Xpring tsu was too trin is

tsum sekundeer menu xpringe

Tsum Sumaario xpringe

Yeehoowa sayn Tsayer

Hunsrik

Was khan ti Piipel uns in lërne?

 KAPITEL ACHT

Was is Kot sayn Raych?

Was is Kot sayn Raych?

1. Iwer was fer een pekhant kepeet tuun mer yets xprëche?

MILIOONE layt khëne tas kepeet woo wii Fater Unser Kepeet pekhant is. Torich tas kepeet hot Yeesus sayn tisipele in kelërnt se peete. Iwer was hot ëyer kepeet? Un warom is tas kepeet fer uns hayt important?

2. Iwer was fer tray tinge hot Yeesus uns in kelërnt se peete?

2 Yeesus hot kesaat: “Tës weeche, mist tëyer soo peete: ‘Unser Fater im himel, tayn naame sol kehaylicht këpe. Tayn Raych sol khome. Tayn wile sol kemacht këpe, wii im himel, soo aach uf te ëyert.’” (Lees Mateus 6:9-13) Warom hot Yeesus uns in kelërnt iwer tiise tray tinge se peete? (Kuk ti Noote 20)

3. Was mise mer iwer Kot sayn Raych wise?

3 Mëyer hon kelërnt tas Kot sayn naame Yeehoowa is. Un mëyer hon pexproch was Kot fer ti mënxe un ti ëyert foer hot. Awer was wolt Yeesus saan wii ëyer kesaat hot: “Tayn Raych sol khome”? Mëyer mise wise was Kot sayn Raych is, was tas Raych mache tuut un wii es Kot sayn naame haylich macht.

WAS IS KOT SAYN RAYCH?

4. Was is Kot sayn Raych, un weer is te Kheenich fon tëm?

4 Yeehoowa hot een himlixe rechiirung inkextëlt un hot Yeesus raus kesuucht fer te Kheenich fon tee se sin. Yeesus khan fiil mee kuutes mache wii yeete mënxliche rechiirung, un tee hot mee macht wii ale rechiirunge mitsamer. Yeesus is te “Kheenich fon tëne woo wii kheeniche rechiire un Hër fon tëne woo wii  hëre rechiire”. (1 Timóteo 6:15) Ti Piipel nënt tiise rechiirung Kot sayn Raych.

5. Fon woo tuut Kot sayn Raych ti kans ëyert rechiire?

5 Fërtsich taache noo tëm Yeesus fom toot uf kextii is, is ëyer tsurik tsum himel kang. Mit te tsayt, hot Yeehoowa tee wii Kheenich fom Raych in kesëtst. (Atos 2:33) Kot sayn Raych tuut ti ëyert fom himel rechiire. (Apocalipse 11:15) Tës weeche tuut ti Piipel Kot sayn Raych tas “himlixe Raych” nëne. (2 Timóteo 4:18)

6, 7. Warom is Yeesus pëser wii yeete mënxliche kowernant?

6 Ti Piipel saat tas Yeesus pëser wii yeete mënxliche kowernant is. Warom? Ëyerstens, wayl Yeesus nii xtërpe tuut. Awer ti mënxliche kowernante hayt tsu taach sin imperfëkt un tuun xtërpe. Ti Piipel saat tas Yeesus ‘te eensiche is woo imortaliteet hot’. (1 Timóteo 6:16) Tës weeche ale kuute tinge woo ëyer fer uns macht, tuut fer imer hale.

7 Tsweetens, Yeesus wërt een kuute un kerëchte Kheenich sin. Een piiplix profetsii saat: “Yeehoowa sayn kayst wërt iwer tëm sin, te kayst fon te kluucheet un fom ferxtëntnis, te kayst fon aanreete un macht, te kayst fon te khëntnis un respëkt foer Yeehoowa. Un ëyer tuut sich fraye im respëkt foer Yeehoowa. Tee tuut nët richte noo tëm wiis ploos aus siit, un tuut nët xteere [orer, aan reete] ploos noo tëm was ëyer heert. Tee tuut ti aarme in kerëchtichkheet richte.” (Isaías 11:2-4) Teest tuu kërn soo een kheenich hon?

8. Wii wise mer tas Yeesus nët aleen rechiire tuut?

8 Kot hot ëtliche mënxe raus kesuucht fer mit Yeesus im himlixe raych se rechiire. Tsum payxpiil, te aphostel  Phaul hot fer Timoteo kesaat: “Wën mer wayter aus hale, tuun mer aach mit tëm rechiire.” (2 Timóteo 2:12) Wii fiile tuun mit Yeesus rechiire?

9. (a) Wii fiile tuun mit Yeesus rechiire? (b) Wan hot Kot aan kefang tii raus se suuche?

9 Wii mer im kapitel 7 kelërnt hon, hot te aphostel Yohanes een wisioon kriit woo ëyer Yeesus wii Kheenich im himel mit anere 144.000 kheeniche kesiin hot. Weer sin ti 144.000? Yohanes hot aus keleet tas se, “[Yeesus] sayn naame un te naame fon sayn Fater uf tëne sayn xtërn kexrip hon”. Un tee hot noch kesaat: “Tas sin tii woo tëm Lam [woo Yeesus is] noo keen tuun, ekaal woo tee hin keet. Tii sin fon tswixich ti mënxe . . . kekhaaft këp.” (Lees Apocalipse 14:1, 4) Ti 144.000 sin troye kriste woo Kot raus kesuucht hot fer mit Yeesus ’iwer ti ëyert se rechiire’. Wën se xtërpe, wëre se fom toot uf keruuft fer im himel se leepe. (Apocalipse 5:10) Sayt te aphostele sayn taache, tuut Yeehoowa troye kriste raus suuche, woo pay te krup fon te 144.000 kheeniche kesamelt wëre.

10. Warom khëne mer sicher sin tas ti kheeniche woo Yeehoowa raus kesuucht hot, uns ferxteen khëne?

10 Yeehoowa tuut sich soo aarich mit uns khimere tas ëyer een plaan kemacht hot tas mënxe mit Yeesus rechiire teete. Yeesus wërt een kuute rechiirer sin wayl er uns ferxteet. Ëyer wees was es is een mënx se sin un eelent mit se mache. Phaul hot kesaat tas Yeesus wees was mer mit mache. Tee khan ‘unser xwacheete ferxteen’ un is ‘in ales keproopt këpt, soo wii mëyer’. (Hebreus 4:15; 5:8) Ti 144.000 wise aach was es petayt een mënx se sin. Tii hon krankheete un imperfëktsioone mit kemacht. Soo khëne mer sicher  sin tas Yeesus un ti 144.000 uns kuut ferxteen tuun.

WAS TUUT KOT SAYN RAYCH MACHE?

11. Warom hot Yeesus sayn tisipele in kelërnt se peete tas Kot sayn wile im himel kemacht këpe sol?

11 Yeesus hot sayn tisipele in kelërnt se peete tas Kot sayn wile im himel kemacht këpt. Fer was? Mëyer hon im kapitel 3 xon kelërnt tas Satanaas, te Taywel, sich keeche Yeehoowa kextëlt hot. Tëm noo, hot Yeehoowa erlaupt tas tee un ti untroye ëngele, orer temoone, een tsayt lang im himel plaype khonte. Soo, waare es nët al im himel woo Kot sayn wile kemacht hon. Im kapitel 10, tuun mer mee iwer te Taywel un ti temoone lërne.

12. Was fer tswaay importante tinge tuut Apocalipse 12:10 pexraype?

12 Ti Piipel leet aus tas klaych noo tëm Yeesus wii Kheenich in kesëtst këp is, teet ëyer keeche te Taywel kriiche. (Lees Apocalipse 12:7-10) Te wersikel 10 pexraypt tswaay importante tinge woo pasiirt sin. Kot sayn Raych fangt aan mit Yeesus Kristus wii Kheenich se rechiire un te Taywel wërt fom himel tsu te ëyert keworef. Wii mer lërne tuun, tiise tinge sin xon pasiirt.

13. Was is im himel pasiirt wii te Taywel fon tat raus keworef këp is?

13 Ti Piipel pexraypt wii froo ti troye ëngele këp sin, wii te Taywel un ti temoone fom himel raus keworef këp sin. Mëyer leese: “Frayt aych, oo himele un tëyer woo tat woont!” (Apocalipse 12:12) Yets sin al im himel in friite un eenichkheet wayl al tat tuun Kot sayn wile mache.

Sayt te Taywel un ti temoone fom himel raus keworef këp sin, këpts fiil eelent uf te ëyert. In khorts tsayt tuut tas eelent een ën kriin

14. Was is uf te ëyert pasiirt noo tëm te Taywel fom himel raus keworef këp is?

 14 Awer tas leepe uf te ëyert is kans anerst. Xlëchte tinge tuun mit te layt pasiire ‘wayl te Taywel runer khom is’ un ëyer is “aarich wuutich wayl er wees tas er een khorts tsayt hot”. (Apocalipse 12:12) Tee is fom himel raus keworef këp un wees tas er in khorts tsayt fernicht wërt. Tee macht ales was er khan fer iweraal uf te ëyert, xwiirichkheete, phayn un eelent se pringe.

15. Was wil Kot fer ti ëyert un ti layt?

15 Awer Kot wil noch hon tas ti kans ëyert een paratiis wërt un tas ti layt perfëkt wëre un fer imer leepe tuun. (Salmo 37:29) Awer, wii tuut Kot sayn Raych tas meechlich mache?

16, 17. Was tuut Daniel 2:44 uns iwer Kot sayn Raych saan?

16 Ti profetsii fon Daniel 2:44 saat: “In te taache fon tiise kheeniche tuut te Kot fom himel een raych in xtële woo nii fernicht wërt. Un tas raych wërt nët fer een aner folek wayter këp. Es tuut ale rayche prokle un tsum ën pringe, un noore tas tuut fer imer plaype.” Was tuut uns tiise profetsii iwer Kot sayn Raych in lërne?

17 Ëyerstens, teete anere rechiirunge noch uf te ëyert eksistiire wën tas Raych aan fange teet se rechiire. Mëyer wise tas wayl ti profetsii saat tas Kot sayn Raych “in te taache fon tiise kheeniche” aan fange teet se rechiire. Tsweetens, Kot sayn Raych tuut fer imer hale un nii tuut een aner rechiirung tee ersëtse. Un tritens, Kot sayn Raych tuut  ti anere rechiirunge fon tiise wëlt fernichte un iwer ti kans wëlt rechiire. Tan, kriin ti mënxe ti pëst rechiirung woo se hon khënte.

18. Wii is te naame fom ën kriich tswixich Kot sayn Raych un te mënxliche rechiirunge?

18 Wii tuut Kot sayn Raych ale anere rechiirunge fon te ëyert wëch xafe? Foer tëm ën kriich, woo Armaxeton kriich heest, tuun ti temoone “ti kheeniche fon te kans pewoont ëyert” ër fiire, “fer tii se samele fer te kriich fon te kroose taach fom Ale Mëchtiche Kot”. Yaa, mënxliche rechiirunge tuun keeche Kot sayn Raych khëmpfe. (Apocalipse 16:14, 16; kuk ti Noote 10)

19, 20. Warom is es neetich tas Kot sayn Raych iwer ti ëyert rechiirt?

19 Warom is Kot sayn Raych neetich? Haupstsëchlich weeche tray uersache. Ëyerstens, mëyer al sin imperfëkt, këpe krank un xtërpe. Awer ti Piipel saat tas mer unich Kot sayn Raych fer imer leepe tuun. João 3:16 saat: ‘Kot hot ti wëlt soo aarich keliipt, tas Ëyer sayne eensich kepoorene Soon, këp hot, tas yeete eene woo aan tee klaape tuut, nët fernicht këpt, awer eewich leepe kriit’.

20 Tsweetens, wayl es fiil xlëchte layt këpt. Fiile tuun anere hiner keen, liie un hon khee moraal. Mëyer khëne niks mache fer tiise layt wëch xafe, awer Kot tuut es mache. Layt woo sich nët ënere un imer xlëchte tinge mache, wëre im Armaxeton fernicht. (Lees Salmo 37:10) Ti trit uersach warom mer Kot sayn Raych prauche, is wayl ti mënxliche rechiirunge xwach, xlëcht orer korupt sin. Tii tuun sich nët khimere te layt se hëlfe Kot aan se heere. Ti Piipel saat  tas “mënx iwer mënx rechiirt, fer sayn aychne xaate”. (Eclesiastes 8:9)

21. Was tuut Kot sayn Raych mache?

21 Noom Armaxeton, tuut Kot sayn Raych karantiire tas Kot sayn wile uf te ëyert kemacht wërt. Tsum payxpiil, tuut tas Raych te Taywel un ti temoone inxpërte. (Apocalipse 20:1-3). Weeche tas fray khaaf opfer, tuun ale troye mënxe nët mee krank këpe un khëne fer imer im Paratiis leepe. (Apocalipse 22:1-3) Tas Raych tuut Kot sayn naame hayliche. Was petayt tas? Tas petayt, tas wën Kot sayn Raych ti ëyert rechiirt, tuun tan ale mënxe Kot sayn naame eere. (Kuk ti Noote 21)

WAN IS YEESUS KHEENICH KËP?

22. Wii wise mer tas Yeesus nët Kheenich këp is wii ëyer uf te ëyert waar orer klaych tëm noo wii ëyer fom toot uf keruuft këp is?

22 Yeesus hot sayn tisipele in kelërnt se peete: “Tayn Raych sol khome.” Tas hot taytlich ketsaycht tas Kot sayn Raych in te tsukhunft khome teet. Yeehoowa teet ëyerst sayn Raych in xtële un Yeesus  Kheenich fon tëm mache. Is Yeesus klaych tëm noo wii ëyer tsum himel kang is, Kheenich këp? Nee, tee mist waarte. Een tsayt tëm noo wii Yeesus fom toot uf keruuft këp is, hon ti aphostele Pheeter un Phaul taytlich aus keleet tas ti profetsii in Salmo 110:1 mit Yeesus se tuun hat. In te profetsii saat Yeehoowa: “Sëts tich aan mayn rëchte sayt, pis ich tayn faynte unich tayn fiis tuun.” (Atos 2:32-35; Hebreus 10:12, 13) Wii lang must Yeesus waarte eep Yeehoowa tee wii Kheenich insëtse teet?

Kot sayn Raych tuut karantiire tas Kot sayn wile uf te ëyert kemacht wërt

23. (a) Wan hot Yeesus aan kefang wii Kheenich fon Kot sayn Raych se rechiire? (b) Was tuun mer im neekste kapitel lërne?

23 Yeesus hot im yoer 1914 aan kefang wii Kheenich se rechiire. (Salmo 110:2) Fiile yoere foer 1914, hot een krup fon ufrichtiche kriste ferxtan tas tiise yoer in te Piipel profetsii aarich important wëyer. Sayt 1914 sin in te kans wëlt tinge pasiirt, woo wayse tas se rëcht hate. Klaych wii Yeesus Kheenich këp is, is te Taywel tsu ti ëyert keworef këp, un yets hot er “een khorts tsayt”. (Apocalipse 12:12) Im neekste kapitel, tuun mer mee phunkte xtutiire woo tsayche tas mer in tiise tsayt leepe. Mëyer tuun aach lërne tas in khorts tsayt tuut Kot sayn Raych karantiire tas Kot sayn wile uf te ëyert kemacht wërt. (Kuk ti Noote 22)