Dirava Ena Basileia be Emu Kudouna Lalonai, A?
Baibel ena haere
Dirava ena Basileia be Keristani Taudia edia kudouna ai ia noho lasi. a To Baibel ese ena gabu korikorina ia gwauraia, unai be “guba Basileia.” (Mataio 4:17) Danu Baibel ese ia hahedinaraia, unai be gavamani korikorina bona guba ai ia lohia dalana ia herevalaia.
Dirava ena Basileia be mai ena lohia taudia, taunimanima do idia lohiaia, taravatu, bona hakaua herevadia ia henia danu, unai amo Dirava ena ura be guba ai bona tanobada ai do ia vara.—Mataio 6:10; Apokalupo 5:10.
Dirava ena gavamani, eiava Basileia ese, “taunimanima, bese, bona gado idauidau taudia” do ia lohiaia. (Daniela 7:13, 14) Unai Basileia ena lohia siahuna be ia naria taudia amo lasi, to Dirava amo ia mai.—Salamo 2:4-6; Isaia 9:7.
Iesu ese ena abidadama aposetolo taudia ia hamaoroa idia be guba ena Basileia lalonai, ia ida do idia lohia bona ‘terona ai do idia helai.’—Luka 22:28, 30.
Basileia idia inai henia taudia ibounai do ia hadikaia ore.—Salamo 2:1, 2, 8, 9; 110:1, 2; 1 Korinto 15:25, 26.
Baibel ia hahedinaraia lasi guba Basileia be tau ta ena kudouna ai ia noho, eiava unai tauna ena kudouna ia lohiaia. To, ia hahedinaraia “Basileia ena hereva” eiava “Basileia ena sivarai namona” ese ta ia durua eiava ena kudouna ia veria diba.—Mataio 13:19; 24:14.
“Dirava ena Basileia be umui emui lalonai dekenai ia noho” ena anina be dahaka?
Baibel idia hahanaia taudia ese Luka 17:21 ai, Basileia ia noho gabudia hahedinaraia totona idia gaukaralaia herevadia dainai taunimanima haida idia daradara. Hegeregere, Buka Helaḡa ia gwau, “Dirava ena Basileia be umui emui lalonai dekenai ia noho.” Unai siri ena hereva ita lalopararalaia totona, siri ena kahana haida mani ita laloa.
Dirava ena Basileia be Iesu idia kara auka henia bona ia idia hamasea taudia edia kudouna ai ia noho lasi
Iesu be Farisea taudia ia hereva henia noho, unai tomadiho gunalaia taudia be ia idia inai henia bona palani idia karaia ia idia hamasea totona. (Mataio 12:14; Luka 17:20) Unai ena anina be, Basileia be unai kwara auka taudia edia kudouna ai ia noho, a? Iesu be idia dekenai ia gwau: “Emui kudouna be koikoi bona taravatu utua karadia amo ia honu.”—Mataio 23:27, 28.
Baibel idia hahanaia taudia ma haida ese Iesu ena hereva Luka 17:21 ai idia hahedinaraia namonamo: “Dirava ena Basileia be oi ida ia noho.” (Italics ours; Contemporary English Version) “Dirava ena Basileia be emui huanai ia noho.” (New World Translation, footnote) Guba Basileia be Farisea taudia ida eiava idia huanai ia noho, unai be Iesu ia herevalaia, Dirava ese ia abia hidi unai basileia ena King ai do ia lao tauna be edia vairanai ia gini noho.—Luka 1:32, 33.
a Keristani dubu momo be taunimanima idia hadibaia Dirava ena Basileia be tau ta ena lalona eiava kudouna ai ia noho. Hegeregere, United States lalonai, Southern Baptist Convention orea taudia idia gwau: “Dirava ena Basileia ena anina be Dirava ena pavapava karana be taunimanima ta ta iboudiai edia kudouna bona mauri lalonai ia noho.” Unai hegeregerena, Pope Benedict XVI ese ena buka ladana Jesus of Nazareth ai, ia gwau “ta ena kamonai karana amo Dirava ena Basileia ia abia diba.”
Reana Inai Danu Oi Ura
MAI ANINA BADA BAIBEL HADIBAIA HEREVADIA
Dirava Ena Basileia be Dahaka?
Iesu ena hesiai gaukara negana lalonai, iena hahediba herevadia ibounai amo Dirava ena Basileia herevana ia hadibaia momo. Lagani handred momo lalonai, ena murinai idia raka taudia be Basileia ia mai totona idia guriguri.
GIMA KOHORONA
Dirava Ena Basileia Ena King be Daika?
Baibel torea taudia haida be Dirava ena Basileia ena King ai do ia lao Tauna idia hahedinaraia. Taunimanima edia histori lalonai, tau tamona sibona be idia gwauraia Lohia Tauna hereadaena.
