Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Labib sou Entènèt | LABIB — TRADIKSYON MONN NOUVO A

Eklezyas 10​:​1-20

SA K LADAN L

  • Yon senp ti betiz yon moun fè lakòz sajès li genyen vin san valè (1)

  • Danje ki genyen lè yon moun manke kapasite (2-11)

  • Moun ki sòt yo nan yon sitiyasyon ki tris (12-15)

  • Lè dirijan yo sòt (16-20)

    • Yon zwazo ka al di sa w di a (20)

10  Menm jan mouch mouri gate luil moun ki konn fè pafen, epi yo fè l vin gen move sant e yo fè l fè ti boul, se konsa tou yon senp ti betiz yon moun fè lakòz sajès ak glwa li genyen vin san valè+.  Kè moun ki gen sajès la mennen l nan bon chemen*, men kè moun ki sòt la fè l al nan move chemen*+.  Nan kèlkeswa wout moun sòt la pase, li pa aji avèk bonsans*+ e li fè tout moun wè jan l sòt+.  Si kòlè* yon chèf ta monte kont ou, pinga w deplase devan l+, paske lè yon moun ret dousman, sa diminye fòs gwo peche+.  Gen yon bagay ki bay pwoblèm mwen wè sou tè a*, yon erè moun ki sou pouvwa yo konn fè+:  Gen moun sòt yo met nan yon pil gwo pozisyon, men yo kite moun ki kapab yo* nan pozisyon ki ba yo.  Mwen wè esklav ki monte sou cheval, tandiske gen chèf k ap mache apye tankou esklav+.  Moun ki fouye yon twou ka tonbe ladan l+, e moun k ap kraze yon miray ki fèt ak wòch, yon koulèv ka pike l.  Moun k ap fouye pou pran wòch, wòch ka blese l, e moun k ap fann bwa, sa ka vin yon danje pou li*. 10  Si yon rach pa file e yon moun pa file l, moun k ap sèvi avè l la pral oblije fè yon pakèt efò. Men, sajès fè moun reyisi nan sa y ap fè. 11  Menmsi yon moun maton* nan chame sèpan, si sèpan an gentan pike l anvan l fè yon bagay pou l chame l, sa l pral fè a pap itil anyen. 12  Pawòl ki sot nan bouch moun ki gen sajès la fè yo apresye l+. Men, se bouch moun sòt la ki lakòz lanmò l+. 13  Premye pawòl ki sot nan bouch li se pawòl moun sòt+, dènye pawòl li yo se pawòl moun fou yo ye e yo ka fè gwo dega. 14  Malgre sa, moun ki sòt la kontinye pale+. Moun pa konnen ki sa k pral pase. Ki moun ki ka di l sa k pral rive apre l fin mouri+? 15  Travay di moun sòt la fè fini avè l, paske li pa menm konnen ki wout pou l fè nan vil la. 16  Ala traka pou yon peyi lè se yon timoun ki wa ladan l+, epi chèf yo kòmanse fè gwo resepsyon depi nan maten! 17  Se pa ti kè kontan ki genyen lè se pitit moun ki gen gwo pozisyon ki wa nan yon peyi, epi chèf yo manje alè pou yo ka gen fòs e yo pa bwè pou yo sou+! 18  Gen moun ki tèlman parese, sa lakòz plafon lakay yo tonbe. Se paske gen moun ki ret bra kwaze ki fè gen kay ki koule+. 19  Pen* la pou bay moun kè kontan e diven fè lavi a bèl+. Men, lajan pèmèt yon moun jwenn tout sa l bezwen+. 20  Pinga w bay wa a madichon, menm nan kè w*+, e pinga w bay yon moun rich madichon* anndan chanm ou. Paske yon zwazo* ka al di sa w di a* e yon bèt ki gen zèl ka repete sa w te di a.

Nòt anba paj

Lit.: “sou bò dwat li”.
Lit.: “sou bò goch li”.
Lit.: “Nan kèlkeswa wout moun sòt la mache, kè l manke”.
Lit.: “lespri; souf”.
Lit.: “wè anba solèy la”.
Lìt.: “moun ki rich yo”.
Se kapab tou: “li dwe pran prekosyon ak yo”.
Lit.: “mèt lang lan”.
Oswa: “Manje”.
Se kapab tou: “menm sou kabann ou”.
Oswa: “pinga w swete pou malè rive moun ki rich”.
Lit.: “yon kreyati k ap vole nan syèl la”.
Oswa: “ka al bay mesaj la”.