Xpring tsu was too trin is

tsum sekundeer menu xpringe

Tsum Sumaario xpringe

Yeehoowa sayn Tsayer

Hunsrik

Was khan ti Piipel uns in lërne?

 KAPITEL FËRTSEEN

Tayn familye khan froo sin

Tayn familye khan froo sin

1, 2. Was wil Yeehoowa fer ti familye?

YEEHOOWA KOT hot tas ëyerste phëyerche tsusamer ketuun. Ti Piipel saat tas er ti ëyerst fraa kemacht un “tii tsum man kenom” hot. Aatam is soo froo këp tas ëyer kesaat hot: “Tiise is ëntlich knoche fon mayn knoche un flayx fon mayn flayx.” (Gênesis 2:22, 23) Yeehoowa wil tas ti familye froo sin.

2 Es is traurich tas fiile layt nët wise wii een frooes familye leepe is. Awer, ti Piipel hot fiile printsiipie woo ale in te familye hëlfe tuun froo un eenich tsusamer se leepe. (Lucas 11:28)

WAS TUUT KOT FON TE MËNER WAARTE?

3, 4. (a) Wii sol te man mit sayn fraa um keen? (b) Warom is es important tas man un fraa eene tëm anere fertsayt?

3 Ti Piipel saat tas een kuute man mit liipe un respëkt mit sayn fraa um keen sol. (Lees Efésios 5:25-29) Een kuute man tuut imer sayn fraa liip pehantele, un tuut se uf phase. Ëyer tuut aach khee xaate fer tii mache.

4 Awer was sol een man mache wën sayn fraa feeler macht? Ti Piipel saat fer ti mëner: “Tuu wayter tayn fraa liipe un tuu nët piterlich pees mit tee këpe.” (Colossenses 3:19) Mëner, erinert aych tas tëyer aach feeler macht. Un wën tëyer wolt tas Kot aych fertsayt, mist tëyer ayre fraae fertsaye. (Mateus 6:12, 14, 15)  Wën man un fraa wilich sin fer eene tëm anere se fertsaye, tuut tas tëne hëlfe froo tsusamer se leepe.

5. Warom sol te man sayn fraa respëktiire?

5 Yeehoowa wil tas te man sayn fraa respëktiirt. Een man sol sich iwer tas khimere woo sayn fraa hon mus. Tas is was ërnstes, wayl, wën te man nët kuut mit sayn fraa um keet, tuut Yeehoowa tëm sayn kepeete fiilaycht nët aan heere. (1 Pedro 3:7) Yeehoowa këpt wëyert fer ti mënxe woo tee liipe tuun, een tuun op se mëner orer fraae sin.

6. Was petayt es fer man un fraa “een flayx” se sin?

6 Yeesus hot aus keleet tas te man un ti fraa ‘nët mee tswaay, awer een flayx sin.’ (Mateus 19:6) Tii sin leaal un tuun nii untroy eene mim anere sin. (Provérbios 5:15-21; Hebreus 13:4) Mëner un fraae woo ferhayrat sin sole sich eene mit te seksuël neetichkheete fom anere khimere. (1 Coríntios 7:3-5) Te man sol traan tënke tas ‘khee man sayn aychne khërper hast, awer tuut tëm ëse këpe un uf phase.’ Soo, mus ëyer sayn fraa liipe un uf phase. Ales was een fraa wil, is een man woo kuut un liip is. (Efésios 5:29)

WAS TUUT KOT FON TE FRAAE WAARTE?

7. Warom mus ti familye yemant hon woo foer keet?

7 Yeete familye mus een khop hon, yemant woo in te familye foer keet, soo khëne se kuut tsusamer xafe. Ti Piipel saat in 1 Coríntios 11:3: ‘Te khop fon yeete man is Kristus, te khop fon te fraa is te man, un te khop fon Kristus is Kot’.

8. Wii khan ti fraa tsayche tas se sayn man respëktiirt?

 8 Ti Piipel saat: ‘Ti fraa sol tiife respëkt fer sayne man tsayche.’ (Efésios 5:33) Yeete man macht feeler. Awer wën ti fraa uf te sayt fon sayn man playpt un tee mit hëleft wën ëyer was pexliist, is tas fer ti kanse familye kuut. (1 Pedro 3:1-6) Un wën te man nët te sëlwiche klaape wii sayn fraa hot? Tii mus imer noch tiife respëkt tsu tëm tsayche. Ti Piipel saat: “Tëyer fraae, tuut ti autoriteet fon ayre mëner respëktiire, soo tas wën ëtliche nët tas wort aan heere, khëne tii oone wërter kewun wëre, too torich wii sayn fraa sich aan xtëlt, wayl tii mit sayn aychne aue kesiin hon wii tëyer aych mit kuute moraal un tiife respëkt aan xtëlt.” (1 Pedro 3:1, 2) Tas kuute payxpiil fon een fraa khan tëm man hëlfe tëne sayn klaape se ferxteen un respëktiire.

9. (a) Was sol een fraa mache wën se nët mit sayn man een xtimt? (b) Was fer aanreete këpt Tito 2:4, 5 fer ti fraae?

9 Was khan ti fraa mache wën se nët mit sayn man een xtimt? Wën se saat was se tënkt, sol se tas mit  respëkt mache. Tsum payxpiil, Sara hot was kesaat woo Aapraham nët kuut kefun hot, awer Yeehoowa hot fer tëm kesaat: “Heer was se saat.” (Gênesis 21:9-12) Imer wën een man was ëntxlist woo nët keeche ti Piipel keet, tuut ti fraa respëkt tsayche wayl se tëm sayn ëntxlus pay xteet. (Atos 5:29; Efésios 5:24) Een kuut fraa tuut sayn familye uf phase. (Lees Tito 2:4, 5) Wën te man un ti khiner siin ales was tii fer tëne macht, tuun se tii noch mee liipe un respëktiire. (Provérbios 31:10, 28)

Warom is Sara een kuut payxpiil fer ti fraae?

10. Was saat ti Piipel iwer aus naner keen un iwer tiwors?

10 Als mool tuun phëyerche klaych ëntxlise aus naner se keen orer sich se tiworsiire. Awer ti Piipel saat tas “ti fraa nët fon sayn man wëch keen sol” un “te man sol sayn fraa nët lose.” (1 Coríntios 7:10, 11) Es këpt ekstreeme situatsioone woo ti phëyerche aus naner keen khëne, awer tas is een ërnst ëntxlus. Un was khëne mer iwer tiwors saan? Ti Piipel tsaycht tas ti eensich uersach, woo kilt, fer yemant sich tiworsiire, is wën sayn man orer fraa sich mit yemant aneres leet woo nët sayn phëyerche is. (Mateus 19:9)

WAS TUUT KOT FON TE ËLTERE WAARTE?

Yeesus is een kuute payxpiil fer yeete in te familye

11. Was mise ti khiner, mee wii ales, hon?

11 Ëltere, tuut soo fiil tsayt wii meechlich, mit ayer khiner aus këpe. Ayer khiner prayche aych, un, mee wii ales, mise se hon tas tëyer se iwer Yeehoowa in lërnt. (Deuteronômio 6:4-9)

12. Was mise ti ëltere mache fer sayn khiner uf se phase?

12 Satanaas sayn wëlt këpt imer xlëchter. Un es këpt ëtliche mënxe woo fiilaycht xlëchte tinge mit unsere khiner mache khëne un tëne fiilaycht soo kaar seksuël xaate mache wole. Ëtliche  ëltere fine es xwëyer iwer tas theema se xprëche. Awer, ti ëltere mise mit sayn khiner iwer tiise mënxe xprëche un se in lërne wii se sich fon tëne wëch hale khëne. Ëltere, tëyer mist ayer khiner uf phase. * (1 Pedro 5:8)

13. Wii sole ti ëltere sayn khiner in lërne?

13 Ti ëltere hon ti responsapiliteet fer sayn khiner in lërne wii se sich xike mise. Wii khanst tuu tayn khiner in lërne? Tayn khiner mise keiipt këpe, awer tuu solst se nii krop orer pees aan reete. (Jeremias 30:11)  Soo, tuu nii tayn khiner tisipliinire wëns tuu pees pist. Tuu wilst nët tas tayn wërter “wii ti xtiche fon een xwaart” sin. (Provérbios 12:18) Tuu tayn khiner in lërne warom se aych aan heere mise. (Efésios 6:4; Hebreus 12:9-11; kuk ti Noote 30)

WAS TUUT KOT FON TE KHINER WAARTE?

14, 15. Warom sole ti khiner sayn ëltere aan heere?

14 Yeesus hot imer sayn Fater aan keheert, soo kaar wën tas nët laycht waar. (Lucas 22:42; João 8:28, 29) Yeehoowa wil aach hon tas ti khiner tëne sayne ëltere aan heere tuun. (Efésios 6:1-3)

15 Khiner, soo kaar wën tëyer es xwëyer fint ayre ëltere aan se heere, tuut aych erinere tas wën tëyer tas macht, lost tëyer Yeehoowa un ayer ëltere froo. * (Provérbios 1:8; 6:20; 23:22-25)

Was tuut ti yunge hëlfe troy se plaype wën se fersuucht wëre se mache was ferkheert is?

16. (a) Wii fersuucht te Taywel tas ti yunge ferkheerte tinge mache? (b) Warom is es important froynte raus se suuche woo Yeehoowa liipe?

16 Te Taywel khan tayn froynte un anere yunge penutse tas tuu tinge machst woo ferkheert sin. Tee wees tas es xwëyer sin khan tas aus se hale. Tsum payxpiil, Yaakop sayn meete, Tina, hat froynte woo nët Yeehoowa keliipt hon. Tas hot fiile propleeme fer tii un sayn familye keprung. (Gênesis 34:1, 2) Wën tayn froynte nët Yeehoowa liipe, khëne se tich influëntsiire etwas se mache woo Yeehoowa hase tuut, un tas khënt fiil phayn fer tich, tayn familye un Kot pringe. (Provérbios 17:21, 25) Tës weeche is es important  froynte se hon woo Yeehoowa liipe. (1 Coríntios 15:33)

TAYN FAMILYE KHAN FROO SIN

17. Was fer responsapiliteet hot yeete eene in te familye?

17 Wën ale in te familye Kot sayn kesëtse noo keen, khan ti familye froo sin. Soo, wëns tuu een ferhayrat man pist, tuu tayn fraa liipe un kuut mit tee um keen. Wëns tuu een ferhayrat fraa pist, tuu ti autoriteet fon tayn man respëktiire. Say wii ti fraa woo in Provérbios 31:10-31 pexrip is. Wëns tuu khiner host, tuu tayn khiner in lërne Kot se liipe. (Provérbios 22:6) Wëns tuu een fater pist, tuu tayn familye ‘kuut aus richte’. (1 Timóteo 3:4, 5; 5:8) Un khiner, heert ayre ëltere aan. (Colossenses 3:20) Erinert aych, tas yeete eene in te familye feeler mache khan, soo, sayt teemuutich un tuut eene tëm anere ëntxultiche. Yaa, ti Piipel hot Yeehoowa sayn orientiirung fer yeete eene in te familye.

^ apsats 12 Tuu khanst mee informatsioone fine, wii tuu tayn khiner uf phase khanst, im kapitel 32 fom puuch Aprenda do Grande Instrutor, woo Yeehoowa sayn Tsayer puplitsiire tuun.

^ apsats 15 Tas khint prauch nët sayn ëltere aan heere wën ti ëltere wole tas es etwas macht, woo keeche Kot sayn kesëtse keet. (Atos 5:29)