Al gade sa k anndan l

Ale nan lis ki di sa k anndan l lan

Jozye 23​:​1-16

SA K LADAN L

  • Dènye pawòl Jozye di chèf ann Izrayèl yo (1-16)

    • Pa gen youn nan pawòl Jewova yo ki pa reyalize (14)

23  Sa fè anpil tan depi Jewova te fin sove Izrayelit yo+ anba men tout ènmi yo te gen toutotou yo. Jozye li menm te vin granmoun e li te gen anpil laj+.  Jozye te fè rele tout pèp Izrayèl la+, ansyen yo, moun ki alatèt yo, jij yo ak moun ki gen otorite yo+, li di yo: “Mwen vin granmoun. Mwen gen anpil laj.  Nou wè tout sa Jewova, Bondye nou an, te fè tout nasyon sa yo pou nou, paske se Jewova, Bondye nou an, ki t ap batay pou nou+.  Gade, mwen te fè tiraj osò pou m ban nou+ peyi nasyon nou te ret pou nou pran kòm eritaj pou tribi nou yo+ ansanm ak peyi tout nasyon mwen te detwi yo+, soti bò Rivyè Jouden an rive bò Gwo Lanmè a*, nan direksyon lwès*.  Se Jewova, Bondye nou an, ki te toujou elimine yo devan nou+, li te mete yo deyò* pou nou e nou te pran peyi yo a, jan Jewova, Bondye nou an, te pwomèt nou+.  “Kounye a, nou dwe mete anpil kouraj sou nou pou nou obeyi tout sa ki ekri nan liv Lalwa Moyiz la+, pou nou pa janm fè ni adwat ni agoch+  e pou nou pa janm mele ak nasyon sa yo+ ki rete bò kote nou yo. Nou pa dwe ni nonmen non dye y ap sèvi yo+, ni sèmante nan non yo, epi nou pa dwe janm sèvi yo, ni pwostène devan yo+.  Men, nou dwe atache ak Jewova, Bondye nou an+, jan nou kontinye fè sa jis jodi a.  Jewova ap elimine yon bann gwo nasyon ki pisan devan nou+, paske pa gen yon moun ki ka kanpe devan nou jis jodi a+. 10  Yon sèl gason nan mitan nou ap fè 1 000 moun kouri+, paske se Jewova, Bondye nou an, k ap batay pou nou+, jan l te pwomèt nou an+. 11  Se sa k fè nou dwe toujou veye sou tèt nou*+ pou nou renmen Jewova, Bondye nou an+. 12  “Men, si nou vire do bay Bondye pou n al nan tèt ansanm ak rès moun nan nasyon sa yo ki abite bò kote nou yo+, e nou marye avèk yo*+, epi nou nan zanmitay ak yo, 13  nou mèt sèten, Jewova, Bondye nou an, pap kontinye mete nasyon sa yo deyò* pou nou+. Y ap vin tounen yon pèlen ak yon pyèj pou nou, e y ap vin tounen yon fwèt nan kò nou+ ak yon pikan nan je nou, jiskaske nou fin peri nan bon peyi sa a Jewova, Bondye nou an, ban nou an. 14  “Kounye a, gade! Mwen pral mouri*. Nou konnen byen ak tout kè nou e ak tout nanm* nou pa gen yon pawòl nan tout bèl pwomès Jewova, Bondye nou an, te di nou ki pa reyalize. Yo tout nèt reyalize pou nou. Pa gen yon pawòl ladan yo ki pa reyalize+. 15  Men, menm jan tout bèl pwomès Jewova, Bondye nou an, te fè nou yo te reyalize pou nou+, se konsa tou, Jewova ap lage tout malè li te pwomèt* yo sou nou, e Jewova, Bondye nou an, ap detwi nou nan bon peyi sa a li ban nou an+. 16  Si nou vyole alyans Jewova, Bondye nou an, te ban nou lòd pou nou obeyi a e si n al sèvi lòt dye, epi nou pwostène devan yo, ebyen, Jewova ap vin an kòlè anpil kont nou+ e n ap peri byen vit nan bon peyi li ban nou an+.”

Nòt anba paj

Anpalan de Lanmè Meditèrane.
Oswa: “nan direksyon solèy kouche”.
Oswa: “te pran sa yo genyen”.
Oswa: “Se sa k fè, byen veye nanm nou”.
Oswa: “nou marye avèk yo e yo marye avèk nou”.
Oswa: “pran sa nasyon sa yo genyen”.
Lit.: “Mwen prale jodi a nan wout tout tè a”.
Oswa: “tout move pawòl li te di”.