Bybel Widhyárti logan 1870 meñ

Pahilá The Watchtower, 1879 meñ

De Wachttoren áj-kál ke

Bybel áge se bolis rahá ki Jisu ke marne ke bád nakli adhyápak thaṟá howat pahilá Isái loganke bic meñ aur Bybel ke saccái ke bigáṟat (Pathaawal waalan 20:29, 30). Samai meñ ohi bhail rahá. Ulogan Jisu ke sikchá ke milái deis rahá be-biswási dharam ke bicár se, aur ek antar nirmat Isái-Jat ke huwáñ par suru bhail rahá (2 Tiemotias 4:3, 4). Kaise hamlogan isáit par ján sakilá ki hamloganke ek sahi samajh hai ki Bybel sac-meñ ká sikháwe hai?

Yehowa khát u samai áil rahá saccái dekháwe khátin. U áge se bolis rahá ki „ant ke samai meñ saccá bidyá bahut ḏheṟ howat” (Daniel 12:4, NW). Aṯṯhárá sau sattar meñ ego choṯá jhunḏ saccái khoje wálan pahicánis rahá ki ḏheṟ kerki ke sikchá Bybel ke mutábik ná rahá. Ohi se ulogan suru karis rahá sahi Bybel ke sikchá khoje ke, aur Yehowa uloganke ásirbádh karis rahá átmik samajh se.

Imándár admi logan jatan se Bybel ke sikchá lewat rahá. U Bybel Widhyárti logan, jaise hamlogan pahile pahicánal ját rahaili, ek bháw páis rahá sikchá lewe ke jaun hamlogan áj talak istamál karilá. Ulogan ek se ek lekh ke báre meñ bát-cit karat rahá. Jab ulogan ek Bybel ke ṯukaṟá par pahuñcat rahá jaun muskil rahá samjhe ke, tab ulogan dusar vers ke khojat rahá jaun u ṯukaṟá ke samjháwat. Jab ulogan ek ant par pahuñcat rahá jaun bacal Bybel se summat rahá tab ulogan oke likh dewat rahá. Aisne kare se, ki Bybel apne ke samjháwat rahá, ulogan phir se saccái jánis Parmeswar ke nám aur Ráj ke báre meñ, okar maksat insán loganke aur dharti khátin, maral loganke dasá ká hai, aur u ásará ji uṯhe khátin. Uloganke khoj uloganke ajád karis rahá nakli sikchá aur kárbár se.​—Johaanas 8:31, 32.

Aṯṯhárá sau unási meñ Bybel Widhyárti logan dekhis rahá ki u samai ái gail rahá saccái ke sagaro ailán kare ke. U sál meñ ulogan suru karis rahá patriká banáwe ke jaun hamlogan ab talak chápilá, The Watchtower Announcing Jehovah’s Kingdom. Isáit hamlogan Bybel ke saccái manai loganse báñṯilá 240 des meñ aur 750 se jádá bhásá meñ. Kabhi ná áge se saccá bidyá etná ḏheṟ rahá!

  • Jisu ke marne ke bád, Bybel ke saccái ke ká bhail rahá?

  • Ká hamlogan khátin mumkin karis rahá saccái Parmeswar ke Bát se phir se jáne ke?