Ai be doneisen ai gaukaralaia emai orea ena tomadiho gaukaradia bona emai orea taudia ai durua totona. Unai ai karaia badina unai ese ai karaia mai anina bada gaukara ia durua, unai be taunimanima ai durua Iesu Keriso ena hahediba taudia ai idia lao totona.​—Mataio 28:19, 20.

 Ai be unai doneisen amo ta ai durua lasi taga tauna ai ia lao totona. Emai orea lalonai idia noho elda taudia bona gunalaia taudia be pei idia abia lasi. Bona Iehova ena Witnes taudia ibounai be idia karaia haroro gaukara totona, pei idia abia lasi. Emai brens ofesi bona wol hedikwota ai idia gaukara taudia ibounai, Gavanin Bodi memba taudia danu, be tomadiho ena gaukara idia karaia dainai, pei idia abia lasi.

Ai Karaia Gaukara Haida

•   Pablis Gaukara: Lagani ta ta ai, ai be Baibel bona Keristani Pablikeisen milioni momo ai hahanaia, ai printaia, bouti amo ai siaia bona ai hariharilaia, unai pablikeisen be davana lasi. Danu, jw.org websait bona JW Library app ai idia noho dijitol pablikeisen be davana lasi bona ena advataismen be lasi.

•   Konstraksen Bona Meintenens Gaukara: Tanobada hegegemadai ai, emai tomadiho gabudia ai haginia bona ai hanamoa, unai amo emai kongrigeisen taudia be gabu namona ai idia hebou bona Dirava idia hanamoa diba. Brens ofesi bona trensleisen ofesi haida dekenai unai bamona ai karaia danu. Unai gaukara idia karaia taudia momo be volantia taudia, unai dainai moni bada ai negea lasi.

•   Administreisen Gaukara: Emai wol hedikwota, brens ofesi, bona trensleisen ofesi ai idia karaia gaukara, bona sekit naria taudia idia karaia gaukara be tanobada ibounai gaukarana durua totona idia henia kontribiusen amo ai durua.

•   Haroro Gaukara: Witnes taudia be sivarai namona idia harorolaia bona ma haida dekenai “Dirava ena hereva” idia hadibaia totona pei idia abia lasi. (2 Korinto 2:17) To, Keristani taudia ginigunadia ese idia karaia hegeregerena, ful-taim haroro gaukara idia karaia totona idia abia hidi bona treinia taudia be moni sisina amo ai durua, unai amo edia ruma bona tauanina durua gaudia totona davana idia karaia diba.​—Filipi 4:16, 17; 1 Timoteo 5:17, 18.

•   Hadibaia Gaukara: Orea ese ia abia kontribiusen monina ai gaukaralaia emai hebouhebou badadia ai karaia totona. Danu, unai kontribiusen moni amo Baibel idia herevalaia odio rekodi bona vidio program idauidau ai karaia. Danu elda taudia bona ful-taim hesiai taudia ai treinia edia gaukara idia karaia namonamo totona, sikuli idauidau ai karaia.

•   Disasta Rilif Gaukara: Ai ese disasta idauidau ai dika idia davaria taudia totona aniani bona ranu ai henia, danu edia ruma ai haginia. Ai be emai “abidadama tamona taudia” sibona ai durua lasi, to witnes lasi taudia ai durua danu.​—Galatia 6:10.