Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Labib sou Entènèt | LABIB — TRADIKSYON MONN NOUVO A

Jozye 11​:​1-23

SA K LADAN L

  • Yo pran vil ki nan nò yo (1-15)

  • Kantite vil Jozye pran (16-23)

11  Kou Jaben, wa vil Azò a, tande sa k te pase a, li voye nouvèl bay Jobab, wa vil Madon an+, bay wa vil Chimwon an, ak wa vil Akchaf la+,  e li voye nouvèl bay wa ki te nan pati nò zòn ki gen mòn yo, wa ki nan plèn* ki nan sid Kinerèt yo ak wa ki nan Chefela yo ak ti mòn nan Dò yo+ ki nan direksyon lwès.  Li voye nouvèl tou bay moun Kanaran+ ki nan lès ak nan lwès yo, Amorit yo+, desandan Èt yo, Perizit yo, moun Jebis yo ki nan zòn ki gen mòn yo ak Ivit yo+ ki abite nan pye Mòn Èmon+, nan peyi Mispa.  Tout wa sa yo soti ansanm ak tout lame yo, se te yon gwo foul moun ki te tankou grenn sab bò lanmè. Yo vin ansanm ak anpil cheval ak anpil charyo pou yo fè lagè.  Tout wa sa yo te dakò pou yo fè yon rankont. Yo rasanble bò sous dlo Mewòm yo pou y al batay ak Izrayelit yo.  Lè sa a, Jewova di Jozye: “Pinga w pè yo+, paske demen lè konsa, m ap lage yo tout nan men Izrayelit yo pou Izrayelit yo touye yo. Nou dwe koupe jarèt cheval yo+ e nou dwe met dife nan charyo yo.”  Annapre, Jozye ansanm ak mesye ki konn al nan lagè yo al atake yo bò sous dlo Mewòm yo sanzatann.  Jewova lage yo nan men Izrayelit yo+. Izrayelit yo pot laviktwa sou yo e yo kouri dèyè yo rive jis Gwo Sidon+ ak Misrefòtmayim+, nan Vale Mispa ki nan direksyon lès, epi yo touye yo jiskaske pa t ret yon grenn moun vivan+.  Apre sa, Jozye fè yo egzakteman sa Jewova di l fè yo a: Li koupe jarèt cheval yo e li met dife nan charyo yo+. 10  Epi, Jozye retounen al pran vil Azò. Li touye wa a ak kout epe+, piske te gen yon epòk se vil Azò ki te sou tèt tout wayòm sa yo. 11  Jozye ak mesye l yo touye tout moun* nan vil la ak kout epe, konsa yo elimine yo tout+. Li pa t kite yon moun vivan+. Apre sa, li met dife nan vil Azò. 12  Jozye pran tout vil wa sa yo e li touye tout wa ki nan vil sa yo ak kout epe+. Li elimine yo+, dapre lòd Moyiz, sèvitè Jewova a, te ba li. 13  Men, Izrayelit yo pa t boule okenn nan vil ki sou ti mòn yo, sof Azò. Se sèl vil sa a Jozye te boule. 14  Izrayelit yo pran tout sa yo jwenn nan vil sa yo ak tout bèt yo+. Men, yo touye tout moun yo ak kout epe, jiskaske yo fin elimine tout moun+. Yo pa kite yon moun vivan+. 15  Menm lòd Jewova te bay Moyiz, sèvitè l la, se lòd sa a tou Moyiz te bay Jozye+, e Jozye te obeyi lòd sa a. Li te fè tout sa Jewova te bay Moyiz lòd pou l fè yo nèt+. 16  Jozye te pran tout peyi a: li pran zòn ki gen mòn yo, tout Negèb+, tout peyi Gochenn, Chefela+, Araba+, ak zòn ki gen mòn ann Izrayèl yo ak zòn ki anba mòn sa yo, 17  soti nan Mòn Alak, ki mennen anwo Seyi, rive jis Baalgad+ nan Vale Liban nan pye Mòn Èmon+, li met men sou tout wa yo e li touye yo. 18  Jozye te pase yon bon ti tan ap fè lagè ak wa sa yo. 19  Pa t gen yon vil ki te fè lapè ak Izrayelit yo, sof Gabawon+, vil kote Ivit yo te abite a. Se lagè yo te fè pou yo te pran tout lòt vil yo+. 20  Se Jewova ki te kite kè moun yo vin di+ pou yo te fè lagè ak Izrayelit yo pou l te ka detwi yo san pitye+. Yo te dwe elimine yo, dapre lòd Jewova te bay Moyiz la+. 21  Nan epòk sa a, Jozye elimine desandan Anak yo+ nan zòn ki gen mòn yo, nan Ebwon, Debi, Anab, nan tout zòn ki gen mòn nan Jida yo ak tout zòn ki gen mòn ann Izrayèl yo. Jozye touye moun yo e li detwi vil yo+. 22  Pa t gen youn nan desandan Anak yo ki te ret nan peyi Izrayelit yo+, se sèlman nan Gaza+, nan Gat+ ak nan Achdòd yo te rete+. 23  Konsa, Jozye te pran kontwòl tout peyi a, jan Jewova te pwomèt Moyiz la+. Apre sa, Jozye bay pèp Izrayèl la peyi a kòm eritaj pou yo separe bay chak tribi pòsyon pa yo+. Epi, te sispann gen lagè nan peyi a+.

Nòt anba paj

Oswa: “Araba”.
Oswa: “nanm”.