Xpring tsu was too trin is

tsum sekundeer menu xpringe

Tsum Sumaario xpringe

Yeehoowa sayn Tsayer

Hunsrik

Kuute Aatere fon Kot fer Tich!

 LISIOON 2

Weer is Kot?

Weer is Kot?

1. Warom mise mëyer Kot aan peete?

Te woere Kot is Tee woo ales kemacht hot. Tee hat khee aanfang un kriit aach nii en ën. (Salmo 90:2) Fon Tëm khome ti kuute aatere woo mer in te Piipel fine. (1 Timóteo 1:11) Wayl Kot uns es leewe këp hot, mise mer ploos Tee aan peete. —Lees Apocalipse 4:11.

2. Wii is Kot?

Khee eene mënx hot xon Kot kesiin, wayl Ëyer een Kayst is. Tas petayt tas Tee heecher is wii ti kriatuure woo uf te Ëyert ­leepe. (João 1:18; 4:24) Awer, mëyer khëne Kot sayn persoonlichkheet lërne khëne torich es tings woo Tee kemacht hot. Tsum payxpiil, ti sorte friichte un pluume tsayche sayn liipe un kluucheet. Ti kreest fom Uniwersum wayst Kot sayn kroos macht. —Lees Romanos 1:20.

Torich ti Piipel, khëne mer mee iwer Kot sayn persoonlichkheet lërne. Tsum payxpiil, tii leet aus was Kot kërn un was Ëyer nët kërn hot, wii Tee mit te layt umkeet un sich aan xtëlt in ale situatsioone. —Lees Salmo 103:7-10.

3. Hot Kot en naame?

Yeesus saat: “Unser Fater im himel, tayn naame wërt kehaylicht.” (Mateus 6:9) Opwool Kot fiil thitele hot, ëyer hot ploos eene naame. In yeete xprooch, tiise naame wërt anërste aus kexproch. In Hunsrik, seet mer “Yeehoowa”. Awer ëtliche layt saan “Yawë”. —Lees Salmo 83:18.

Kot sayn naame is fon fiile Piiple raus kehool këp, un uf tëm plats sin thitele wii Hër orer Kot inkextëlt. Awer, in te tsayt woo ti Piipel këxrip këp is, tiise naame hot soo umkefeer 7 tausent mool trin kextant.  Yeesus hot Kot sayn naame pekhant kemacht wën tee ti layt iwer Kot inkelërnt hot. —Lees João 17:26.

4. Khimert Yeehoowa sich mit uns?

Soo wii te liipe fater, macht Kot ëtwas tas es uns fer imer kuut keet

Wën Yeehoowa sich wërklich mit uns khimert, warom lost Tee ti kans traurichkheet paseere? Ëtliche saan tas Tee uns torich xwiirichkheete proopt, awer tas is nët woer. —Lees Tiago 1:13.

Kot hot uns fray kelos fer raus se suuche was mer mit unser leewe mache wole. Mënst tuu nët tas tas kuut is, frayheet se hon fer raus se suuche wën mëyer wole, orer nët, Kot tiine? (Josué 24:15) Awer, fiil suuche raus xlëcht tings fer ti anere mache, tës weeche is soo fiil traurichkheet. Yeehoowa wërt traurich wën Tee tas unkerëcht siit. —Lees Gênesis 6:5, 6.

Yeehoowa is en Kot woo sich mit uns khimert. Tee wil tas mëyer frooheet im leewe hon. In khorts tsayt, tuut Tee ti traurichkheet un tii woo tas mache, fernichte. Foerlaywich, hot Tee een kuut tswëk fer ti traurichkheet noch een tsayt paseere lose. In te lisioon 8, lërne mer was tas fer tswëk is. —Lees 2 Pedro 2:9; 3:7, 13.

5. Wii khëne mer tichter pay Kot khome?

Yeehoowa laat uns in, fer torich es kepeet, tichter pay Tee se khome. Ëyer khimert sich mit yeete eene fon uns. (Salmo 65:2; 145:18) Kot is pextimt fer uns peroye un siit unser aanxtrëngung fer Tee froo se lose, soo kaar wën mëyer als mool was ferkheert mache. Opwool mëyer feeler hon, khëne mer noch een kuut froyntxaft mit Kot hon. —Lees Salmo 103:12-14; Tiago 4:8.

Yeehoowa hot uns es leewe këp, tës weeche mise mer Tee iwich ales liipe. (Marcos 12:30) Tuu tuust tayn liipe iwer Kot tsayche, wëns tuu mee fon tëm lërnst un machst was Ëyer ferlangt. Soo, tuust tuu tichter pay Tee khome. —Lees 1 Timóteo 2:4; 1 João 5:3.