Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Labib sou Entènèt | LABIB — TRADIKSYON MONN NOUVO A

1 Wa 21​:​1-29

SA K LADAN L

  • Ahab anvi pran jaden rezen Nabòt la (1-4)

  • Jezabèl fè plan ki lakòz yo touye Nabòt (5-16)

  • Mesaj Eli kont Ahab (17-26)

  • Ahab imilye tèt li (27-29)

21  Apre sa, gen yon bagay ki te pase ki gen rapò ak yon jaden rezen Nabòt, yon moun Jizreyèl, te genyen. Jaden rezen an te Jizreyèl+, toupre palè Ahab, wa Samari a.  Ahab te di Nabòt: “Ban m jaden rezen w lan pou m ka fè yon jaden legim paske li toupre lakay mwen. M ap ba ou yon pi bon jaden rezen nan plas li. Oubyen, si w pi pito, m ap ba w kantite kòb li vo a.”  Men, Nabòt di Ahab: “Mwen pa ka ba w eritaj zansèt mwen yo te kite pou mwen an paske Jewova entèdi sa+.”  Lè Ahab tande sa, l al lakay li. Li pa t di anyen e li te tris anpil poutèt Nabòt, moun Jizreyèl la, te di l: “Mwen pap ka ba w eritaj zansèt mwen yo te kite pou mwen an.” Li lage kò l sou kabann li, li vire figi l bay mi kay la e li refize manje.  Annapre, Jezabèl, madanm li+, antre bò kote l, li di l: “Ki sa k fè w* tris konsa a, ki fè w refize manje a?”  Ahab di l: “Se paske mwen te di Nabòt, moun Jizreyèl la: ‘Vann mwen jaden rezen w lan. Oubyen, kite m ba w yon lòt jaden rezen nan plas li, si se sa w pito’, men li di m: ‘Mwen pap ba w jaden rezen m nan.’”  Jezabèl, madanm li an, di l: “Èske se pa ou ki wa Izrayèl ankò? Leve, manje yon bagay epi fè kè w kontan. M ap ba w jaden rezen Nabòt, moun Jizreyèl la+.”  Sa Jezabèl fè, li ekri plizyè lèt sou non Ahab, li sele yo ak so Ahab la+ epi li voye yo bay ansyen yo+ ak moun enpòtan ki t ap viv nan vil kote Nabòt rete a.  Men sa l te ekri nan lèt yo: “Fè moun yo konnen se pou yo rete san manje, epi fè Nabòt chita devan moun yo. 10  Apre sa, fè de voryen chita anfas misye pou yo akize l+, se pou yo di: ‘Ou pale Bondye ak wa a mal+.’ Apre sa, n ap mennen misye deyò vil la epi n ap kalonnen l ak kout wòch jis li mouri+.” 11  Vrèmanvre, mesye nan vil Nabòt yo, ansyen yo ak moun enpòtan ki t ap viv nan vil la fè egzakteman sa k te ekri nan lèt Jezabèl te voye yo. 12  Yo mande pou moun yo fè jèn* e yo fè Nabòt chita devan pèp la. 13  Lè sa a, gen de voryen ki vini, yo chita anfas Nabòt e yo kòmanse akize Nabòt devan pèp la. Yo t ap di: “Nabòt pale Bondye ak wa a mal+!” Annapre, yo ale avè l nan limit vil la, yo kalonnen l ak kout wòch jis li mouri+. 14  Apre sa, yo voye mesaj bay Jezabèl, yo di l: “Yo kalonnen Nabòt ak kout wòch jis li mouri+.” 15  Kou Jezabèl aprann yo kalonnen Nabòt ak kout wòch jis yo touye l, li voye di Ahab: “Leve, al pran jaden rezen Nabòt, moun Jizreyèl la+, nonm ki te refize vann ou jaden l lan, paske li pa vivan ankò. Li mouri.” 16  Kou Ahab tande Nabòt mouri, li leve pou l desann al nan jaden rezen Nabòt, moun Jizreyèl la, pou l pran l kòm byen pa l. 17  Men, Jewova voye mesaj bay Eli+, moun Tichbe a, li di l: 18  “Prepare w, epi desann al rankontre Ahab, wa Izrayèl la, ki Samari+ kounye a. Li nan jaden rezen Nabòt la, paske li vle pran l kòm byen pa l. 19  Se pou w di l: ‘Men sa Jewova di: “Èske w touye yon gason+ epi, mete sou sa, ou pran pwopriyete l la+?”’ Apre sa, w ap di l: ‘Men sa Jewova di: “Kote chen te niche san Nabòt la, se la chen ap niche san pa w+.”’” 20  Ahab di Eli: “Ki fè, ènmi m nan, ou jwenn mwen+?” Eli reponn: “Mwen jwenn ou. Bondye di: ‘Lefètke w detèmine* pou w fè sa ki mal nan je Jewova+, 21  m ap lage yon malè sou ou, m ap elimine w e m ap elimine tout gason* ki fanmi w+, menm sa ki pa gen moun pou ede yo ak sa ki fèb ann Izrayèl yo+. 22  M ap fè fanmi w vin menm jan ak fanmi Jewobowam+, pitit gason Nebat la, e menm jan ak fanmi Baacha+, pitit gason Ayija a, paske w fè m fache e paske w fè Izrayèl peche.’ 23  Mete sou sa, men sa Jewova di konsènan Jezabèl: ‘Chen ap manje Jezabèl nan moso tè Jizreyèl la+. 24  Nenpòt moun nan fanmi Ahab ki mouri nan vil la, chen ap manje l, e nenpòt moun nan fanmi l ki mouri nan savann nan, zwazo nan syèl la ap manje l+. 25  Vrèmanvre, pa t janm gen pèsonn ki te detèmine* pou l fè sa ki mal nan je Jewova tankou Ahab+. Se Jezabèl, madanm li+, ki t ap pouse l fè sa ki mal. 26  Li te aji mal anpil paske li te adore yon seri zidòl ki bay degoutans* menm jan ak Amorit yo, moun Jewova te mete deyò devan Izrayelit yo+.’” 27  Kou Ahab tande pawòl sa yo, li chire rad sou li, li met twal sak sou li, li ret san manje, li kouche ak twal sak la sou li. Mete sou sa, li te byen tris lè l t ap mache. 28  Epi, Jewova pale avèk Eli, moun Tichbe a, li di l: 29  “Èske w wè jan Ahab imilye tèt li devan m+? Poutèt sa, mwen pap lage malè sa a sou li pandan l vivan an. M ap lage malè a sou fanmi l lè pitit gason l lan vin wa+.”

Nòt anba paj

Lit.: “fè lespri w”.
Lit.: “vann tèt ou”.
Lit.: “tout moun ki konn pipi nan mi”. Ann ebre, se yon fason yo pale de gason pou yo rabese yo.
Lit.: “vann tèt li”.
Mo ebre yo itilize la a gen rapò petèt ak “poupou”, e yo itilize l pou bagay yo meprize.