Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Labib sou Entènèt | LABIB — TRADIKSYON MONN NOUVO A

Ezayi 8​:​1-22

SA K LADAN L

  • Wa Asiri a pral atake (1-8)

    • Mayèchalalachbaz (1-4)

  • Nou pa bezwen pè, “Bondye avèk nou!” (9-17)

  • Ezayi ak pitit li yo se yon siy (18)

  • Fouye nan lwa a, pa al pale ak demon (19-22)

8  Jewova di m: “Pran yon gwo moso planch+, ekri ‘Mayèchalalachbaz*’ byen klè sou li ak yon plim*.  Epi, se pou Ouri+, prèt la, ak Zakari, pitit gason Jeberekya a, yon seri temwen ki fidèl, ekri* sa pou mwen kòm prèv.”  Apre sa, mwen te antre nan relasyon ak* dam* ki pwofèt la, li te vin ansent, e li te fè yon pitit gason+. Epi, Jewova di m: “Rele l Mayèchalalachbaz,  paske anvan tigason an konn di ‘papa’ ak ‘manman’, y ap pote tout sa ki nan Damas ak sa moun pran nan Samari yo ale devan je wa Asiri a+.”  Jewova pale avè m ankò, li di:   “Piske pèp sa a meprize dlo Siloye* a k ap koule byen dousman+,E yo kontan ak Rezin ak pitit gason Remalya a+,   Ebyen, gade! Jewova ap voyeWa Asiri a+, yon wa ki pisan anpil,Vin batay ak yo.L ap vin byen vit avèk gwo lame l la,Tankou lè gwo dlo Rivyè a* debòde   E li kouvri tout peyi Jida.L ap anvayi l e l ap pase tout kote, l ap rive ra kou+.Zèl li ap blayi sou tout lajè peyi w la,O Emànyèl*+!”   Nou menm pèp, nou mèt fè moun mal, men y ap kraze nou fè miyèt moso.Koute, nou tout ki sot nan zòn ki byen lwen sou tè a!Nou mèt prepare nou pou lagè*, men y ap kraze nou fè miyèt moso+!Nou mèt prepare nou pou lagè, men y ap kraze nou fè miyèt moso! 10  Nou mèt fè plan, men y ap kraze l.Nou mèt di sa nou vle, men sa pap mache,Paske Bondye avèk nou*+! 11  Pandan Jewova te met men l ki pisan sou mwen, men sa l te di m pou l avèti m pou m pa suiv chemen pèp sa a: 12  “Sa pèp sa a rele konplo, ou menm, pinga w rele l konplo.Ou pa dwe pè sa yo pè.Pinga sa fè w tranble. 13  Ou dwe sonje se Jewova, Chèf lame yo, sèlman ki sen+.Se pou li sèlman ou dwe gen lakrentif,E se li menm sèl ki dwe fè w tranble+.” 14  L ap vin tankou yon kote ki sakre,Men, l ap vin tankou yon wòch moun ka frape ladan lE tankou yon mas wòch pou fè moun bite+Pou moun nan toule de kay ann Izrayèl yo,Tankou yon pèlen e tankou yon pyèjPou moun ki rete Jerizalèm yo. 15  Anpil ladan yo ap bite, y ap tonbe e y ap blese grav.Y ap pran yo nan pyèj e y ap kenbe yo. 16  Vlope dokiman yo ekri kòm prèv la*,Mete so sou lwa a* nan mitan disip mwen yo. 17  M ap ret tann* Jewova+ ki kache figi l pou desandan Jakòb yo+, e m ap met espwa m nan li. 18  Gade! Mwen menm ansanm ak pitit Jewova ban mwen yo+, nou tankou siy+ ak mirak Jewova, Chèf lame yo, ki ret sou Mòn Siyon, bay ann Izrayèl. 19  Si yo di w: “Mande moun ki konn chèche pale ak mò yo oswa divinò yo k ap chwichwichwichwi e k ap pale tou ba yo”, èske se pa ak Bondye pa l yon pèp dwe pale? Èske li dwe pale ak mò pou ede moun ki vivan+? 20  Olye l fè sa, li dwe fouye nan lwa a ak nan dokiman ki ekri kòm prèv la*. Lè sa moun yo di yo pa ann amoni ak pawòl sa a, yo pa gen limyè*+. 21  Chak moun ap pase nan peyi a tou tris, tou grangou+. Piske yo grangou e yo fache, y ap gad anlè, epi y ap pale wa yo a ak Bondye yo a mal. 22  Apre sa, y ap gade atè, e sèl bagay y ap wè se malè ak fènwa, gwo fènwa ak tan difisil, fènwa pwès san pa gen okenn limyè.

Nòt anba paj

Petèt sa vle di: “Kouri vin piye; Vin piye yo byen vit”.
Lit.: “ak plim moun konn ekri”.
Oswa: “temwaye; sètifye”.
Lit.: “te ale toupre”.
Anpalan de madanm Ezayi.
Siloye se te yon kanal dlo.
Anpalan de Rivyè Efrat.
Oswa: “Mare senti nou”.
Mo ebre yo tradui “Bondye avèk nou” an se Emànyèl. Gade Eza 7:14; 8:8.
Oswa: “Vlope sètifika a”.
Oswa: “lòd la”.
Oswa: “Kè m cho pandan m ap tann”.
Oswa: “ak nan sètifika a”.
Lit.: “limyè douvanjou”.