Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Labib sou Entènèt | LABIB — TRADIKSYON MONN NOUVO A

Esdras 3​:​1-13

SA K LADAN L

  • Yo rekonstwi lotèl la e yo ofri sakrifis sou li (1-7)

  • Rekonstriksyon tanp lan kòmanse (8, 9)

  • Yo fè fondasyon tanp lan (10-13)

3  Lè setyèm mwa a+ te rive e Izrayelit yo* te nan vil kote yo te abite yo, yo te reyini nan Jerizalèm e yo tout te met tèt ansanm.  Jechwa+, pitit gason Jewozadak, ak lòt prèt menm jan avè l yo ansanm ak Zowobabèl+, pitit gason Cheyaltyèl+, ak frè l yo te leve pou yo bati lotèl Bondye Izrayèl la pou yo ka fè sakrifis yo boule nèt sou li, jan sa ekri nan Lwa Moyiz la+, sèvitè vrè Dye a.  Se konsa, yo te met lotèl la menm kote l te ye anvan an, malgre yo te pè pèp ki te abite nan zòn ki ozalantou yo+, epi yo te kòmanse fè sakrifis yo boule nèt pou Jewova sou li, sakrifis yo te konn fè maten ak aswè yo+.  Annapre, yo te fete fèt Tonèl* yo selon sa ki te ekri sou sa+, chak jou yo te fè kantite sakrifis yo boule nèt yo te dwe fè pou jou a+.  Apre sa, yo te ofri sakrifis yo abitye boule nèt chak tan an+ ak sakrifis yo konn fè pou nouvèl lin yo+ ak sa yo konn fè nan tout fèt sakre yo te fete pou Jewova nan chak epòk nan ane a+, ansanm ak sakrifis tout moun kè yo te pouse yo fè yon ofrann+ pou Jewova te bay.  Depi premye jou nan setyèm mwa a+, yo te kòmanse fè sakrifis yo boule nèt pou Jewova, aktout yo potko fè fondasyon tanp Jewova a.  Pèp la te bay moun ki t ap taye wòch yo+ ak lòt atizan yo+ lajan, yo te bay moun Sidon ak moun Ti yo manje, yo te ba yo bagay pou yo bwè e yo te ba yo luil poutèt yo te pote bwa sèd sou lanmè, soti Liban rive Jope+, jan Siris, wa peyi Pès la, te ba yo pèmisyon fè sa+.  Dezyèm ane apre yo te vin nan kay vrè Dye a nan Jerizalèm, nan dezyèm mwa a, Zowobabèl, pitit gason Cheyaltyèl, Jechwa, pitit gason Jewozadak, ak lòt frè yo te genyen yo, sa gen ladan l prèt yo ak Levit yo, ansanm ak tout moun ki te retounen Jerizalèm sot ann egzil yo+ te kòmanse travay konstriksyon an. Yo te chwazi Levit ki gen 20 an pou pi piti pou sipèvize travay k ap fèt nan kay Jewova a.  Se konsa, Jechwa ansanm ak pitit gason l yo ak frè l yo ak Kadmyèl ak pitit gason Kadmyèl yo, ki desandan Jida, te met tèt yo ansanm pou yo sipèvize travay konstriksyon kay vrè Dye a, e desandan Enadad yo+ ansanm ak pitit gason yo ak frè yo, sa vle di Levit yo, t ap sipèvize travay la avèk yo. 10  Lè bòs yo te fin fè fondasyon tanp Jewova a+, prèt yo ki te abiye ak rad yo te konn fè sèvis nan tanp lan te gen twonpèt+ nan men yo e Levit yo, pitit gason Asaf yo, te gen senbal nan men yo, yo tout te kanpe pou yo louwe Jewova, selon lòd David, wa peyi Izrayèl la+, te ba yo. 11  Epi, yo te kòmanse chante youn apre lòt+ pou yo louwe Jewova e pou yo di l mèsi, yo t ap di: “Paske li bon, e lanmou ki fidèl li gen pou pèp Izrayèl la la pou toutan+.” Tout pèp la te chante louwanj pou Jewova byen fò paske yo te fin fè fondasyon kay Jewova a. 12  Anpil nan prèt yo, Levit yo ak chèf fanmi yo, ansyen moun ki te konnen kay ki te la anvan an+, te kriye byen fò lè yo wè yo fin fè fondasyon kay la, toutpandan gen anpil lòt ki t ap rele ak tout fòs yo, tèlman kè yo te kontan+. 13  Konsa, moun pa t ka fè diferans ant bri moun ki te kontan yo ak rèl moun ki t ap kriye yo, paske pèp la te tèlman rele fò moun byen lwen te tande yo.

Nòt anba paj

Lit.: “pitit gason Izrayèl yo”.
Oswa: “Abri yo te fè pou yon ti tan”.