Xpring tsu was too trin is

tsum sekundeer menu xpringe

Tsum Sumaario xpringe

Yeehoowa sayn Tsayer

Hunsrik

Was khan ti Piipel uns in lërne?

 KAPITEL FËNEF

Tas fray khaaf opfer—Tas kreeste kexënk fon Kot

Tas fray khaaf opfer—Tas kreeste kexënk fon Kot

1, 2. (a) Was macht tas een kexënk fiil wëyert fer tich hot? (b) Warom is tas fray khaaf opfer tas kreeste kexënk fon Kot?

WAS waar tas pëste kexënk woos tuu xon kriit host? Een kexënk praucht nët tayer khoste fer fiil wëyert fer uns hon. Wën tas kexënk uns froo macht orer etwas is woo mer hon mise, tuun mer tanke.

2 Tswixich ale kexënke woo Kot uns këp hot, këpts een kexënk woo mer mee wii ales anere prauche. Es is Kot sayn kreeste kexënk fer ti mënxe. In tiise kapitel lërne mer tas Yeehoowa, Yeesus Kristus kexikt hot, tas mëyer fer imer leepe khëne. (Lees Mateus 20:28) Yeehoowa hot ketsaycht tas er uns liipt, wii ëyer sayn Soon, wii een opfer uf ti ëyert kexikt hot fer uns fray se khaafe.

WAS IS TAS FRAY KHAAF OPFER?

3. Warom tuun ti mënxe xtërpe?

3 Tas fray khaaf opfer is ti aat wii Yeehoowa ti mënxe fon te sint un fom toot fray macht. (Efésios 1:7) Fer se ferxteen warom tas fray khaaf opfer neetich waar, mise mer wise was foer tausente yoere im Eetem kaate pasiirt is. Unsere ëyerste ëltere, Aatam un Ewa, hon kesint. Wayl se kesint hon, sin se kextorep. Mëyer tuun aach xtërpe wayl mer ti sint fon Aatam un Ewa keërpt hon. (Kuk ti Noote 9)

4. Weer waar Aatam un wii waar tëm sayn leepe?

4 Wii Yeehoowa te ëyerste man, Aatam, kemacht hot, hot  er was wuner xeenes fer tëm këp. Tee hot tëm Aatam een perfëkt mënxlich leepe këp. Aatam hat een perfëkt ferxtant un een perfëkt khërper. Tee teet nii krank këpe, nii alt wëre un nii xtërpe. Wayl Yeehoowa Aatam kemacht hot, waar Ëyer wii een fater fer tëm. (Lucas 3:38) Yeehoowa hot oft mools mit tëm kexproch. Kot hot taytlich fer Aatam aus keleet was er fon tëm wolt un hot tëm een kuut aarwayt këp. (Gênesis 2:16, 17; 1:28-30)

5. Was petayt es wën ti Piipel saat tas Aatam “noo Kot sayn pilt” kemacht këp is?

5 Aatam is “noo Kot sayn pilt” kemacht këp. (Gênesis 1:27) Yeehoowa hot tëm kwaliteete këp wii sayn aychne, wii tsum payxpiil: liipe, kluucheet, kerëchtichkheet un macht. Tee hot fer Aatam fray wile këp. Aatam waar khee maxiin. Kot hot tee kemacht tas er raus suuche khënt tas richtiche orer ferkheerte se mache. Wën Aatam raus kesuucht hët Kot aan se heere, khënt er fer imer im Paratiis leepe.

6. (a) Wayl Aatam Kot nët aan keheert hot, was hot er ferloer? (b) Wii tuut tas uns petrëfe?

6 Wayl ëyer Kot nët aan keheert hot un tsum toot konteniirt këp is, hot Aatam een tayer prays petsaalt. Tee hot sayn spetsiaal froyntxaft mit Yeehoowa, sayn eewich leepe un sayn woon plats im Paratiis ferloer. (Gênesis 3:17-19) Aatam un Ewa hon raus kesuucht Kot nët aan se heere, un soo hot es khee hofnung fer tii këp. Weeche tas was Aatam kemacht hot, is ‘ti sint in ti wëlt khom, un torich ti sint te toot, soo hot sich te toot tsu ale mënxe ferprayt, wayl se al kesint hate’. (Romanos 5:12) Wii Aatam kesint hot, hot er sich sëlepst un uns wii sklaawe fer ti sint un te toot “ferkhaaft”. (Romanos 7:14) Këpts een hofnung fer uns? Yaa, es këpt.

7, 8. Was is een fray khaaf opfer?

 7 Was is een fray khaaf opfer? Ti itee fom een fray khaaf opfer petayt haupstsëchlich tswaay tinge. Ëyerstens, is tas te prays woo petsaalt wërt fer yemant fray se mache orer fer etwas tsurik se khaafe. Tsweetens, is tas te prays woo etwas tëkt, orer petsaalt.

8 Khee mënx khënt te kroose xaat petsaale woo Aatam kemacht hot, wii ëyer kesint un te toot iwer uns keprung hot. Awer Yeehoowa hot te weech uf kemacht fer uns fon te sint un fom toot fray se mache. Mer tuun lërne wii tas fray khaaf opfer funtsioniirt un wii mer nutse too tefun kriin khëne.

WII YEEHOOWA TAS FRAY KHAAF OPFER PETSAALT HOT

9. Wii khont tas fray khaaf opfer petsaalt këpe?

9 Khee eene fon uns khënt te prays fom perfëkt leepe woo Aatam ferloer hot, petsaale. Warom nët? Wayl mer al imperfëkt sin. (Salmo 49:7, 8) Tas fray khaaf opfer must torich tas leepe fon een aner perfëkt mënx petsaalt këpe. Tës weeche wërt es “wii een fray khaaf opfer, mit tëm sëlwich wëyert”, kenënt. (1 Timóteo 2:6) Tas fray khaaf opfer mist te sëlwiche wëyert hon wii tas leepe woo Aatam ferloer hat.

10. Wii hot Yeehoowa tas fray khaaf opfer petsaalt?

10 Wii hot Yeehoowa tas fray khaaf opfer petsaalt? Yeehoowa hot sayn keliipte Soon, Yeesus, sayn ëyerste kriatsioon uf ti ëyert kexikt. (1 João 4:9, 10) Yeesus waar wilich fer sayn Fater un sayn woon plats im himel se lose. (Filipenses 2:7) Yeehoowa hot Yeesus fom himel uf ti ëyert kexikt, un Yeesus is wii een perfëkte mënx, oone sinte, uf ti wëlt khom. (Lucas 1:35)

Yeehoowa hot sayn keliipte Soon wii een fray khaaf opfer fer uns këp

11. Wii khan tas leepe fon een man ale mënxe fray khaafe?

11 Te ëyerste man, Aatam, hot tas perfëkt leepe, fer ti kanse mënxe ferloer,  wayl ëyer Yeehoowa nët aan keheert hot. Khënt een aner man te toot fer al, woo fon Aatam ap xtame, wëch xafe? Yaa. (Lees Romanos 5:19) Yeesus, woo nii kesint hot, hot sayn perfëkt leepe wii een fray khaaf opfer këp. (1 Coríntios 15:45) Te wëyert fon sayn perfëkt leepe khan te toot fer ale nookhomer fon Aatam wëch xafe. (1 Coríntios 15:21, 22)

12. Warom must Yeesus soo fiil xlimes mit mache?

12 Ti Piipel pexraypt wii fiil phayn Yeesus mit kemacht hot eep ëyer kextorep is. Tee is ferxlaa un aan een phool kenaachelt këp, fer lamsam un mit fiil phayn se xtërpe. (João 19:1, 16-18, 30) Warom must Yeesus soo fiil mit mache? Wayl te Taywel kesaat hot tas khee mënx leaal tsu Kot playpt, wën er xwëyer keproopt këpt. Yeesus hot ketsaycht tas een perfëkte man leaal tsu Kot plaype khan, aach wën ëyer tas xlimste mit macht. Yeehoowa is aarich froo mit Yeesus këp! (Provérbios 27:11; kuk ti Noote 15)

13. Wii is tas fray khaaf opfer petsaalt këp?

13 Wii is tas fray khaaf opfer petsaalt këp? Yeesus hot te wëyert fon sayn leepe fer sayn Fater këp. Im yoer 33, am 14te taach fom moonat Nisan fom yiitexe kalënter, hot Yeehoowa Yeesus sayn faynte erlaupt tee um se pringe. (Hebreus 10:10) Noo tray taache, hot Yeehoowa Yeesus tsurik tsum leepe keprung, nët wii een mënx, awer wii een kaystlich persoon. Xpeeter wii Yeesus tsurik tsum himel kang is, hot Yeehoowa tas opfer fon Yeesus sayn perfëkt leepe penutst fer uns fray se khaafe. (Hebreus 9:24) Tës weeche, hon mer ti oportuniteet fer fray fon sint un toot se wëre. (Lees Romanos 3:23, 24)

 TAS FRAY KHAAF OPFER KHAN TEER HËLFE

14, 15. Was mise mer mache tas unsere sinte fertsayt wëre?

14 Tas fray khaaf opfer, tas kreeste kexënk fon Kot, hot uns xon keholef. Yets, tuun mer lërne wiis uns hayt un in tsukhunft hëlfe tuut.

15 Unser sinte këpe fertsayt. Es is nët laycht imer se mache was richtich is. Mëyer mache feeler un manich mool saan mer un mache mer was ferkheert is. (Colossenses 1:13, 14) Wii khëne mer fertsayt këpe? Mëyer mise uns wërklich peroye iwer was mer ferkheert kemacht hon un mit teemuut fer Yeehoowa ferlange tas er uns fertsayt. Tan, khëne mer sicher sin tas unser sinte fertsayt wëre. (1 João 1:8, 9)

16. Was mise mer mache fer een kuut kewise se hon?

16 Mëyer khëne een kuut kewise hon. Wën unser kewise uns saat tas mer was ferkheertes kemacht hon, fine mer uns xultich. Fiilaycht tënke mer soo kaar tas mer khee wëyert hon un khëne ti hofnung ferliire. Awer mer prauche nët soo tënke. Wën mer peete tas Yeehoowa uns fertsayt, khëne mer sicher sin tas er uns heert un fertsayt. (Hebreus 9:13, 14) Yeehoowa wil hon tas mer mit tëm iwer unser propleeme orer xwacheete xprëche. (Hebreus 4:14-16) Soo, khëne mer in friite mit Kot sin.

17. Was fer seechne kriin mer wayl Yeesus fer uns kextorep is?

17 Mëyer hon ti hofnung fer eewich se leepe. “Te loon woo ti sint petsaalt, is te toot, awer tas kexënk, woo Kot këpt, is eewiches leepe torich Yeesus Kristus, unser Hër.” (Romanos 6:23) Wayl Yeesus fer uns kextorep is, khëne mer perfëkt kesuntheet un eewich leepe kriin. (Apocalipse 21:3, 4) Awer was mise mer mache fer tiise seechne se kriin?

 KËPST TUU WËYERT FER TAS FRAY KHAAF OPFER?

18. Wii wise mer tas Yeehoowa uns liipt?

18 Wërst tuu nët froo wën yemant teer een xeen kexënk këpt? Tas fray khaaf opfer is tas kreeste kexënk woos këpt, un mëyer mise aarich petanklich tsu Yeehoowa sin. João 3:16 saat tas “Kot ti wëlt soo aarich keliipt hot, tas Ëyer sayne eensich kepoorene Soon, këp hot”. Yaa, Yeehoowa tuut uns soo liipe tas er uns sayn keliipte Soon, Yeesus, këp hot. Un mer wise tas Yeesus uns aach liipt, wayl ëyer wilich waar fer uns se xtërpe. (João 15:13) Tas fray khaaf opfer tsaycht taytlich tas Yeehoowa un Yeesus tich liipe. (Gálatas 2:20)

Soo fiil mee woo mer iwer Yeehoowa lërne, xtërke këp unser froyntxaft un liipe tsu Tëm

19, 20. (a) Wii khanst tuu Yeehoowa sayn froynt wëre? (b) Wii khanst tuu tsayche tas tuu aan Yeesus sayn fray khaaf opfer klaape tuust?

19 Yets woos tuu iwer ti kroose liipe fon Kot kelërnt host, wii khanst tuu tëm sayn froynt wëre? Es is nët laycht yemant woos tuu nët khënst se liipe. João 17:3 saat tas es meechlich is Yeehoowa khëne se lërne. Soo, tuu wayter ti Piipel xtutiire. Tan, wërt tayn liipe tsu Yeehoowa xtërker un tuu wilst tee froo lose un sayn froynt wëre. (1 João 5:3)

20 Tuu aan Yeesus sayn fray khaaf opfer klaape. Ploos saan tas mer aan Yeesus klaape is nët kenuuch. Ti Piipel saat: “Weer klaape aan te Soon iipt, hot eewiches leepe”. (João 3:36) Was petayt klaape iipe? Tas petayt se mache was Yeesus uns kexikt hot. (João 13:15) Fer tas fray khaaf opfer aan se nëme, mise mer etwas mit unser klaape mache. Tiago 2:26 saat: ‘Te klaape oone aarwayte is toot’.

21, 22. (a) Warom sole mer yeetes yoer tsum Aantënke aan Yeesus sayn toot khome? (b) Was tuun ti kapitele 6 un 7 aus lëye?

 21 Khom tsum Aantënke aan Yeesus sayn toot. In te nacht eep Yeesus kextorep is, hot er uns in kelërnt tas mer een aantënke aan sayn toot hale sole. Mer nëne tiise fersamlung tas Aantënke orer “Aamtmal fom Hër” un tuun se yeetes yoer hale. (1 Coríntios 11:20; Mateus 26:26-28) Yeesus wil tas mer uns erinere tas ëyer sayn perfëkt leepe fer uns, wii een fray khaaf opfer, këp hot. Ëyer hot kesaat: “Macht tas imer fer aan mich aan se tënke.” (Lees Lucas 22:19) Wëns tuu tsum Aantënke khomst, tuust tuu tsayche tas tuu tas fray khaaf opfer un ti kroos liipe fon Yeehoowa un Yeesus nët ferkëst. (Kuk ti Noote 16)

22 Tas fray khaaf opfer is tas kreeste kexënk woo mer kriin khënte. (2 Coríntios 9:14, 15) Tas wuner xeene kexënk tuut soo kaar milioone layt, woo toot sin, hëlfe. Ti kapitele 6 un 7 pexraype wii tas meechlich is.