Xpring tsu was too trin is

tsum sekundeer menu xpringe

Tsum Sumaario xpringe

Yeehoowa sayn Tsayer

Hunsrik

Was khan ti Piipel uns in lërne?

 KAPITEL TSWAAY

Ti Piipel—Een puuch fon Kot

Ti Piipel—Een puuch fon Kot

1, 2. Warom is ti Piipel een wuner xeen kexënk fon Kot?

XTËL teer foer, tas tuu fon een froynt een kexënk kriist woos tuu nët kewaart host. Was teest tuu fine? Sicher wëyerst tuu froo wayl ëyer aan tich ketënkt hot. Tuu teest tëm tanke un tas kexënk klaych uf mache wole.

2 Ti Piipel is een kexënk fon Kot. Tii këpt uns informatsioone, woo mer ploos in tee fine khëne. Tsum payxpiil, tii saat tas Kot ti himele, ti ëyert un te ëyerste man un fraa kemacht hot. Tii tsaycht uns printsiipie woo uns hëlfe khëne wën mer propleeme mit mache. Ti Piipel lërnt in tas Kot hon wil tas ti ëyert een pësere plats këpt un tsaycht wii ëyer tas macht. Was een wuner xeen kexënk is ti Piipel!

3. Was tuust tuu lërne wëns tuu wayter ti Piipel xtutiirst?

3 Woos tuu mee ti Piipel xtutiirst, tuust tuu raus fine tas Kot tich wii sayn froynt hon wil. Woo mee tuu fon Kot lërnst, soo fiil xtërker wërt tayn froyntxaft mit tëm.

4. Was fer informatsioone iwer ti Piipel tuun tich ferwunere?

4 Ti Piipel is in unkefeer 2.600 xprooche iwersëtst këp un es sin xon pilioone ketrukt këp. Mee wii 90% fon te layt uf te wëlt khëne ti Piipel in sayn aychne xprooch leese. Un yeete woch, tuun mee wii 1 milioon mënxe een Piipel kriin! Es këpt khee aner puuch wii ti Piipel!

5. Warom khëne mer saan tas ti Piipel “fon Kot inxpiriirt” is?

 5 Ti Piipel “is fon Kot inxpiriirt”. (Lees 2 Timóteo 3:16) Awer ëtliche layt tuun fiilaycht tënke: ‘Wii khan ti Piipel fon Kot sin wën se fon mënxe kexrip is?’ Ti Piipel tuut antworte: “Mënxe hon fon Kot aus kexprooch, soo wii se fom hayliche kayst kelënkt waare.” (2 Pedro 1:21) Wën tayn wowo ferlangt tas tuu fer tii een priif xraypst, soo wii tii es foer xprëcht, fon weem is te priif? Tas is tayn wowo sayn priif, nët tayn. Kraat soo, is ti Piipel fon Kot un nët fon te mënxe woo ëyer penutst hot fer tii se xraype. Kot hot kemacht tas ti mënxe tëm sayn ketanke kexrip hon. Es is sicher tas ti Piipel “Kot sayn wort” is. (1 Tessalonicenses 2:13; kuk ti Noote 2)

Es këpt ti Tradução do Novo Mundo da Bíblia Sagrada in fiil xprooche

 WAS IN TE PIIPEL XTEET XTIMT

6, 7. Warom khëne mer saan tas ales was in te Piipel xteet eens mim anere xtimt?

6 Es hot mee wii 1.600 yoere ketauert fer ti Piipel se xraype. Ti xrayper hon in unerxiitliche tsayte keleept. Ëtliche hate fiil xuul khëntnis un anere nët. Tsum payxpiil, eene fon tëne waar een tokter. Anere hon in plantaaj kexaft, waare fix mëner, xeefer, profeete, richter un kheeniche. Opwool es unerxiitliche xrayper waare, tuun ale teele fon te Piipel eene mim anere xtime. Ti Piipel tuut nët etwas in een kapitel saan un tas keeche teel in een anere. *

7 Ti ëyerste kapitele fon te Piipel lëye aus wii ti propleeme fon te wëlt aan kefang hon un ti lëtste kapitele saan wii Kot tiise propleeme wëch xafe tuut un fon te ëyert een paratiis macht. Ti Piipel xprëcht iwer tausente yoere fon te kexicht fon te mënxe un tsaycht tas Kot imer macht was ëyer foer hot.

8. Was fer payxpiile tsayche tas ti Piipel imer richtich is wën se iwer siëntifixe sache xprëcht?

8 Ti Piipel is nët een siëntifix puuch un aach khee xuul puuch. Awer, wën tii fon siëntifixe sache xprëcht, tuut se imer xtime. Tas is was mëyer fon Kot sayn Wort waarte teete. Tsum payxpiil, im puuch fon Levítico hot Kot ti israelite in kelërnt was se mache solte tas ti krankheete sich nët ferprayte. Tas is kexrip këp fiil yoere eep ti mënxe wuste tas ti krankheete fon wirus un paktërie khome. Ti Piipel is aach richtich wën se saat tas ti ëyert aan niks traan hëngt. (Jó 26:7) Un in een tsayt woo ti mëyeste mënxe keklaapt hon tas ti ëyert  plat wëyer, hot ti Piipel kesaat tas tii runt is. (Isaías 40:22)

9. Was tuut ti eerlichkheet fon te Piipel xrayper uns hëlfe se ferxteen?

9 Wën ti Piipel iwer kexicht xprëcht, tuut se imer xtime. Awer fiile kexicht piicher tuun nët kans xtime, wayl ti xrayper nët imer eerlich waare. Tsum payxpiil, wën tëne sayne natsioone een kriich nët kewun hon, hon se oft mools nët too triwer kexrip. Toch, ti Piipel xrayper waare imer eerlich, aach wën tëne sayn natsioon, Israel, een kriich ferloer hot. Tii hon aach iwer sayne aychne feeler kexrip. Tsum payxpiil, Mooses, woo een Piipel xrayper waar, hot nët een kroose feeler, woo ëyer kemacht hot, ferxtëkelt un hot kexrip iwer wii Kot tee korikiirt hot. (Números 20:2-12) Ti eerlichkheet fon te Piipel xrayper tsaycht tas ti Piipel fon Kot khomt. Tas petayt tas mer aan ti Piipel klaape khëne.

EEN PUUCH FOL MIT KUUTE AANREETE

10. Warom sin ti piiplixe aanreete hayt noch nutslich fer uns?

10 Ti Piipel is “fon Kot inxpiriirt un kuut fer in se lërne, fer se xteere, fer tings richtich se xtële”. (2 Timóteo 3:16) Ti piiplixe aanreete sin hayt noch nutslich fer uns. Yeehoowa hot uns kemacht, tës weeche, wees er wii mer tënke un wii es uns keet. Tee khënt uns pëser wii mëyer sëlepst un wil hon tas mer froo sin. Tee wees was kuut un was xlëcht fer uns is.

11, 12. (a) Was fer kuute aanreete hot Yeesus in Mateus kapitel 5 pis 7 këp? (b) Was khëne mer noch in te Piipel lërne?

11 In te kapitele 5 pis 7 fon Mateus, leese mer iwer ti kuute aanreete woo Yeesus këp hot, iwer wii mer froo sin khëne, wii mer kuut mit anere um keen khëne, wii mer peete sole un wii mer iwer  këlt tënke sole. Opwool ëyer tas 2 tausent yoere tsurik kesaat hot, tuut es hayt noch xtime un khan uns aarich hëlfe.

12 In te Piipel, tuut Yeehoowa aach printsiipie in lërne, woo uns hëlfe pëser mit unser familye se leepe, kuute aarwayter se sin un in friite mit anere se leepe. Piiplixe printsiipie tuun uns imer hëlfe, een tuun weer mer sin, woo mer woone orer was fer propleeme mer mit mache. (Lees Isaías 48:17; kuk ti Noote 3)

TUU KHANST AAN TI PIIPEL PROFETSIIE KLAAPE

Isaiias, een xrayper fon te Piipel, hot foer hëyer kesaat tas Papiloon fernicht këpe teet

13. Was hot Isaiias kesaat tas mit te xtat Papiloon pasiire teet?

13Fiile profetsiie fon te Piipel hon sich xon erfiilt. Tsum payxpiil, Isaiias hot kesaat tas ti xtat Papiloon fernicht këpe teet. (Isaías 13:19) Tee hot kenau pexrip wii tas pasiire teet. Ti xtat hat kroose toore un een flus um tii rom. Awer Isaiias hat kesaat tas te flus trokne teet un ti toore uf wëyere. Ti faynte teete oone khampf in ti xtat rin keen. Isaiias hat soo kaar foer raus kesaat tas een man, mim naame Siro, keeche Papiloon kewine teet. (Lees Isaías 44:27–45:2; kuk ti Noote 4)

14, 15. Wii hot Isaiias sayn profetsii sich erfiilt?

14 Tswaay hunert yoere noo tëm ti profetsii kexrip këp is, is een militeer khom fer keeche Papiloon se khëmpfe. Weer waar te fiirer fom militeer? Soo wii ti profetsii kesaat hot, waar es Siro, kheenich fon Përsia. Ales waar too fer te rëst fon te profetsii sich erfiile.

15 In te nacht fom khampf, waare ti papiloonier am feste. Ti hon sich weeche te kroos mauer un tëm flus sicher kefun. Traus aus ti  xtat, hon Siro un sayn militeer een kraape uf kemacht fer tas waser fom flus ap lënke. Tas waser is soo wayt niter kang tas tas militeer torich te flus keen khont. Awer wii teet tas militeer torich ti mauer fon Papiloon khome? Soo wii ti profetsii kesaat hot, waare ti kroose toore uf, tës weeche is tas militeer in ti xtat rin khom oone se khëmpfe.

16. (a) Was hot Isaiias iwer ti tsukhunft fon Papiloon kesaat? (b) Wii wise mer tas ti profetsii fon Isaiias sich erfiilt hot?

 16 Isaiias hot kesaat tas nii mee yemant in Papiloon woone teet. Tee hot kexrip: “Tii wërt nii mee pewoont, un nii mee wërt se een plats fer se woone [orer leepe] torich ale xeneratsioone.” (Isaías 13:20) Meecht tas sich erfiilt hon? Am plats woo Papiloon waar, 80 khilomeeter fon Paktaat, noom siit, in Irak, këpts ploos ruiine. Pis hayt, tuut nimant tat woone. Yeehoowa hot Papiloon wëch kekheert “mit tëm peesem fon te fernichtung”. (Isaías 14:22, 23) *

Ti ruiine fon Papiloon

17. Fer was khëne mer aan ale ferxprëche fon Kot klaape?

17 Mëyer khëne klaape aan was ti Piipel iwer ti tsukhunft saat. Fiil profetsiie fon te Piipel hon sich xon erfiilt. Mëyer khëne sicher sin tas  Yeehoowa sayn ferxprëche, ti ëyert tsu een paratiis se mache, sich erfiile tuut. (Lees Números 23:19) Yaa, mëyer hon ti “hofnung fom eewiche leepe . . . woo Kot, woo nët liie khan, foer lang tsayt ferxproch hot.” (Tito 1:2) *

TI PIIPEL KHAN TAYN LEEPE ËNERE

18. Was hot Phaul iwer “Kot sayn wort” kexrip?

18 Mëyer hon kelërnt tas es khee anere puuch wii ti Piipel këpt. Was in te Piipel trin xteet tuut ales tsusamer phase, un wën se iwer siëntifixe orer historixe theeme xprëcht, tuut se imer xtime. In te Piipel fine mëyer aach kuute aanreete un fiil profetsiie woo sich xon erfiilt hon. Awer in te Piipel këpts mee wii tas. Te aphostel Phaul hot kexrip: “Kot sayn wort is leepëntich un iipt macht.” Was petayt tas? (Lees Hebreus 4:12)

19, 20. (a) Wii khan ti Piipel teer hëlfe tich pëser se khëne? (b) Wii khanst tuu tsayche tas tuu wëyert fer ti Piipel këpst?

19 Ti Piipel khan tayn leepe ënere. Tii khan teer hëlfe tich pëser se khëne. Tii khan teer hëlfe tayn ketanke un was tuu im hërts host, se ferxteen. Tsum payxpiil, fiilaycht tënke mëyer tas mëyer Kot liipe. Awer fer tas se pewayse, mise mer mache was ti Piipel saat.

20 Ti Piipel is wërklich een puuch fon Kot. Tee wil hon tas tuu ti Piipel leest, xtutiirst un liipst. Say petanklich tsu tiise kexënk un tuu se wayter xtutiire. Tan, tuust tuu ferxteen was Kot fer ti mënxe foer hot. Im neekste kapitel tuun mer mee iwer tas lërne.

^ apsats 6 Ëtliche layt saan tas ti informatsioone fon te Piipel nët eene mim anere xtime, awer tas is nët woer. Kuk tas kapitel 7 fom puuch A Bíblia — Palavra de Deus ou de Homem?, woo fon Yeehoowa sayn Tsayer puplitsiirt këpt.

^ apsats 16 Wëns tuu mee iwer Piipel profetsiie wise wilst, khanst tuu ti sayte 27 pis 29 fom piichelche Um Livro para Todas as Pessoas leese, woo fon Yeehoowa sayn Tsayer puplitsiirt këpt.

^ apsats 17 Ti fernichtung fon Papiloon is ploos een profetsii fon te Piipel woo sich erfiilt hot. Tuu khanst informatsioone fon profetsiie iwer Yeesus Kristus in te Noote 5 leese.