Xpring tsu was too trin is

tsum sekundeer menu xpringe

Yeehoowa sayn Tsayer

Hunsrik

Teest tuu kërn ti woerheet khëne?

Teest tuu kërn ti woerheet khëne?

TI WOARHEET iwer was? Iwer phaar wichtiche frooche woo ti layt sich xon kemacht hon. Fiilaycht, host tuu tich xon kefroot:

  • Meecht Kot sich wërklich khimere mit uns?

  • Meecht te kriich un ti traurichkheet een ën kriin?

  • Was paseert noom toot?

  • Këpts een hofnung fer ti toote?

  • Was mus ich mache tas Kot mayn kepeete aan heert?

  • Wii khëne mëyer ti frooheet fine?

Woo khanst tuu ti antworte fer tiise frooche fine? Wëns tuu in een puuch haus keest, khan sin tas tuu milioone piicher finst, woo saan tas tii ti antworte hëte. Awer oft tuun ti piicher nët eene mit te anere xtime. Torich een tsayt, maniche siin richtich aus, awer klaych xtimt nimer was tat trin xteet un tii mise noo kekukt un ketrokt këpe.

Awer es këpt een puuch woo ti richtiche antworte këpt. Tas is een puuch fon te woerheet. Yeesus Kristus hot im kepeet fer Kot kesaat: “ Tayn wort is ti woerheet.” (João 17:17) Hayt, khëne mëyer tas Wort wii ti Haylich Piipel. Kuk yëts mool phaar khortse antworte fon te Piipel woo mëyer traan klaape khëne, fer ti frooche woo oowe traan xteen.

 Meecht Kot sich wërklich khimere mit uns?

WAROM TUNN TI LAYT TAS FROOE:

Mëyer leepe in eene xlëcht un unrëcht wëlt. Fiile relichioone lërne tas unser eelent, Kot sayne wile is.

WAS SAAT TI PIIPEL:

Ti xlëchtichkheet khomt nii fon Kot. In Jó 34:10 xteet: “Waytfat is tas fom woere Kot xlëchtes se mache, un fom Alemëchtiche unrëchtes se mache!’’ Kot hot sich was kuutes foer kenom fer ti mënxe. Tës wëche hot Yeesus uns kelërnt se peete: “Unser fater in himel,  . . . tayn raych khome. Tayne wile këp kemacht, wii im himel, soo aach uf te ëyert.” (Mateus 6:9, 10) Kot khimert sich soo aarich mit uns, tas Ëyer ales kemacht hot fer se karanteere tas sayne wile kemacht këp. — João 3:16.

Lees aach Gênesis 1:26-28; Tiago 1:13 un 1 Pedro 5:6, 7.

Meecht te kriich un ti traurichkheet een ën kriin?

WAROM TUUN TI LAYT TAS FROOE:

Hayt tuun noch imer fiil layt in kriiche um khome. Yeete eene fon uns hot xon was trauriches mit kemacht.

WAS SAAT TI PIIPEL:

Kot saat tas Ëyer friite pringe tuut uf te kans Ëyert. Unich tëm sayn raych, een rechiirung fom himel, tuun ti layt “nime te kriich lërne”. Xtats tas, tuun tii “fon sayn xwaate pluuch xaare klope”. (Isaías 2:4) Kot tuut tas kanse unrëcht un ti traurichkheet tsum ën pringe. Ti Piipel ferxprëcht: “Kot tuut yeete treene fon tëne sayn aue ap trokne un es këpt kheen toot mee, kheen trauer, kheen krayxe un kheen phayn. Ti friirixe tings [mitsamer tëm unrëcht un tas eelent in unser tsayt] sin rom kang.” — Revelação (Apocalipse) 21:3, 4.

Lees aach Salmo 37:10, 11; 46:9 un Miqueias 4:1-4.

Was paseert noom toot?

WAROM TUUN TI LAYT TAS FROOE:

Ti mëyeste relichioone lërne tas etwas leepentich playpt in unser khërwer noom toot. Ëtliche saan ti toote khëne xlëchtichkheet mache fer tii woo am leepe sin un tas Kot ti xlëchte in te fayer heel fer imer xtroofe teet.

WAS SAAT TI PIIPEL:

Noom toot, tuun ti mënxe nimer eksisteere. “Ti toote . . . sin sich kaar niks mee kewaar”, saat Eclesiastes 9:5. Ti toote wise niks, xpeere niks un khëne niks mee mache, tii khëne fer tii woo leepe niks xlëchtes mache un tëne aach nët hëlfe. — Salmo 146:3, 4.

Lees aach Gênesis 3:19 un Eclesiastes 9:6, 10.

 Këpts een hofnung fer ti toote?

WAROM TUUN TI LAYT TAS FROOE:

Mëyer wole leepe. Un mëyer wole tas kërn tuun, mit te layt woo mëyer liipe. Tas is normal ti liipe layt woo toot sin noo mool siin se wole.

WAS SAAT TI PIIPEL:

Ti mëyeste layt woo toot sin, këpe ufkeruuft. Yeesus hot ferxproch: “tii woo im kraap sin . . . tuun raus khome.” ( João 5:28, 29) Soo wii Kot sich am aanfank foer kenom hot, tii woo fom toot ufkeruuft këpe, fers leewe uf te Ëyert, tuun tan im Paratiis leepe. (Lucas 23:43) Kot hot ferxproch tas ti layt woo Tee aan heere, tuun perfëkt kesuntheet un eewich leewe hon. Ti Piipel saat: “Ti rëchte sëlepst kriin ti Ëyert un tuun too truf fer imer woone.” — Salmo 37:29.

Lees aach Jó 14:14, 15; Lucas 7:11-17 un Atos 24:15.

Was mus ich mache tas Kot mayn kepeete aan heert?

WAROM TUUN TI LAYT TAS FROOE:

Layt fon te mëyeste relichioone tuun peete. Awer fiile layt mëne tas sayn kepeete nët aan keheert këpe.

WAS SAAT TI PIIPEL:

Yeesus hot uns kelërnt nët imer ti sëlwiche wërter noo un noo se saan. Ëyer hot kesaat: “Wëns tuu am peete pist, tuu nët imer ti sëlwiche tings mool uf mool saan.” (Mateus 6:7) Wën mëyer wole tas Kot unser kepeete aan heert, mise mëyer soo peete wii Ëyer es aan neemt. Fer tas, mise mëyer lërne was Kot sayne wile is un tan iwer tas peete woo mit sayne wile xtimt. In 1 João 5:14 xteet: “Tas is een tuun was mëyer ferlange, Ëyer heert uns wën tas mit sayne wile xtimt.”

Lees aach Salmo 65:2; João 14:6, 14 un 1 João 3:22.

Wii khëne mëyer ti frooheet fine?

WAROM TUUN TI LAYT TAS FROOE:

Fiile layt mëne tas këlt hon, pekhant sin un xeenheet, frooheet pringt. Soo xtrënge tii sich aan fer tas se kriin — un, wën tii tas tsamer kriit hon, khome se tehiner tas se nët froo sin.

WAS SAAT TI PIIPEL:

Yeesus hot aus keleet wii mëyer wërklich froo sin khëne. Ëyer hot kesaat: “Froo sin tii woo Kot sayn wort heere un es pehale.” (Lucas 11:28) Fer wërklich froo se sin, mise mëyer was mache fer raus se fine was mëyer wise wole un woo notwëntich is fer uns: ti woerheet iwer Kot un was Ëyer fer uns foer hot. Tiise woerheet xteet in te Piipel. Tas se khëne hëlft uns se ferneeme was wërklich wichtich is un was nët. Wën mëyer lose tas ti woerheet fon te Piipel lënkt was mëyer raus suuche un was mëyer mache, tan hot unser leewe wëyert. — Mateus 5:3.

Lees aach Provérbios 3:5, 6, 13-18 un 1 Timóteo 6:9, 10.

 Tas sin seks khortse antworte fon te Piipel. Wilst tuu mee wise? Wëns tuu aan neemst tas Kot sayn wort notwëntich is, tan is tayn antwort kewis yaa. Im xtan host tuu anere frooche, wii: Wën Kot sich khimert mit ti layt, warom lost Ëyer soo fiil xlëchtichkeet un eelent fer soo lang tsayt paseere? Wii khan ich mayn familye leewe ferpësre? Ti Piipel këpt kenaue antworte fer tiise un anere frooche.

Awer, fiil layt hayt se taach tuun nët ti Piipel leese. Tii mëne tas wëyer een kroos puuch woo manich mool xweer se ferxteen is. Wilst tuu een hilef hon fer ti antworte fon te Piipel see fine? Yeehoowa sayn Tsayer tuun teer tswaay hilef aan piite.

Ti ëyerst is tas piichelche Heer Kot aan un Leep fer Imer, woo kemacht is fer antworte fon te Pii­pel raus se fine. Ti tsweete is een Piipel kurs woo umsonst is. Eene fon Yeehoowa sayn Tsayer khan tsu tayn haus khome, orer een anere plats woos tuu wilst un mit teer yeete woch phaar minute iwer ti Piipel xprëche. Te kurs hot xon milioone layt in te khanse wëlt mit keholef. Fiil sin froo këp un hon kesaat: “Ich hon ti woerheet kefun.”

Mer khan niks fine woo mee wëyert hot. Ti woerheet fon te Piipel macht uns fray fon awerklaape, torich eenaner un fon kroos ëngst. Tii këpt unser leewe wëyert, hofnung un frayt. Yeesus hot kesaat: “Tëyer tuut ti woerheet khëne, un ti woerheet tuut aych fray mache.” – João 8:32.