Nan dat ki te 9 novanm 2024 la, yon dife forè te kòmanse nan yon distans anviwon de kilomèt nan direksyon nodwès toupre Syèj mondyal Temwen Jewova yo nan Wòwik, Nouyòk, Ozetazini. Dife sa a ki t ap avanse tou dousman te gentan boule plis pase 2 000 kawo tè. Otorite lokal yo fè konnen dife a kapab pèsiste jiskaske lapli tonbe nan zòn nan.

Pou kounye a, pa gen yon gwo menas pou bilding Betèl yo nan zòn nan, sa gen ladann Wòwik, chantye konstriksyon Ramapo a ak stidyo ki toupre Tòksido a. Sepandan, frè nou yo kontinye rete vijilan e yo pran bonjan dispozisyon pou pwoteje fanmi Betèl la ak bilding yo (Pwovèb 22:3). Frè Luke Saladino, k ap sèvi antanke manm Komite filyal Etazini an, di: “Apre dife a te kòmanse, san pèdi tan nou te asiyen plizyè frè nan Wòwik pou siveye dife a 24 sou 24. Yo te asiyen yon ekip ijans, ki gen ladan l frè ak sè, pou retire tout fèy sèch ki te tonbe toupre bilding yo, pou yo vide dlo anba plant ki sou tèt bilding yo e pou yo pran lòt dispozisyon pou pwoteje bilding yo. Anplis de sa, nou te ankouraje manm fanmi Betèl Wòwik la pou yo prepare valiz sekou yo e pou yo prepare yo pou yo deplase si sa nesesè. Erezman, jiska prezan, li pa t nesesè pou yo deplase.”

Ponpye yo ak ekip ijans nan zòn ki toupre yo travay san pran san souf pou yo ka rive kontwole dife a. Pou n montre apresyasyon nou pou moun k ap travay pou etenn dife a, plizyè depatman nan Betèl la travay ansanm pou yo rive ba yo manje, dlo pou yo bwè ak lòt bagay ankò. Frè Saladino ajoute: “Nou remèsye tout gason ak fi sa yo pou travay di yo fè an favè nou menm ak vwazen nou yo nan kondisyon danjere sa yo.”

N ap kontinye priye pou Jewova bay tout moun dife forè sa a afekte “sajès” e pou l ede yo “aprann reflechi”. (Pwovèb 3:21.)