ki gen pami Izrayelit yo,  pou nou ka sonje sa Bondye te fè a. Si yon lè pitit* nou yo ta mande nou: ‘Poukisa nou mete wòch sa yo la a+?’,  men sa nou dwe di yo: ‘Se paske dlo Rivyè Jouden an te sispann koule devan lach+ alyans Jewova a. Lè Izrayelit yo t ap travèse Rivyè Jouden an ak Lach la, dlo rivyè a te sispann koule. Wòch sa yo la pou fè pèp Izrayèl la toujou sonje sa k te pase a+.’”  Konsa, Izrayelit yo te fè egzakteman sa Jozye te ba yo lòd fè a. Yo te pran 12 wòch nan mitan Rivyè Jouden an, selon kantite tribi ki gen pami Izrayelit yo, dapre lòd Jewova te bay Jozye. Yo te pote wòch yo al kote yo t apral pase nuit lan e yo te mete yo la.  Epitou, Jozye te mete 12 wòch kanpe nan mitan Rivyè Jouden an, kote prèt yo ki t ap pote lach alyans lan te kanpe a+, e wòch sa yo la jis jodi a. 10  Prèt yo ki t ap pote Lach la te ret kanpe nan mitan Rivyè Jouden an jiskaske pèp la te fin fè tout sa Jewova te bay Jozye lòd pou l di yo fè, dapre tout lòd Moyiz te bay Jozye yo. Pandan tan sa a, pèp la t ap prese travèse rivyè a. 11  Kou tout pèp la fin travèse rivyè a, prèt yo te travèse ak Lach Jewova a devan je pèp la+. 12  Epi, desandan Ribenn yo, desandan Gad yo ak mwatye nan tribi Manase a te travèse anvan lòt Izrayelit yo+ e yo te tou pare pou y al nan lagè, dapre lòd Moyiz te ba yo+. 13  Anviwon 40 000 sòlda te travèse rivyè a devan Jewova pou y al nan dezè Jeriko a ak zam nan men yo pou y al fè lagè. 14  Jou sa a, Jewova te onore Jozye devan je tout pèp Izrayèl la+. Pandan tout lavi Jozye, yo te gen gwo respè pou* li, menm jan yo te gen gwo respè pou Moyiz+. 15  Annapre, Jewova di Jozye: 16  “Bay prèt yo k ap pote lach alyans lan*+ lòd pou yo monte sot nan Rivyè Jouden an.” 17  Epi, Jozye bay prèt yo lòd, li di yo: “Monte sot nan Rivyè Jouden an.” 18  Lè prèt yo ki t ap pote lach+ alyans Jewova a te monte sot nan mitan Rivyè Jouden an epi yo met pye yo sou tè sèk deyò rivyè a, dlo Rivyè Jouden an rekòmanse koule e li anvayi tout arebò rivyè a+, jan sa te ye anvan. 19  Dizyèm jou nan premye mwa a, pèp la te monte sot nan Rivyè Jouden an, yo te monte kan yo Gilgal+, bò fwontyè ki nan lès Jeriko a. 20  Jozye te mete 12 wòch yo te pran nan Rivyè Jouden an kanpe nan Gilgal+. 21  Apre sa, li di Izrayelit yo: “Lè pitit* nou yo va mande nou: ‘Sa wòch sa yo ap fè la a+?’, 22  men sa pou nou esplike yo: ‘Pèp Izrayèl la te travèse Rivyè Jouden an sou tè sèk+, 23  lè Jewova, Bondye nou an, te seche dlo Rivyè Jouden an devan yo jiskaske yo te fin travèse rivyè a, menm jan Jewova, Bondye nou an, te seche Lanmè Wouj devan nou jiskaske nou te fin travèse l+. 24  Li te fè sa yon fason pou tout pèp sou tè a ka konnen li menm, Jewova, li gen anpil pouvwa+, e pou nou ka toujou gen lakrentif pou Jewova, Bondye nou an.’”

Nòt anba paj

Lit.: “pitit gason”.
Lit.: “yo te pè”.
Lit.: “lach Temwayaj la”.
Lit.: “pitit gason”.