1, 2. Was mise mer uns frooe un warom is tas important?

IN TAYN Piipel xtuutium host tuu kelërnt tas fiile, woo saan tas se Kot aan peete, in wërklichkheet tinge mache orer in lërne, woo Kot hast. (2 Coríntios 6:17) Tës weeche saat Yeehoowa tas mer aus te falx relichioon, “Papiloon ti Kroos”, raus keen mise. (Apocalipse 18:2, 4) Was tuust tuu mache? Yeete eene fon uns mus sëlepst raus suuche un sich frooe: ‘Wil ich Kot aan peete wii ëyer es wil, orer wil ich tee aan peete wii ich es imer kemacht hon?’

2 Wëns tuu xon ti falx relichioon kelos host, is tas kuut. Awer fiilaycht këpts noch ëtliche kewoonheete fon te falx relichioon woos tuu noch machst. Yets wole mer ëtliche fon tiise kewoonheete pexprëche un siin warom es soo important is wii Yeehoowa too triwer se tënke.

IS ES FERKHEERT PILTER UN TI TOOTE AAN SE PEETE?

3. (a) Warom fine ëtliche es xwëyer nët mee pilter in sayn aanpeetung se penutse? (b) Was saat ti Piipel iwer pilter penutse fer Kot aan se peete?

3 Ëtliche layt tuun sayt fiile yoere pilter orer altare tehëm penutse fer Kot aan se peete. Wën tas tayn kewoonheet waar, khanst tuu es fiilaycht xpasich orer ferkheert fine, Kot oone tiise tinge aan se  peete. Awer ferkës nët tas Yeehoowa uns in lërnt wii mer tee aan peete sole un ti Piipel saat taytlich tas Kot nët hon wil tas mer pilter in unser aanpeetung penutse. (Lees Êxodo 20:4, 5; Salmo 115:4-8; Isaías 42:8; 1 João 5:21)

4. (a) Warom sole mer nët ti toote aan peete? (b) Warom hot Yeehoowa fer sayn folek kesaat tas se nët mit te toote xprëche solte?

4 Ëtliche layt këpe fiil tsayt un kraft aus fer ti toote tsufriite se lose. Maniche tuun ti toote soo kaar aan peete. Awer mëyer hon kelërnt tas ti toote uns nët hëlfe orer xaate mache khëne. Tii leepe nët uf een aner plats. Es is kefeerlich se fersuuche mit tëne se xprëche, wayl yeete pexeet woo aus siit tas se fon te toote khomt, khomt in wërklichkheet fon te taywele. Tës weeche hot Yeehoowa fer ti israelite kesaat tas se nët fersuuche solte mit te toote se xprëche orer etwas se tuun hon woo mit temonismus fermixt is. (Deuteronômio 18:10-12; kuk ti Noote 26 un 31)

5. Was khan tich hëlfe nët pilter un nët ti toote aan se peete?

5 Was khan tich hëlfe nët pilter un nët ti toote aan se peete? Tuu must ti Piipel leese un kuut noo tënke was Yeehoowa tefun fint. Tee hast tas un fint tas eeklich. (Deuteronômio 27:15) Tuu yeete taach tsu Yeehoowa peete tas er tich hëleft ti tinge soo se siin, wii ëyer siit, un tas er tich aach hëleft tee aan se peete soo wii ëyer wil. (Isaías 55:9) Tuu khanst sicher sin tas Yeehoowa teer ti kraft këpt fer tich fon ales woo mit falx aanpeetung se tuun hot, fray se mache.

IS ES RICHTICH WAYNACHTE SE FAYRE?

6. Warom is te 25te teetsëmper raus kesuucht këp fer Yeesus sayn keportstaach se fayre?

6 Waynachte is eens fon te pekhanteste fayertaache. Ti mëyeste layt tënke tas Yeesus aan tëm  taach kepoer is. Awer in wërklichkheet is Waynachte mit te falx aanpeetung ferpunt. Een ensiklopeetie leet aus tas ti romaaner, woo nët Kot sayn tiiner waare, am 25te teetsëmper te keportstaach fon te sun kefayert hon. Wayl ti xëfe fon te khërich wolte tas mee layt kriste wëre, hon se ëntxlos Yeesus sayn keportstaach aan tëm taach se fayre, opwool Yeesus nët am 25te teetsëmper uf ti wëlt khom is. (Lucas 2:8-12) Yeesus sayn tisipele hon nët Waynachte kefayert. Tas puuch Origens Sagradas de Coisas Profundas, in ënglix, leet aus tas in te 200 yoere noo tëm Yeesus kepoer is, “nimant wust, un weeniche hon sich kekhimert, wan kenau Yeesus uf ti wëlt khom is.” Tas Waynachte fayre hot hunerte yoere noo tëm Yeesus uf te wëlt khom is, aan kefang.

7. Warom tuun ti woere kriste nët Waynachte fayre?

7 Fiile layt wise wii Waynachte un sayn kewoonheete, wii feste un kexënke këpe, aan kefang hon. Tsum payxpiil, in Englant un rechioone fon Amërika waar tas fayre fon Waynachte, fer een tsayt, ferpoot, weeche sayne ferpiinung mit te falx aanpeetung. Ale woo tas kefayert hon, sin kextrooft këp. Awer, mit te tsayt hon se wiiter aan kefang Waynachte se fayre. Warom tuun ti woere kriste nët Waynachte fayre? Wayl se, in ales was se mache, Kot tsufriite lose wole.

IS ES RICHTICH KEPORTSTAACH SE FAYRE?

8, 9. Warom hon ti ëyerste kriste nët te keportstaach kefayert?

8 Een aner taach woo fiile fayre, is te keportstaach. Is es ferkheert keportstaach se fayre? Ti eensiche tswaay keportstaach feste woo in te Piipel xteen, sin fon layt woo nët Yeehoowa aan kepeet hon. (Gênesis 40:20; Marcos 6:21) Keportstaache sin kefayert këp fer falxe kote se eere. Tës weeche hon ti ëyerste kriste  “tas fayre fom keportstaach wii een kewoonheet fon te falx aanpeetung aan kesiin.” (Enciclopédia Delta Universal)

9 Ti friirixe romaaner un kreeker hon keklaapt tas te keportstaach fayre, mache teet tas ti kote tee, woo keportstaach hat, uf phase teete. Tii hon kemënt tas een kayst tepay wëyer wën yemant uf ti wëlt khomt un tee in sayn kans leepe uf phase teet.

10. Warom tuun ti kriste hayt nët te keportstaach fayre?

10 Mënst tuu tas Yeehoowa fayertaache, woo mit te falx relichioon se tuun hon, aan nëmt? (Isaías 65:11, 12) Nee, tee nëmt es nët aan. Tës weeche tuun mer nët keportstaach orer anere fayertaache fon te falx relichioon, fayre.

MACHT ES WAS AUS SE WISE FON WOO TE FAYERTAACH HEER XTAMT?

11. (a) Warom tuun layt wayter fayertaach fayre? (b) Was sol tas haupste fer tich sin?

11 Opwool se wise tas Waynachte un anere fayertaache fon te falxe aanpeetung khome, tuun ëtliche layt es wayter fayre. Tii mëne tas ti fayertaache ploos kuute keleechenheete sin fer mit te familye plaype. Tënkst tuu aach soo? Es is nët ferkheert mit te familye plaype wole. Yeehoowa hot ti familye kemacht un wil tas se al froo un eenich sin. (Efésios 3:14, 15) Awer, fer uns is tas haupste unsere froyntxaft mit Yeehoowa se hale un nët unsere parente in fayertaache fon te falx relichioon tsufriite se lose. Tës weeche hot te aphostel Phaul kesaat: “Tuut imer siin was tëm Hër kefalt.” (Efésios 5:10)

12. Was fer fayertaache tuut Kot nët aan nëme?

12 Te profeet Isaiias hot kesaat  tas mer ‘aan niks krayfe sole, woo unrayn is’. (Lees Isaías 52:11) Fiile mëne tas es niks aus macht fon woo een fayertaach ap xtamt, awer fer Yeehoowa macht tas fiil aus. Ëyer tuut fayertaache, woo fon te falx aanpeetung ap xtame orer woo mënxe un natsioone eere, nët aan nëme. Tsum payxpiil, ti ejipter hon fiile feste fer falxe kote kefayert. Noo tëm ti israelite fon Ejipt raus kang sin, hon se eens fon tiise falxe feste noo kemacht un kesaat tas wëyer een “fest fer Yeehoowa”. Awer Yeehoowa hot se kextrooft wayl se tas kemacht hon. (Êxodo 32:2-10)

SAY FROYNTLICH WËNS TUU MIT ANERE XPRËCHST

13. Was tuust tuu tich fiilaycht frooe wëns tuu nët mee fayertaache fayerst?

13 Wëns tuu ëntxlos host nët mee fayertaache se fayre, tuust tuu tich fiilaycht frooe: Was sol ich mache wën tii, woo mit meer xafe, frooe warom ich nët mit tëne Waynachte fayre? Was sol ich mache wën yemant meer een Waynachts kexënk këpt? Un wën mayn man orer fraa wil tas ich mit tee een fayertaach fayre? Wii khan ich mayn khiner hëlfe nët traurich se wëre wayl mer nët fayertaach orer keportstaach fayre?

14, 15. Was khanst tuu mache wën yemant teer een kuute fayertaach winxt orer een kexënk këpt?

14 Es is important kuut noo se tënke was tuu in yeete situatsioon saan un mache tuust. Tsum payxpiil, wën anere teer een kuute fayertaach winxe, prauchst tuu se nët iknoriire. Tuu khanst aynfach “tanke xeen” saan. Awer in situatsioone wën yemant mee wise wil, khanst tuu aus lëye warom tuu te fayertaach nët fayerst. Say awer imer froyntlich, un tsaych respëkt. Ti Piipel saat: “Ayre wërter sole imer xeen sin,  mit sals temperiirt, tas tëyer weest wii tëyer yeete eene antworte solt.” (Colossenses 4:6) Tuu khanst aus lëye tas tuu kërn mit anere tsusamer pist un aach kexënke këpst, awer tas tuu ëntxlos host tas nët in tiise fayertaache se mache.

15 Was solst tuu mache wën yemant teer een kexënk këpt? Fiilaycht weest tee, woo teer tas kexënk këpt, nët tas tuu te fayertaach nët fayerst. Orer fiilaycht saat ëyer: “Ich wees tas tuu te fayertaach nët fayerst, awer ich wolt teer tas këpe.” In yeete situatsioon khanst tuu raus suuche op tuu tas kexënk aan nëmst orer nët. Ti Piipel këpt khee list mit reekele, awer tii saat uns tas mer een kuut kewise hon mise. (1 Timóteo 1:18, 19) Mëyer wole niks mache woo Yeehoowa traurich lost.

WËN TAYN FAMILYE ANERST TËNKT

Tii woo Yeehoowa tiine sin froo

16. Was solst tuu mache wën tayn familye fayertaache fayre wil?

16 Was solst tuu mache wën tayn familye een fayertaach fayre wil? Tuu prauchst nët mit tëne xtrayte. Ferkës nët tas tii raus suuche khëne was se mache wole. Say froyntlich un tuu se respëktiire, soo wiis tuu wilst tas se tich respëktiire. (Lees Mateus 7:12) Un wën tayn familye wil tas tuu tsusamer mit tëne etwas aan een fayertaach machst? Eep tuu etwas machst, peet tsu Yeehoowa tas er tich hëleft tas richtiche raus se suuche. Tënk iwer ti situatsioon noo un tuu too triwer xtutiire. Eriner tich, tuu wilst imer Yeehoowa tsufriite lose.

17. Was khanst tuu mache tas tayn khiner nët tënke tas se etwas ferliire tuun wayl se nët fayertaache fayre?

 17 Was khanst tuu mache fer tayn khiner se hëlfe wën se siin tas ti anere fayertaache fayre? Tuu manich mool was spetsiaales fer tii mache. Tuu khanst tëne kexënke këpe wën se tas nët waarte orer een festche fer tii mache. Awer tas pëste kexënk woos tuu fer tayne khiner këpe khanst, is tayn tsayt un tayn liipe.

WAS WIL YEEHOOWA TAS TUU NOCH MACHST?

18. Warom sole mer in ti kristliche fersamlunge khome?

18 Fer Yeehoowa tsufriite se lose mise mer ti falx relichioon mit sayn kewoonheete un fayertaache lose. Awer mer mise aach ti woere aanpeetung praktisiire. Wii? Een aat is imer in ti kristliche fersamlunge khome. (Lees Hebreus 10:24, 25) Ti fersamlunge sin een importante teel fon te woere aanpeetung. (Salmo 22:22; 122:1) Wën mer uns fersamele, khëne mer eene te anere xtërke. (Romanos 1:12)

19. Warom must tuu mit anere, iwer was tuu fon te Piipel lërnst, xprëche?

19 Yeehoowa wil aach tas tuu mit anere, iwer was tuu fon te Piipel lërne tuust, xprëchst. Fiile fine sich petrikt weeche ti xlëchtichkheete uf te ëyert. (Ezequiel 9:4) Khënst tuu yemant weem es soo keet? Xprëch fer tëm iwer tayn xeen hofnung fer ti tsukhunft. Wëns tuu in ti kristliche fersamlunge khomst un mit anere iwer ti woerheet fon te Piipel xprëchst, mërkst tuu tas tuu khee lust mee host fer in te falx relichioon un in sayn kewoonheete mit mache. Suuch raus Yeehoowa richtich aan se peete un xtrëng tich aan. Soo wërst tuu sicher froo un kriist sayn seechen. (Malaquias 3:10)