1. Káhe ke Parmeswar puráná Israel ke racáis rahá?

Parmeswar purkhá Abraham ke aulád loganke racáis rahá ek ját meñ aur uloganke ketne kánun deis rahá. U u játi ke „Israel” bolais rahá aur uloganke saccá pujá aur okar bát ke rakhwálá banáis rahá (Bhajan 147:19, 20). Oisane sab játi ke insán logan Israel se fáidá uṯhái sakat.​—Paṟh Suru 22:18.

Parmeswar Israel loganke cunis rahá okar gawáhi logan howe ke. Uloganke itihás dekháwe hai kaise manai logan fáidá páwe hai Parmeswar ke bát máne se (Dusará kanun 4:6). Israel duwárá dusar logan saccá Parmeswar ke bhi ján sakat rahá.​—Paṟh Yesaya 43:10, 12.

2. Káhe ke saccá Isái logan racán hai?

Same meñ Israel apan kirpá Parmeswar se hár gail rahá aur Yehowa u játi ke Isái ke samáj se badal deis rahá (Mateas 21:43; 23:37, 38). Aj-kál Israel ke jagahá par saccá Isái logan jaise Yehowa ke Gawáhi logan sewá kare hai.​—Paṟh Pathaawal waalan 15:14, 17.

Jisu apan celá loganke racáis rahá parcár kare ke aur sab játi meñ se celá banáwe ke (Mateas 10:7, 11; 24:14; 28:19, 20). I kám isáit apan shikhar par pahuñce hai i same ke jug ke ant meñ. Itihás meñ i pahilá dafe hai ki Yehowa lakho manai loganke ke ekatthá kare hai saccá pujá meñ (Aagam ke baat 7:9, 10). Saccá Isái logan racán gail hai ek dusare ke himmat aur madad dewe khátin. Duniyá bhar par ulogan mauj kare hai ekahi Bybel program meñ uloganke sabhá meñ.​—Paṟh Hebar 10:24, 25.

 3. Kaise i nawá jabáná ke sansthá Yehowa ke Gawáhi loganke suru bhail rahá?

Aṯṯhárá sau sattar meñ ek choṯá jhunḏ Bybel widhyárti logan phir se Bybel ke saccái dekhe lagal jaun lás hoi gail rahá. Ulogan jánat rahá ki Jisu u Isái ke samáj racáis rahá parcár kare khátin, ohi se ulogan ek internationál Ráj-parcárik campainye suru karis rahá. Onnais sau ektis meñ ulogan u nám Yehowa ke Gawáhi apnáis rahá.​—Paṟh Pathaawal waalan 1:8; 2:1, 4; 5:42.

4. Kaise Yehowa ke Gawáhi logan racán hai?

Pahilá sau baris meñ u Isái ke samáj logan jaun ḏheṟ des meñ rahá fáidá uṯháwat rahá u caláwe wálá dehiñ se jaun ek jagahá par rahá aur jaun Jisu ke pahicánat rahá jaise u samáj ke mukhiyá (Pathaawal waalan 16:4, 5). Aisne áj-kál, Yehowa ke Gawáhi logan duniyá bhar par fáidá uṯháwe hai ek caláwe wálá dehiñ se, tajurbá aguwá loganke duwárá. U dekh-bhál kare Yehowa ke Gawáhi loganke bykantor jaun anuwád kare hai, chápe hai, aur Bybelstudi ke sárájám phailáwe hai 600 se jádá bhásá meñ. Ohi se i caláwe wálá dehiñ bannobast kare hai himmat aur sikchá Bybel duwárá 100.000 se jádá samáj meñ duniyá bhar par. Har ek samáj meñ bidwán manai hai jaun aguwá khát kito dharam ke aguwá ghat sewá kare hai. I manai logan piyár se Parmeswar ke jhunḏ ke sewá kare hai.​—Paṟh 1 Petras 5:2, 3.

Yehowa ke Gawáhi logan racán hai parcár kare khátin aur celá banáwe khátin. Jaise u paṯháwal wálan, hamlogan bhi ghar-ghar parcár karilá (Pathaawal waalan 20:20). Hamlogan bhi Bybelstudi deilá imándár loganke jaun saccái cáhe hai. Baki Yehowa ke Gawáhi logan ná kháli ek samáj hai. Hamlogan ek palwár haili ek piyár bhará Pitá ke sáth. Hamlogan bhái aur bahin haili jaun apne meñ dekh-bhál kare hai (2 Tesaalonieka 1:3). Jabse Yehowa ke jantá racán gail hai Parmeswar ke parsand kare ke aur dusar loganke madad kare ke, ulogan duniyá bhar par sab se khusi palwár hai.​—Paṟh Bhajan 33:12; Pathaawal waalan 20:35.