Al gade sa k anndan l

Ale nan lis ki di sa k anndan l lan

Ezekyèl 11​:​1-25

SA K LADAN L

  • Yo kondane chèf ki mechan yo (1-13)

    • Yo konpare vil la ak yon chodyè (3-12)

  • Bondye pwomèt pèp la ap retounen nan peyi a (14-21)

    • Bondye ap fè yo “panse yon lòt jan” (19)

  • Glwa Bondye deplase kite Jerizalèm (22, 23)

  • Ezekyèl retounen nan peyi Kalde nan yon vizyon (24, 25)

11  Apre sa, gen yon fòs ki leve m epi li mennen m nan pòtay kay Jewova a ki bay nan direksyon lès la+. Nan antre pòtay la, mwen te wè 25 gason. Yo te chèf nan mitan pèp la. Pami yo te gen Jayazànya, pitit gason Azou, ak Pelatya, pitit gason Benaya+.  Lè sa a, Bondye di m: “Pitit lòm, se mesye sa yo k ap fè konplo pou yo fè sa ki mal e k ap bay move konsèy nan* vil sa a.  Y ap di: ‘Èske se pa bon moman pou nou bati kay+? Vil la* se chodyè a*+ e nou menm nou se vyann nan.’  “Kidonk, pitit lòm, se pou w pwofetize kont yo. Wi, se pou w pwofetize kont yo+.”  Apre sa, lespri Jewova vin sou mwen+ epi Bondye di m: “Men sa pou w di: ‘Jewova di: “O nou menm, moun Izrayèl, sa nou di a se sa e mwen konn sa n panse*.  Nou lakòz anpil moun mouri nan vil sa a, e nou plen tout lari l yo ak kadav+.”’”  “Kidonk, men sa Jewova, Seyè ki Souvren an, di: ‘Kadav nou te lage toupatou nan vil la, se yo menm ki vyann nan, e vil la se chodyè a+. Men nou menm, y ap retire nou ladan l.’”  “‘Nou pè lagè+, men se lagè m ap fè frape nou.’ Se sa Jewova, Seyè ki Souvren an, di.  ‘M ap fè nou soti ladan l, m ap lage nou anba men etranje e m ap pini nou+. 10  Y ap touye nou ak kout epe+. M ap pini nou sou fwontyè Izrayèl la+ e n ap konnen mwen se Jewova+. 11  Vil la pap tankou yon chodyè pou nou e nou pap tankou vyann ki ladan l. M ap pini nou sou fwontyè Izrayèl 12  e n ap konnen mwen se Jewova. Paske, nou pa t mache selon kòmandman m yo e nou pa t obeyi lwa m yo+, men nou te obeyi lwa nasyon ki toutotou nou yo+.’” 13  Mwen annik fin pwofetize, Pelatya, pitit gason Benaya a, mouri. Lè sa a, mwen tonbe fas atè epi m kòmanse rele. Mwen t ap di: “Elas! O Jewova, Seyè ki Souvren an! Èske w ap fin detwi tout moun Izrayèl ki rete yo nèt+?” 14  Jewova pale avè m ankò, li di m: 15  “Pitit lòm, men sa moun ki abite Jerizalèm yo di frè w yo, frè w ki gen dwa pou yo rachte a, ansanm ak tout moun Izrayèl yo: ‘Se pou nou rete lwen Jewova. Peyi a se pou nou, nou te resevwa l kòm byen pa nou.’ 16  Kidonk, se pou w di: ‘Men sa Jewova, Seyè ki Souvren an, di: “Menmsi mwen voye yo ann egzil byen lwen nan nasyon yo e mwen gaye yo nan plizyè peyi+, m ap tounen yon kote ki sakre pou yo pandan yon ti tan, nan peyi kote yo ye yo+.”’ 17  “Kidonk, se pou w di: ‘Men sa Jewova, Seyè ki Souvren an, di: “Mwen pral chèche nou nan mitan pèp ak peyi kote m te gaye nou yo e m ap ban nou peyi Izrayèl+.” 18  “Y ap retounen nan peyi a, y ap detwi tout bagay ki bay degoutans yo e y ap sispann pratike tout vye bagay yo t ap pratike yo+. 19  M ap fè yo fè yon sèl*+, m ap fè yo panse yon lòt jan+, m ap retire kè yo gen anndan yo ki di kou wòch la+ e m ap ba yo yon kè ki sansib*+ 20  pou yo ka suiv kòmandman m yo ak lwa m yo, pou yo respekte yo e pou yo obeyi yo. Lè sa a, y ap retounen vin pèp mwen e m ap vin Bondye yo.”’ 21  “‘“Men, kanta pou moun ki byen deside pou yo ret atache ak bagay ki bay degoutans yo e pou yo kontinye pratike vye bagay y ap pratike yo, m ap fè yo peye pou sa.” Se sa Jewova, Seyè ki Souvren an, di.’” 22  Epi, cheriben yo leve zèl yo. Wou yo te bò kote yo+, e glwa Bondye Izrayèl la te anlè tèt yo+. 23  Apre sa, glwa Jewova+ monte sot nan vil la e l al rete pa anlè mòn ki alès vil la+. 24  Epi, nan yon vizyon Bondye ban mwen, gen yon fòs ki leve m e ki mennen m nan peyi Kalde, nan mitan moun ki ann egzil yo. Epitou, vizyon an fini. 25  Apre sa, mwen kòmanse rakonte moun ki ann egzil yo tout bagay Jewova te montre m yo.

Nòt anba paj

Oswa: “kont”.
Lit.: “Li”. Anpalan de Jerizalèm, vil kote Juif yo te panse yo t ap jwenn pwoteksyon an.
Oswa: “se chodyè bouch li men lajè a”.
Oswa: “konn ki sa ki monte nan lespri nou”.
Lit.: “M ap ba yo yon kè”.
Sa vle di yon kè ki dispoze fè sa Bondye di.