Al gade sa k anndan l

Ale nan lòt meni an

Ale nan lis ki di sa k anndan l lan

Temwen Jewova yo

Kreyòl ayisyen

Labib sou Entènèt | LABIB — TRADIKSYON MONN NOUVO A Gade edisyon 2015 lan

Jak 5​:​1-20

5  Kounye a, tande non, NOU menm moun ki rich: se pou NOU kriye, se pou NOU rele akoz malè k ap vin sou NOU.  Richès NOU yo pouri, e mit fin manje rad NOU.  Lò ak ajan NOU yo fin wouye. Wouy ki sou yo bay temwayaj kont NOU e l ap manje chè NOU. Sa NOU sere nan dènye jou yo pral tankou yon dife.  Gade! Lajan NOU dwe travayè ki te fè rekòt pou NOU nan jaden NOU yo kontinye rele, e rèl anmwe moun ki te fè rekòt pou NOU yo rive nan zòrèy Jewova, Chèf lame yo.  NOU dèyè viv nan liks sou tè a, e ap chèche fè tèt NOU plezi. NOU angrese kè NOU pou jou y ap touye NOU an.  NOU kondane moun ki jis la, e NOU menm rive asasinen l. Èske li pa kanpe kont NOU?  Kidonk frè m yo, montre NOU gen pasyans, jiskaske prezans Seyè a kòmanse. Gade! Kiltivatè a ret ap tann bonjan fwi ki sot nan tè a. Li montre pasyans pou sa, jiskaske premye sezon lapli a ak dènye sezon lapli a rive.  NOU menm tou, montre NOU gen pasyans, fè kè NOU fèm, paske prezans Seyè a vin pi pre.  Frè m yo, pinga youn plenn kont lòt, dekwa pou NOU pa sibi kondanasyon. Gade! Jij la kanpe devan pòt la. 10  Frè m yo, nan kesyon sipòte sa ki mal ak demontre pasyans, pran pwofèt ki te pale nan non Jewova yo kòm egzanp.  11  Gade! Nou deklare moun ki andire yo byennere. Nou tande pale de andirans Jòb, e nou wè ki jan Jewova te fè bagay yo fini pou li, sa ki montre Jewova gen anpil konpasyon ak anpil mizèrikòd. 12  Men anvan tout bagay, frè m yo, sispann sèmante, kit se sou syèl la, oubyen sou tè a, oswa sou nenpòt lòt bagay. Men, se pou Wi NOU se Wi, e se pou Non NOU se Non, yon fason pou NOU pa sibi kondanasyon. 13  Èske gen yon moun pami NOU k ap soufri? Se pou l priye. Èske gen yon moun ki gen kè kontan? Se pou l chante chan louwanj. 14  Èske gen yon moun pami NOU ki malad? Se pou l rele ansyen yo nan kongregasyon an vin kote l, e se pou yo priye pou li, pou yo pase luil sou li nan non Jewova. 15  E lapriyè yo fè ak lafwa ap fè moun ki malad la refè, e Jewova ap leve l. Epitou, si l te fè peche, l ap jwenn padon. 16  Kidonk, se pou NOU konfese peche NOU yo aklè youn bay lòt, e se pou NOU priye youn pou lòt, dekwa pou NOU ka geri. Lè yon moun ki jis fè yon siplikasyon, sa gen anpil fòs e sa efikas. 17  Eliya te yon moun menm jan avèk nou, epoutan li te priye ak tout kè l pou lapli pa tonbe, e lapli te fè twazan sis mwa li pa tonbe nan peyi a. 18  Apre sa, li priye ankò, e syèl la bay lapli, epi tè a bay manje. 19  Frè m yo, si yon moun pami NOU kite chemen verite a epi yon lòt moun fè l retounen, 20  konnen kèlkeswa moun ki fè yon pechè retounen sot nan move chemen l ye a ap sove nanm pechè a anba lanmò, e l ap kouvri yon pakèt peche.

Nòt anba paj