Al gade sa k anndan l

Ale nan lis ki di sa k anndan l lan

Jan 2​:​1-25

SA K LADAN L

  • Maryaj nan Kana a; dlo tounen diven (1-12)

  • Jezi pwòpte tanp lan (13-22)

  • Jezi konn sa k nan lòm (23-25)

2  Twouve, de jou apre, gen yon resepsyon maryaj ki t ap fèt Kana, nan Galile, e manman Jezi te la.  Yo te envite Jezi ak disip li yo nan resepsyon maryaj la tou.  Lè diven an fini, manman Jezi di l: “Yo pa gen diven ankò.”  Men, Jezi di l: “Madanm, ki sa mwen menm avè w gen pou n wè nan sa? Lè m poko rive.”  Manman l di moun ki t ap sèvi yo: “Fè tout sa l di nou.”  Twouve, te gen sis ja an wòch pou met dlo, jan règ sou pirifikasyon Juif yo te genyen yo te egzije sa+, e yo chak te ka kenbe de oswa twa mezi dlo*.  Jezi di yo: “Plen ja yo dlo.” Epi, yo plen yo ra bouch.  Apre sa, li di yo: “Kounye a, pran enpe pot bay moun k ap dirije resepsyon an.” Vrèmanvre, yo fè sa.  Lè moun k ap dirije resepsyon an goute dlo ki te tounen diven an, li pa t konnen kote l te soti (alòske moun ki t ap sèvi yo ki te pran dlo a te konnen), li rele lemarye, 10  li di l: “Tout lòt moun mete bon diven an deyò anvan, e lè moun yo sou, yo mete diven ki pa fin bon an deyò. Men ou menm, ou sere pi bon diven an pou jis kounye a.” 11  Jezi te fè mirak* sa a nan Kana, nan Galile. Se te premye mirak li. Li te fè pouvwa l parèt aklè+, e disip li yo te mete lafwa nan li. 12  Apre sa, li menm, manman l, frè l yo+ ansanm ak disip li yo desann Kapènawòm+, men yo pa t pase anpil jou la. 13  Fèt Pak Juif yo+ te toupre rive. Jezi monte Jerizalèm. 14  Lè l rive nan tanp lan, li jwenn moun ki t ap vann bèf, mouton ak pijon+, ansanm ak moun ki te chita sou chèz ap chanje lajan. 15  Epi, li fè yon fwèt ak kòd, li mete yo tout deyò ansanm ak mouton yo ak bèf yo. Li fè yo soti nan tanp lan, li gaye pyès monnen moun ki t ap chanje lajan yo e li chavire tab yo+. 16  Epi, li di moun ki t ap vann pijon yo: “Retire bagay sa yo la a! Sispann fè kay Papa m nan tounen yon kay kote yo fè komès*+!” 17  Lè sa a, disip li yo vin sonje sa k te ekri a: “Lanmou m gen pou kay ou a ap tankou yon dife k ap boule anndan m+.” 18  Se sa k fè Juif yo reponn li: “Ki siy ou ka ban nou pou w montre nou+ ou gen dwa fè bagay sa yo?” 19  Jezi reponn yo, li di: “Kraze tanp sa a, e nan twa jou m ap mete l kanpe+.” 20  Lè sa a, Juif yo di: “Yo te pran 46 an pou yo bati tanp sa a, epi ou menm, pou w ta mete l kanpe nan twa jou?” 21  Men, lè l t ap pale de tanp lan, se de kò l li t ap pale+. 22  Se sa k fè, lè l te leve sot nan lanmò, disip li yo vin sonje li te konn di sa+. E yo te vin kwè ni nan pasaj nan Ekriti yo ki di sa a, ni nan sa Jezi te di a. 23  Men, pandan l te Jerizalèm nan fèt Pak la, anpil moun te mete lafwa nan non l lè yo te wè bagay estrawòdinè li t ap fè yo. 24  Men, Jezi pa t fè yo konfyans, paske li te konnen yo tout, 25  e li pa t bezwen pèsonn di l kiyès lòm ye, paske li te konn sa k nan lòm+.

Nòt anba paj

Sanble mezi yo te itilize a se te bat ki te egal ak 22 lit (5,81 gal). Gade Apendis B14.
Lit.: “te akonpli siy”.
Oswa: “tounen yon mache; tounen yon biznis”.