Baibel ena haere

 Hisihisi badana ese taunimanima dekenai metau bada do ia havaraia. Baibel ena peroveta hereva hegeregerena, unai be “dina gabedia,” eiava “dokona negana” ai do ia vara. (2 Timoteo 3:1; Daniela 12:4) “Dirava ese tanobada ia karaia matamaia negana amo ema bona hari, unai bamona hisihisi ta ia vara lasi, bona do ia vara lou lasi.”​—Mareko 13:19; Daniela 12:1; Mataio 24:21, 22.

Hisihisi badana lalonai do idia vara gaudia

•   Tomadiho koikoi do idia hadikaia. Unai nega ai karaharaga, tomadiho koikoi do idia hadikaia ore. (Apokalupo 17:1, 5; 18:9, 10, 21) Bona unai be, United Nations henunai idia gaukara siahu bada taudia ese Dirava ena ura hegeregerena tomadiho koikoi do idia hadikaia ore.​—Apokalupo 17:​3, 15-​18. a

•   Tomadiho momokani do idia tuari henia. Tanobada besedia be do idia haboua tomadiho momokani taudia idia tuari henia totona. Bona Esekiela ena matahanai ai, unai besedia ia gwauraia “Goga, Magoga tanona tauna.” To Dirava be ia idia tomadiho henia taudia be unai dika amo do ia gimaia.​—Esekiela 38:​1, 2, 9-​12, 18-​23.

•   Taunimanima do ia hahemaoro henia. Iesu ese taunimanima ibounai do ia hahemaoro henia bona “taunimanima do ia hapararaia, mamoe naria tauna ese mamoe be nanigosi amo ia hapararaia bamona.” (Mataio 25:31-33) Iesu ese ena hahemaoro ia karaia neganai, ia ese ena “tadikaka,” guba ai ia ida do idia lohia taudia, idia durua eiava idia durua lasi taudia ta ta edia kara hegeregerena do ia hahemaoro henidia.​—Mataio 25:34-46.

•   Basileia do idia lohia taudia ia haboua. Dirava ese ia abia hidi abidadama taudia, Keriso ida guba ai do idia lohia taudia unai, be edia gaukara tanobada ai idia haorea murinai, guba ai mauri hanaihanai do idia abia.​—Mataio 24:31; 1 Korinto 15:50-53; 1 Tesalonika 4:15-17.

•   Aramagedono. Unai be “Siahu Ibounai Diravana ena dina badana ena tuari,” danu unai dina idia gwauraia “Iehova ena dina.” (Apokalupo 16:14, 16; Isaia 13:9; 2 Petero 3:​12) Bona Keriso ese ia hahemaoro henia taudia be do ia hadikaia ore. (Sefanaia 1:​18; 2 Tesalonika 1:​6-​10) Danu Baibel ese ia herevalaia dagedage animal mai ena kwarana 7, unai be politikol oreadia ibounai ia laulaulaia be do idia hadikaia ore.​—Apokalupo 19:19-21.

Hisihisi badana murinai do idia vara gaudia

•   Satani bona ena demoni do idia hadiburaia. Aneru goadana ta ese Satani bona ena demoni be “guri dobu masemase” lalonai do ia negea diho, unai gabu ai idia be mase taudia bamona gau ta do idia karaia diba lasi. (Apokalupo 20:1-3) Bona Satani idia atoa guri dobu masemase gabuna be dibura ruma bamona; ia ese momo do ia hakaua kerere lou lasi.​—Apokalupo 20:7.

•   Lagani 1,000 Lohia Negana ia matamaia. Dirava ena Basileia ena lohia lagani 1,000 ia hamatamaia neganai, taunimanima dekenai hahenamo momo do ia mailaia. (Apokalupo 5:9, 10; 20:4, 6) Bona idia duahia diba lasi “hutuma bada” be “hisihisi badana amo” do idia roho mauri, bona tanobada ai lagani 1,000 ia matamaia negana do idia itaia.​—Apokalupo 7:9, 14; Salamo 37:9-11.