Al gade sa k anndan l

Ale nan lis ki di sa k anndan l lan

1 Samyèl 27​:​1-12

SA K LADAN L

  • Moun Filisti yo bay David Ziklag (1-12)

27  Men, David te di nan kè l: “Yon jou, Sayil ap touye m. Pi bon bagay mwen dwe fè se kouri+ al nan peyi moun Filisti yo. Lè sa a, Sayil ap sispann chèche m nan tout tèritwa Izrayèl+, e m ap chape anba men l.”  Se konsa, David te pran 600 mesye+ ki te avè l yo e li t al jwenn Akich+, pitit gason Mawòk la, ki te wa Gat.  David ak tout mesye l yo te rete Gat, nan peyi Akich la. Yo chak te ansanm ak fanmi yo. David te ansanm ak de madanm li yo, Ayinowam+, moun Jizreyèl, ak Abigayil+, moun Kamèl, madanm defen Nabal.  Lè yo te vin di Sayil David kouri al Gat, li te sispann chèche l+.  Annapre, David di Akich: “Si w aksepte m, pèmèt yo ban m yon kote nan youn nan vil andeyò yo pou m rete. Mwen menm, sèvitè w la, mwen pa oblije rete nan menm vil avèk wa a.”  Konsa, jou sa a, Akich te bay David vil Ziklag+. Se sa k fè Ziklag toujou ret pou wa Jida yo jis jodi a.  David te pase ennan kat mwa ap viv andeyò nan peyi moun Filisti yo+.  David ansanm ak mesye l yo te konn al atake moun Gechou yo+, Gizit yo ak moun Amalèk yo+, paske yo te abite nan yon tèritwa ki soti depi Telam rive Chou+, e ki desann rive nan peyi Ejip.   Lè David t al atake yon peyi, li pa t konn kite ni gason ni fi vivan+. Men, li te konn pran mouton, bèf, bourik, chamo ak rad moun yo te genyen, epi li retounen al jwenn Akich. 10  Akich te konn mande l: “Ki zòn ou sot atake jodi a?” E David te konn reponn: “Sid* peyi Jida+” oswa: “Sid tèritwa moun Jerameyèl yo+” oubyen: “Sid tèritwa Kenit yo+”. 11  David pa t konn kite ni gason ni fi vivan pou l mennen nan vil Gat. Li te konn di: “Konsa, yo pap ka rakonte sa nou fè, pou yo ta di: ‘Men sa David te fè.’” (Se konsa David te konn fè pandan tout tan li t ap viv andeyò nan peyi moun Filisti yo.) 12  Se sa k fè Akich te kwè David e li te konn di nan kè l: ‘Ou mèt sèten pèp Izrayèl la rayi l. Konsa, l ap toujou ret ap sèvi m.’

Nòt anba paj

Oswa: “Negèb”.