Al gade sa k anndan l

Ale nan lis ki di sa k anndan l lan

Esdras 1​:​1-11

SA K LADAN L

  • Dekrè wa Siris bay pou yo rebati tanp lan (1-4)

  • Dispozisyon yo pran pou egzile k ap soti Babilòn yo (5-11)

1  Nan premye ane rèy Siris+, wa peyi Pès la, Jewova te fè Siris pase yon dekrè nan tout wayòm li an yon fason pou pawòl Jewova te di pa mwayen Jeremi+ yo te kapab reyalize. Mete sou sa, wa a te ekri dekrè a+ ki te di:  “Men sa Siris, wa peyi Pès la, di: ‘Jewova, Bondye k ap dirije nan syèl la, ban m tout wayòm ki sou tè a+ e li ban m lòd pou m bati yon kay pou li Jerizalèm+, nan tribi Jida a.  Kèlkeswa moun ki fè pati pèp li a, se pou l monte Jerizalèm, nan tribi Jida a, pou l al rebati kay Jewova, Bondye Izrayèl la. Se li ki vrè Dye a, se li menm ki te gen kay li nan Jerizalèm nan*.  Nenpòt moun ki abite nan peyi a kòm etranje+, kèlkeswa kote moun sa a ye, se pou moun ki bò kote l yo* ede l. Y ap ba l ajan ak lò e y ap ba l pwovizyon ak bèt mete sou ofrann kè yo pouse yo fè pou kay vrè Dye a+ ki te nan Jerizalèm.’”  Apre sa, chèf fanmi ki nan tribi Jida ak tribi Benjamen yo ak prèt yo ansanm ak Levit yo, tout moun vrè Dye a te touche kè yo, te pare pou yo monte al rebati kay Jewova a ki te nan Jerizalèm.  Tout moun ki te bò kote yo te ede yo, yo te ba yo* veso ann ajan ak veso annò e yo te ba yo pwovizyon ak bèt ak bagay ki gen anpil valè mete sou tout ofrann yo te bay ak tout kè yo.  Epitou, veso Nebikadneza te pran nan kay Jewova a nan Jerizalèm al met nan kay dye l la+, wa Siris te mete yo deyò.  Siris, wa peyi Pès la, te mete yo deyò e li te bay Mitredat, trezorye a, responsab yo. Mitredat te konte yo pou Chechbaza*+, chèf peyi Jida a.  Men sa Mitredat te jwenn lè l te konte yo: 30 veso annò ki te tankou kòbèy, 1 000 veso ann ajan ki te tankou kòbèy, 29 veso ki ka ranplase lòt veso, 10  30 ti bòl annò, 410 ti bòl ann ajan ak 1 000 lòt veso. 11  Te gen antou 5 400 veso annò ak veso ann ajan. Chechbaza te ale ak tout nèt lè moun ki te ann egzil yo+ te kite Babilòn pou y al Jerizalèm.

Nòt anba paj

Se kapab tou: “li menm ki nan Jerizalèm”.
Lit.: “mesye ki nan zòn li yo”.
Lit.: “te bay men yo fòs ak”.
Petèt se Zowobabèl ki nan Esd 2:2 a ak Esd 3:8 la.