1. Sin ti kanse relichioone kuut?

Es këpt eerliche persoone in te kanse relichioone. Tas is mool sicher een kuut aater, se wise tas Kot ti layt siit un khimert sich mit tëne. Awer, tas is een leet tas ti relichioon penuts wërt fer xlëchtes se mache. (2 Coríntios 4:3, 4; 11:13-15) Torich ti notisie siit mer tas ëtliche relichioone soo kaar sich rin mëxe in terorismus, folek fernichtung, kriiche, kueeleray un sëksuaal wiolënts keeche khiner. Tas tuut eerliche layt, woo aan Kot klaawe, soo traurich lose! —Lees Mateus 24:3-5, 11, 12.

Ti woere relichioon tuut Kot loope, uf aner sayt, tuut ti falx relichioon Kot nët kefale. Tii tuut ketanke in lërne woo nët in te Piipel sin, un too tepay sin falxe lërnunge iwer Kot un iwer ti toote. Awer, Yeehoowa wil tas ti layt sole ti woerheet iwer tee wise. —Lees Ezequiel 18:4; 1 Timóteo 2:3-5.

2. Was këpts mit te relichioone?

Es këpt relichioone woo saan tas se Kot liipe, awer tuun wërklich Satanaas sayn wëlt liipe, un too te mit, wërt Kot nët froo. (Tiago 4:4) Kot sayn Wort nënt ti falxe relichioone wii “Paapiloon, ti Kroos”. Noo em Sintfluut, fon Noee sayne taache, waar Paapiloon ti friirich xtat woo ti falx relichioon aankefang hot. In khorts tsayt, tuut Kot ti relichioone woo unertrike un hiner keen, uf mool tsum ën pringe. —Lees Apocalipse 17:1, 2, 5, 16, 17; 18:8.

Es këpt noch mee kuute aatere. Yeehoowa ferkëst sich nët fon te eerliche layt woo iweral in te falxe relichioone sin. Tee tuut ti woerheet fer tii layt in lërne, un tas hëleft se fon te falx relichioon raus se keen. —Lees Miqueias 4:2, 5.

 3. Was mise ti eerliche layt mache?

Ti woere relichioon tuut ti layt eenich lose

Yeehoowa khimert sich mit te layt woo ti woerheet wole wise un mache was kuut is. Tee seet tas se sole fon te falx relichioon raus keen. Ti layt woo Kot liipe, sin pextimt fer sich se ënere fer Kot froo se lose. —Lees Apocalipse 18:4.

In te ëyerste hunert yoore, eerliche layt hon ti kuute aatere fon Kot, woo se torich ti aphostele keheert hon, mit frooheet aan kenom. Yeehoowa hot tëne een naye aat fer es leewe in kelërnt, een frooer leewe, mit richtung un hofnung. Tii sin een kuut payxpiil fer uns, wayl se es pexeet fon Kot aan kenom hon, un hon tas ins ëyerste xtël in sayn leewe ketuun. —Lees 1 Tessalonicenses 1:8, 9; 2:13.

Yeehoowa nëmt aan, in sayn aanpeeter familye, tii woo sich fon te falx relichioon wëch lose. Wënst tuu Yeehoowa sayn hërtslich inlaatung aan nëmst, kriist tuu tëm sayn froyntxaft, een liiplich familye fon Yeehoowa sayn aanpeeter, un es eewich leewe. —Lees Marcos 10:29, 30; 2 Coríntios 6:17, 18.

4. Warom is es ën, fon te falxe relichioone, een kuut aater?

Wën Kot ti falxe relichioone fernicht, wërts leewe uf te wëlt laychter fon te unertrikung. Tii tuun nii mee ti layt hiner keen un aus naner hetse. Ti kanse layt wëre tan eenich fer te eensiche woere Kot aan se peete. —Lees Apocalipse 18:20, 21; 21:3, 4.