1^ye JIYÈ 2026
LARISI

Soti agoch al adwat: Frè Roman Khorikov, frè Yuriy Khorikov ak frè Kirill Severinchik

“Lapriyè se remèd ki pi pisan kont dekourajman”

FÈ L JWE

Nan dat 19 jen 2026 la, tribinal vil Sougout, nan tèritwa otonòm Kanti-Mansi ak Yougra a, kondane frè Roman Khorikov, frè Yuriy Khorikov ak frè Kirill Severinchik. Yo kondane frè Roman Khorikov pou l pase sizan kat mwa nan prizon, frè Yuriy Khorikov pou l pase sizan sis mwa nan prizon e frè Kirill Severinchik pou l pase katran nan prizon.

Enfòmasyon sou yo

Roman Khorikov

Dat ak kote li fèt: 1988 (Sougout)

Dat li batize: 2009

Lòt enfòmasyon sou li: Li te travay kòm mekanisyen. Li marye ak Filiya an 2020. Yo kondane Yuriy, papa l, nan menm dosye a.

Akizasyon ki sou do l: Li òganize e li finanse aktivite yon òganizasyon ekstremis.

Santans yo ba li: Yo kondane l pou l pase sizan kat mwa nan prizon.

Kòmantè li fè

Ki sa k ede w fè fas ak sitiyasyon sa yo ou pa t atann?

Pandan tout tan sa a, mwen te santi m tankou yon moun yo mare nan yon kòd paske m t ap tann ki lè y ap vin fouye kay nou, èske y ap akize m, ki lè y ap fè pwosè a, e finalman, ki desizyon y ap bay. Lefètke m pa t konn sa k pral rive, sa te vrèman fè m enkyè. Men, malgre tout sa, mwen rann mwen kont lapriyè se pi gwo remèd kont dekourajman. Mwen ouvri kè m bay Jewova pou m di l tout sa k nan panse m ak tout sa m santi, epi apre sa, mwen fè efò pou m chèche wè benediksyon m jwenn yo, menm sa k piti anpil yo. Sa ede m toujou kenbe Jewova nan lespri m, e sa fè m vin gen yon lapè pèsonn pa ka pran nan men m.

Yuriy Khorikov

Dat ak kote li fèt: 1967 (Inyon Sovyetik)

Dat li batize: 2004

Lòt enfòmasyon sou li: Li te travay labank. Li marye ak Irada nan ane 1987. Yo gen yon pitit gason ak yon pitit fi. Yo te kondane Roman, pitit gason yo a, nan menm dosye a.

Akizasyon ki sou do l: Li òganize e li finanse aktivite yon òganizasyon ekstremis.

Santans yo ba li: Yo kondane l pou l pase sizan sis mwa nan prizon.

Kòmantè li fè

Ki sa k ede w pou w pa kite panse ak santiman negatif pote w ale?

Pwovèb 24:10 di: “Si w dekouraje nan jou malè a, w ap prèske san fòs.” Piske m konnen m bezwen rete djanm, mwen toujou fè efò pou m rete pozitif. Li enpòtan anpil pou m konsantre sou esperans mwen genyen an. Mwen toujou fè efò pou m sonje n ap viv nan dènye bout dènye jou yo e talè konsa, pwoblèm sa yo pral fini. Lè m pale ak Jewova chak jou sou tout sa k ap enkyete m, sa toujou soulaje m. Mwen gen anpil rekonesans pou madanm mwen ak pitit fi m nan tou. Sipò yo toujou ban mwen ak bonte yo demontre nan sa yo di ak sa yo fè toujou ban m fòs.

Kirill Severinchik

Dat ak kote li fèt: 1997 (Sougout)

Lòt enfòmasyon sou li: Li te travay kòm elektrisyen pou asansè. Anvan sa, yo te kondane frè Artur Severinchik, papa l, pou l pase sizan twa mwa nan prizon.

Akizasyon ki sou do l: Li patisipe nan reyinyon relijye Temwen Jewova yo.

Santans yo ba li: Yo kondane l pou l pase katran nan prizon.

Kòmantè li fè

Ki leson w aprann nan eksperyans sa a?

Pandan m ap pase anba eprèv sa a, gen anpil bagay mwen pa ka kontwole. Sepandan, sa m ka fè, se bay bagay ki pi enpòtan yo premye plas nan lavi m. Piske monn sa a ap vin pi mal chak jou, mwen kontinye pran plis manje espirityèl. Sa mande pou m pran ase tan pou m li Pawòl Bondye a e pou m medite sou li. Toutotan m kontinye kenbe pwogram sa a, mwen gen konfyans Jewova pap janm abandone m.

Sa rekonfòte nou lè nou konnen Jewova toujou veye sou bezwen pèp li a e li toujou pare pou l fòtifye yo epi ede yo. — Sòm 121:3, 4.

“Lapriyè se remèd ki pi pisan kont dekourajman”

Enfòmasyon sou yo

Chwazi lang ou an