Xpring tsu was too trin is

tsum sekundeer menu xpringe

Tsum Sumaario xpringe

Yeehoowa sayn Tsayer

Hunsrik

Was khan ti Piipel uns in lërne?

 KAPITEL NOYNTSEEN

Playp ticht pay Yeehoowa

Playp ticht pay Yeehoowa

1, 2. Woo khëne mer hayt een sichere plats fine?

XTËL teer mool foer tas tuu in een xlim weter am laafe pist. Te himel këpt imer tunkler, plitse tuun te himel hël mache un es fangt aan se tunere. Tan, tuut es foxt reene. Was machst tuu? Tuu suuchst een plats fer tich se ferxtëkele. Wii kuut is es wëns tuu een sichere un trokne plats finst!

2 Mëyer sin hayt in een eenlich situatsioon. Ti wëlt wërt imer xlimer. Fiilaycht tuust tuu tich frooe: ‘Woo khan ich een sichere plats fine?’ Een Piipel xrayper hot kesaat: “Ich tuun fer Yeehoowa saan: ‘Tuu pist mayn sichere un feste plats; mayn Kot aan weem ich klaape.’” (Salmo 91:2) Yaa, Yeehoowa khan uns hayt mit te propleeme fon tiise wëlt hëlfe un uns een xeen hofnung fer ti tsukhunft këpe.

3. Was mise mer mache tas Yeehoowa uns uf phast?

3 Wii phast Yeehoowa uns uf? Tee khan uns hëlfe mit unsere propleeme um se keen. Yeehoowa is fiil xtërker wii yeete persoon woo uns xaate mache wil. Soo kaar wën mer hayt was xlëchtes mit mache, khëne mer sicher sin tas Yeehoowa te xaate in tsukhunft repariirt. Ti Piipel tuut uns aan muute: ‘Playpt in Kot sayn liipe’. (Judas 21) Mëyer mise ticht pay Yeehoowa plaype fer sayn hilef in xwëyere tsayte kriin. Awer wii khëne mer tas mache?

TSAYCH TAS TUU KOT LIIPST

4, 5. Wii tsaycht Yeehoowa tas er uns liipt?

4 Fer Yeehoowa sayn froynt se sin, mise mer mërke  wii aarich ëyer uns liipt. Tënk aan ales was Yeehoowa fer uns macht. Tee hot uns ti ëyert këp un hot se mit xeene planse un fii fol kemacht. Tee hot uns aach sauwer waser un kuut ëse këp. Torich ti Piipel, tuut Yeehoowa uns sayn naame un sayn xeene kwaliteete in lërne. Iwer ales, hot er uns sayn liipe ketsaycht wii ëyer sayn keliipte Soon, Yeesus, uf ti ëyert kexikt hot fer sayn leepe fer uns se këpe. (João 3:16) Un weeche Yeesus sayn opfer, hon mer een wuner xeen hofnung fer ti tsukhunft.

5 Yeehoowa hot tas Raych in kericht, een himlixe rechiirung, woo in khorts tsayt tas eelent wëch xaft. Tas Raych tuut fon te ëyert een paratiis mache, woo ale in friite un frooheet fer imer leepe tuun. (Salmo 37:29) Yeehoowa tsaycht aach tas er uns liipt, wayl er uns in lërnt wii mer hayt xon pëser leepe khëne. Tee tuut uns in laate fer tsu tëm se peete un is imer wilich fer uns se heere. Es is sicher tas Yeehoowa yeete eene fon uns liipt!

6. Wii khanst tuu tsayche tas tuu petanklich fer Yeehoowa sayn liipe pist?

6 Wii khanst tuu tsayche tas tuu petanklich fer Yeehoowa sayn liipe pist? Tuu tëm imer tanke fer ales was er fer tich macht. Es is xaat tas ti mëyeste layt hayt nët petanklich sin. In Yeesus sayn tsayt waar tas aach soo. Een mool hot Yeesus tseen leproose keheelt, awer ploos eene is tsurik khom fer se tanke. (Lucas 17:12-17) Mëyer wole wii te man sin woo Yeesus ketankt hot. Mëyer wole Yeehoowa imer tanke.

7. Wii mus unser liipe tsu Yeehoowa sin?

7 Mëyer mise aach tsayche tas mer Yeehoowa liipe. Yeesus hot kesaat tas sayn tisipele Yeehoowa mit  sayn kans hërts, mit sayn kans seel un mit sayn kanse ferxtant liipe mise. (Lees Mateus 22:37) Was petayt tas?

8, 9. Wii khëne mer fer Yeehoowa tsayche tas mer tee liipe?

8 Is es kenuuch ploos se saan tas mer Yeehoowa liipe? Nee. Mëyer tsayche tas mer Yeehoowa mit unser kans hërts, seel un ferxtant liipe, torich tas was mëyer mache. (Mateus 7:16-20) Ti Piipel tuut taytlich in lërne tas wën mer Kot liipe, tuun mer sayn kepoote aan heere. Is tas xwëyer? Nee, wayl Yeehoowa sayn “kepoote sin nët xwëyer”. (Lees 1 João 5:3)

9 Wën mer Yeehoowa aan heere, hon mer een frooes un tsufriitenes leepe. (Isaías 48:17, 18) Awer was tuut uns hëlfe wayter Yeehoowa sayn froynt se sin? Wole mer siin.

TUU WAYTER TI PIIPEL XTUTIIRE UN PEETE

10. Warom must tuu wayter iwer Yeehoowa lërne?

10 Wii pist tuu Yeehoowa sayn froynt këp? Torich tayn Piipel xtuutium host tuu Yeehoowa pëser khëne kelërnt un ayer froyntxaft is xtërker këp. Tiise froyntxaft is wii een fayer woos tuu aan lose wilst. Soo wii tuu een fayer mit prën hols xtarëk halst, lërn wayter iwer Yeehoowa fer tayn froyntxaft mit tëm xtarëk hale. (Provérbios 2:1-5)

Tuu tayn liipe tsu Yeehoowa xtarëk hale soo wii tuu een fayer mit prën hols xtarëk halst

11. Was wërt pasiire wëns tuu wayter ti Piipel xtutiirst?

11 Was wërt noch pasiire wëns tuu wayter ti Piipel xtutiirst? Tuu tuust tinge lërne woo pis aans hërts keen. Tas is mit tswaay tisipele fon Yeesus pasiirt. Wii se phaar profetsiie ferxtan hon, woo Yeesus tëne aus keleet hat, hon se kesaat: ‘Hot unser hërts nët keprënt, wii tee uns ti Xrifte kans aus keleet hot?’ (Lucas 24:32)

12, 13. (a) Was khan mit unser liipe tsu Kot pasiire? (b) Was khëne mer mache fer unser froyntxaft mit Yeehoowa xtarëk hale?

 12 Ti tswaay tisipele fon Yeesus sin aarich froo këp wii se ti Xrifte ferxtan hon. Im xtant host tuu tich aach soo kefun wiis tuu aan kefang host ti Piipel se ferxteen. Tas hot tich keholef Yeehoowa se khëne un liipe. Toch tiise liipe khan mit te tsayt khalt këpe, awer tuu wilst nët tas tas pasiirt. (Mateus 24:12)

13 Noo tëm tuu Yeehoowa sayn froynt këpt pist, must tuu tich wayter aan xtrënge fer tiise froyntxaft xtarëk se hale. Tuu must wayter iwer Yeehoowa un iwer Yeesus lërne. Tënk iwer tas was tuu am lërne pist un wii tuu tas in tayn leepe penutse wilst. (João 17:3) Wëns tuu ti Piipel leest orer xtutiirst, froo tich: ‘Was tuut mich tas iwer Yeehoowa Kot in lërne? Wii hëleft mich tas Yeehoowa mit kanse hërts un seel liipe?’ (1 Timóteo 4:15)

14. Warom tuut tas kepeet unser liipe tsu Yeehoowa xtarëk hale?

 14 Kuute froynte tuun fiil mitsamer xprëche. Tas halt ti froyntxaft xtarëk. Kraat soo, wën mer imer mit Yeehoowa im kepeet xprëche, tuut unser liipe tsu tëm xtarëk plaype. (Lees 1 Tessalonicenses 5:17) Tas kepeet is een wuner xeenes kexënk fon unser himlixe Fater. Mëyer mise imer fon unser kanse hërts mit tëm xprëche. (Salmo 62:8) Mëyer sole nët kepeete xprëche woo xon fërtich sin, mer mise saan was mer in hërts hon. Yaa, wën mer wayter ti Piipel xtutiire un fon hërts peete, tuun mer unser liipe tsu Yeehoowa xtarëk hale.

XPRËCH MIT ANERE IWER YEEHOOWA UN KHOM IN TI FERSAMLUNGE

15, 16. Was tënkst tuu iwer tas preetiche?

15 Wën mer wayter Yeehoowa sayn froynte sin wole, mise mer aach mit anere iwer unser klaape xprëche. Es is een wuner xeene priwilëj mit anere iwer Yeehoowa se xprëche. (Lucas 1:74) Tas is een responsapiliteet woo Yeesus fer ale woere kriste këp hot. Yeete eene mus ti kuute oter iwer Kot sayn Raych preetiche. Host tuu xon aan kefang tas se mache? (Mateus 24:14; 28:19, 20)

16 Te aphostel Phaul hot fiil wëyert fer tas preetiche këp. (2 Coríntios 4:7) Iwer Yeehoowa un sayn propoos fer anere se xprëche, mus tas haupste in tayn leepe sin. Wëns tuu Yeehoowa aan peete wilst, must tuu tas mache. Un Yeehoowa këpt wëyert fer ales was tuu fer tee machst. (Hebreus 6:10) Tas preetiche khan tich un tii woo tich aan heere, hëlfe ticht pay Yeehoowa se khome un tas eewiche leepe se kriin.  (Lees 1 Coríntios 15:58) Këpts een aner aarwayt woo mee frooheet pringe khan?

17. Warom mus tas preetiche, oone tsayt se ferliire, kemacht wëre?

17 Ti preetich aarwayt thërf nët waarte. Mëyer mise ‘tas wort preetiche oone tsayt se ferliire’. (2 Timóteo 4:2) Ti layt mise iwer Kot sayn Raych heere. Ti Piipel saat: “Yeehoowa sayn kroose taach is ticht! Tee is ticht un khomt aarich xnël tichter!” Tas ën “tuut sich nët ferxpeete!” (Sofonias 1:14; Habacuque 2:3) Yaa, in khorts tsayt tuut Yeehoowa tëm Taywel sayn xlëchte wëlt fernichte. Ti layt mise tas wise fer raus se suuche Yeehoowa se tiine.

18. Warom mise mer Yeehoowa mit anere woere kriste aan peete?

18 Yeehoowa wil tas mer tee mit anere woere kriste aan peete tuun. Ti Piipel saat: “Wole mer eene aan te anere tënke fer uns tsu liipe un tsu kuute aarwayt aan muute, tuun mer nët noo lose uns se fersamele, wii es ti kewoonheet fon ëtliche is, awer tuun mer uns eene mim anere xtërke, un soo mee wii mer te taach tichter khome siin.” (Hebreus 10:24, 25) Tas tsaycht tas Yeehoowa wil tas mer tee mit anere woere kriste aan peete tuun. Un in te fersamlunge khëne mer eene te anere xtërke. Tës weeche, mise mer uns aan xtrënge fer in ale fersamlunge se khome.

19. Was khan uns hëlfe unser kristliche priiter se liipe?

19 In te fersamlunge tuust tuu kuute froynte fine woo tich hëlfe tuun wayter Yeehoowa aan se peete. Ti priiter sin al unerxiitlich. Awer, soo wiis tuu, tuun se sich aan xtrënge fer Yeehoowa aan se peete. Soo wii mëyer al, sin tii imperfëkt un tuun feeler mache. Wën tas pasiirt, tuun se eene te anere fertsaye. (Lees Colossenses 3:13) Tuu tich imer aan ti kuute kwaliteete fon tayn kristliche  priiter konsentriire. Tas tuut tich hëlfe tii se liipe un tayn froyntxaft mit Yeehoowa se xtërke.

TUU KHANST FER IMER FROO SIN

20, 21. Was is tas “woere leepe”?

20 Yeehoowa ferxprëcht een wuner xeene leepe fer sayn froynte. Ti Piipel tuut in lërne tas in tsukhunft unser leepe kans anerste wërt wii hayt.

Yeehoowa wil tas tuu “tas woere leepe” kriist. Wilst tuu tas kriin?

21 In tsukhunft tuun mer nët ploos 70 orer 80 yoere leepe. Mëyer tuun tan fer imer leepe in perfëkt kesuntheet, friite un frooheet in een xeene paratiis. Ti Piipel nënt tas “tas woere leepe”. Yeehoowa ferxprëcht uns tas woere leepe, awer mer mise yets ales mache was mer khëne fer tas “fest hale.” (1 Timóteo 6:12, 19)

22. (a) Wii khëne mer tas “woere leepe fest hale”? (b) Warom mise mer erkhëne tas tas eewiche leepe een kexënk fon Yeehoowa is?

22 Wii khëne mer tas “woere leepe fest hale”? Mëyer mise mache was mer fon te Piipel kelërnt hon. (1 Timóteo 6:18) Awer, tas woere leepe hëngt nët ploos fon unser aanxtrëngunge ap. Warom nët? Mëyer khënte tas eewiche leepe nii fertiine. Es is een kexënk woo Yeehoowa fer sayn troye tiiner këpe wil, weeche sayn “unfertiint kuutheet”. (Romanos 5:15) Yaa, Yeehoowa wil uns tas kexënk wërklich këpe.

23. Warom must tuu yets tas richtiche raus suuche?

23 Froo tich: ‘Tuun ich Kot soo aan peete wii ëyer wil?’ Wëns tuu mënst tas tuu ëtliche ënerunge mache must, mach tas klaych. Wën mer aan Yeehoowa klaape un ales mache was er fon uns waart, tuut er uns uf phase. Tee tuut sayn troy  tiiner in te lëtste taache fom Taywel sayn xlëcht wëlt, uf phase. Tan tuut Yeehoowa mache tas mer fer imer im Paratiis leepe, soo wii ëyer ferxproch hot. Yaa, tuu khanst tas woere leepe kriin, wëns tuu yets tas richtiche raus suuchst!